Magdiretso sa kaundan

Magdiretso sa listahan sang kaundan

Parte sa “Katapusan”

Parte sa “Katapusan”

 Ang Matun-an Naton kay Jesus

Parte sa “Katapusan”

Katapusan sang ano?

Namangkot ang mga disipulo ni Jesus sa iya: “Ano ang mangin tanda sang imo presensia kag sang katapusan sang sistema sang mga butang?” (Mateo 24:3) Sa pagsabat sa sini nga pamangkot, wala nagsiling si Jesus nga matapos ining literal nga duta. Antes sini, ginsugid niya ang parte sa “sistema sang mga butang” kag gingamit ini nga termino sa pagpatuhoy sa tanan nga paggahom sang tawo kag relihioso nga sistema nga ginagamhan ni Satanas. (Mateo 13:22, 40, 49) Gani amo ini ang sistema nga iya ginahunahuna sang nagsiling sia: “Magaabot ang katapusan.”—Mateo 24:14.

Paano ginlaragway ni Jesus ang katapusan?

Ang katapusan sining wala sing hustisya nga sistema isa ka “maayong balita.” Nagsiling si Jesus: “Ining maayong balita sang ginharian ibantala sa bug-os napuy-an nga duta subong panaksi sa tanan nga pungsod; kag nian magaabot ang katapusan.” Ginlaragway ni Jesus ang katapusan sang presente nga sistema sang mga butang sa sini nga paagi: “May dakung kapipit-an, nga ang subong sini wala pa mahanabo kutob sa ginsuguran sang kalibutan tubtob karon, wala, kag indi na gid mahanabo liwat. Sa katunayan, luwas kon palip-uton yadto nga mga adlaw, wala sing unod nga maluwas.”—Mateo 24:14, 21, 22.

Sin-o ang laglagon?

Laglagon ang mga wala nagahigugma kag nagaalagad kay Jehova kag kay Jesus. Ini nga mga tawo wala nagatuman sa Dios. Nagsiling si Jesus: “Subong sang mga adlaw ni Noe, amo man ang presensia sang Anak sang tawo. Kay subong nga sila sadto nga mga adlaw sa wala pa ang anaw, . . . wala sila magsapak tubtob nga nag-abot ang anaw kag nag-anod sa ila tanan.” (Mateo 24:36-39) Nagsiling si Jesus nga madamo ang nagalakat sa dalan nga nagapadulong sa kalaglagan. Pero, nagpasalig  sia nga may ‘masipot nga dalan nga nagapadulong sa kabuhi.’—Mateo 7:13, 14.

San-o matapos ini nga sistema sang mga butang?

Sang ginpamangkot si Jesus parte sa tanda sang iya presensia “kag sang katapusan sang sistema sang mga butang,” si Jesus nagsabat: “Ang pungsod magatindog batok sa pungsod kag ang ginharian batok sa ginharian, kag may kakulang sa kalan-on kag mga linog sa nagkalainlain nga duog . . . kag bangod sang paglapnag sang pagkamalinapason ang gugma sang kalabanan magaugdaw.” (Mateo 24:3-12) Gani, ang tanan nga masubo nga balita subong may makapalig-on nga kahulugan. Nagakahulugan ini nga sa indi madugay makatigayon sing paghidait ang matinumanon nga katawhan sa idalom sang Ginharian sang Dios. Nagsiling si Jesus: “Kon makita ninyo nga nagakahanabo ini nga mga butang, mahibaluan ninyo nga ang ginharian sang Dios malapit na.”—Lucas 21:31.

Ano ang dapat mo himuon?

Nagsiling si Jesus nga “ginhatag [sang Dios] ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.” (Juan 3:16) Agod mapakita ang pagtuo sa Dios kag sa iya Anak, dapat nga makilala mo sila sing maayo. Amo nga nagsiling si Jesus: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”—Juan 17:3.

Maghalong nga indi mapunggan sang sobra nga kabalaka kag mga problema ang imo pagtinguha nga makatuon kon paano mapakita sa Dios ang imo gugma. Nagsiling si Jesus: “Mag-andam kamo nga ang inyo tagipusuon indi gid mabug-atan sang . . . mga kabalaka sa kabuhi, kag ina nga adlaw magaabot sa inyo sing hinali subong sang siod. Kay magaabot ini.” Kon pamatian mo ang paandam ni Jesus, ‘magmadinalag-on ka sa pagpalagyo sa sini tanan nga butang nga gintalana nga mahanabo.’—Lucas 21:34-36.

Para sa dugang nga impormasyon, tan-awa ang libro nga Ano Gid ang Ginatudlo sang Biblia? * sa kapitulo 9 nga natig-uluhan, “Nagakabuhi Bala Kita sa ‘Katapusan nga mga Adlaw’?”

[Footnote]

^ par. 14 Ginhimo sang mga Saksi ni Jehova.