Magdiretso sa kaundan

Magdiretso sa listahan sang kaundan

4 Dulaa ang Imo mga Pangduhaduha

4 Dulaa ang Imo mga Pangduhaduha

 4 Dulaa ang Imo mga Pangduhaduha

“Ikaw nga diutay sing pagtuo, ngaa nagduhaduha ka?”—Mateo 14:31.

UPANG: Kon kaisa, nagapangduhaduha man ang mga disipulo ni Jesus. (Mateo 14:30; Lucas 24:36-39; Juan 20:24, 25) Ang matuod, ginlaragway sang Biblia ang kakulang sing pagtuo subong “sala nga madali nagasalawid sa aton.” (Hebreo 12:1) Nagsulat si apostol Pablo: “Indi tanan nga tawo may pagtuo.” (2 Tesalonica 3:2) Indi buot silingon nga indi masarangan sang iban nga ipakita ang pagtuo, kundi madamo ang wala nagapanikasog nga matigayon ini. Pero pakamaayuhon kita sang Dios kon ginapanikasugan naton ini.

PAANO MO INI MALANDAS? Hibalua ang rason kon ngaa nagaduhaduha ka. Halimbawa, nagduhaduha si Tomas nga ginbanhaw si Jesus, bisan pa nga nagsiling ang iban nga disipulo nga  nakita nila si Jesus. Gusto ni Tomas nga makakita sing ebidensia. Ano ang resulta? Ginpakitaan sia ni Jesus sing ebidensia agod magtuo sia.—Juan 20:24-29.

Paagi sa Biblia, nagahatag si Jehova nga Dios sing sabat nga kinahanglan naton agod madula ang aton mga pagpangduhaduha. Halimbawa, madamo ang nadulaan sing pagtuo sa Dios bangod ginabasol nila sia sa mga inaway, kagamo, kag kalautan nga ginaantos sang mga tawo. Ano ang ginasiling sang Biblia parte sa sini?

Wala nagagahom ang Dios paagi sa mga gobierno sang tawo. Ginsugid ni Jesus nga si Satanas ang indi makita nga “manuggahom sang kalibutan.” (Juan 14:30) Gintanyag ni Satanas kay Jesus ang tanan nga awtroridad sa tanan nga ginharian sa kalibutan kabaylo sang isa ka buhat sang pagsimba nga nagasiling: “Ihatag ko sa imo ini tanan nga awtoridad kag ang ila himaya, bangod natugyan ini sa akon, kag ihatag ko ini bisan kay sin-o nga luyag ko.” Wala ginsaway ni Jesus ang pangangkon ni Satanas. Sa baylo, nagsabat Sia: “Nasulat na, ‘Si Jehova nga imo Dios ang dapat mo simbahon, kag sa iya ka lamang dapat maghimo sang sagrado nga pag-alagad.’” (Lucas 4:5-8) Si Satanas kag ang gobierno sang tawo amo ang balasulon sa pag-antos sa kalibutan, indi ang Dios.—Bugna 12:9, 12.

Sa indi madugay, dulaon ni Jehova nga Dios ang tanan nga kabangdanan sang pag-antos. Nagpatindog na sia sang isa ka Ginharian ukon gobierno, nga ginagamhan sang iya Anak, si Cristo Jesus, agod gamhan ang mga tawo. (Mateo 6:9, 10; 1 Corinto 15:20-28) Bilang katumanan sa mga tagna sa Biblia, ang maayong balita parte sa sini nga Ginharian ginabantala na karon sa bug-os nga duta. (Mateo 24:14) Sa indi madugay, dulaon sini nga Ginharian ang tanan nga nagapamatok kag kabangdanan sang pag-antos sang tawo.—Daniel 2:44; Mateo 25:31-33, 46; Bugna 21:3, 4.

ANO ANG ATON MATIGAYON? Ang mga nagapangduhaduha kaangay sang mga balod sa dagat nga “ginapalidpalid sang tagsa ka hangin sang panudlo paagi sa pagkatuso sang mga tawo.” (Efeso 4:14; 2 Pedro 2:1) Pero ang mga nakakita sang mga sabat sa sini nga mga pamangkot, makasarang sa ‘pagtindog sing malig-on sa pagtuo.’—1 Corinto 16:13.

Gusto ka buligan sang mga Saksi ni Jehova nga makita ang sabat sa imo mga pagpangduhaduha. Ginaimbitar ka nila nga mag-upod sa ila kag usisaon mismo ang ila mga panudlo. Kon himuon mo ini, mapabakod gid ang imo pagtuo sa Dios.

Para sa dugang nga impormasyon, tan-awa ang libro nga Ano Gid ang Ginatudlo sang Biblia? * sa kapitulo 8 nga natig-uluhan, “Ano ang Ginharian sang Dios?” kag sa kapitulo 11, “Ngaa Ginatugutan sang Dios ang Pag-antos?”

[Nota]

^ par. 10 Ginhimo sang mga Saksi ni Jehova.

[Retrato sa pahina 9]

Ang mga nakakita sang makapakumbinsi nga mga sabat sa ila mga pamangkot may mabakod nga basihan para sa ila pagtuo