Magdiretso sa kaundan

Magdiretso sa listahan sang kaundan

1 Pabakura ang Imo Pagsalig sa Biblia

1 Pabakura ang Imo Pagsalig sa Biblia

 1 Pabakura ang Imo Pagsalig sa Biblia

“Ang pagsulat sa bug-os nga Kasulatan gintuytuyan sang Dios kag mapuslanon ini sa pagpanudlo, sa pagsabdong, sa pagtadlong sa mga butang, sa pagdisiplina sa pagkamatarong.”—2 Timoteo 3:16.

UPANG: Madamo ang nagapati nga tawo lamang ang awtor sang Biblia. Nagapati ang pila nga indi ini sibu sa kasaysayan. Nagasiling naman ang iban nga indi praktikal kag dinumaan na ang laygay sang Biblia.

PAANO MO INI MALANDAS? Sa masami, ang mga nagaduhaduha nga masaligan ukon mapuslanon ang Biblia, wala mismo nakapangusisa sa sini. Ginasunod lamang nila kon ano ang ginasiling sang iban. Pero ang Biblia nagpaandam: “Ang kulangkulang nagapati sa tagsa ka polong, apang ang mahalongon nagatan-aw sa iya paglakat.”—Hulubaton 14:15.

Imbes nga sundon lamang kon ano ang ginasiling sang iban, mas maayo nga ilugon mo ang halimbawa sang mga Cristiano sang unang siglo sa Berea, nga amo karon ang naaminhan nga Gresya. Wala dayon nila ginapatihan ang ginasugid sang iban. Sa baylo, nakilal-an sila nga ‘nagausisa sing maayo sa Kasulatan sa adlaw-adlaw kon bala matuod gid ini nga mga butang.’ (Binuhatan 17:11) Binagbinagon naton sing makadali ang duha ka rason kon ngaa makasalig ka nga ang Biblia Pulong sang Dios.

Ang Biblia sibu sa kasaysayan. Sa sulod sang pila na ka tuig, ginapangduhaduhaan sang mga kritiko ang pagkasibu sang ginasiling sang Biblia parte sa mga ngalan sang tawo kag lugar. Pero, pirme mapamatud-an sang mga ebidensia nga masaligan gid ang rekord sang Biblia kag indi matuod ang ginasiling sang mga kritiko.

Halimbawa, sang una, ginaduhaduhaan sang mga iskolar nga nagkabuhi si Hari Sargon sang Asiria nga ginsambit sa Isaias 20:1. Pero sang katuigan 1840, nakutkutan sang mga arkeologo ang palasyo sang sini nga hari. Sa karon, si Sargon isa na sa kilala nga hari sang Asiria.

Ginaduhaduhaan man sang mga kritiko ang pagluntad ni Poncio Pilato, ang Romanong gobernador nga nagmando sa pagpapatay kay Jesus. (Mateo 27:1, 22-24) Pero sang 1961, nadiskobrehan malapit sa siudad sang Cesarea sa Israel  ang isa ka bato nga may ngalan kag ranggo ni Pilato.

Kon parte sa pagkasibu sang Biblia sa kasaysayan, ang Oktubre 25, 1999, nga isyu sang U.S. News & World Report nagsiling: “Sa pinasahi nga mga paagi, ginpamatud-an sang moderno nga arkeolohiya ang pagkasibu sang kasaysayan nga narekord sa Bag-o kag Daan nga mga Testamento, nga nagapamatuod sang importante nga bahin sang kasaysayan sang mga patriarka sa Israel, paggua sa Egipto, mga hari sa kaliwatan ni David, kag sang kabuhi kag panahon ni Jesus.” Bisan nga ang pagtuo sa Biblia wala lamang nabase sa natukiban sang mga arkeologo, mapaabot naton ini nga pagkasibu sa libro nga gintuytuyan sang Dios.

Ang praktikal nga kaalam sa Biblia makahatag sing benepisyo sa tanan nga tawo. Madugay pa antes madiskobrehan ang mga mikroorganismo kag ang ila papel sa pagpalapta sing balatian, nagrekomendar na ang Biblia sang pagkatinlo nga mapuslanon kag importante gihapon sa aton karon. (Levitico 11:32-40; Deuteronomio 23:12, 13) Mas malipayon ang mga miembro sang pamilya nga nagatuman sang laygay sa Biblia parte sa kon paano dapat tratuhon ang isa kag isa. (Efeso 5:28–6:4) Ang tawo nga nagasunod sa mga prinsipio sang Biblia mahimo nga mangin mas maayo nga trabahador ukon mas mabuot nga amo. (Efeso 4:28; 6:5-9) Ang pag-aplikar sa mga prinsipio sang Biblia makahatag man sing kaayuhan sa emosyon. (Hulubaton 14:30; Efeso 4:31, 32; Colosas 3:8-10) Mapaabot gid naton ining praktikal nga mga laygay halin sa aton Manunuga.

ANO ANG ATON MATIGAYON? Mangin maalam ang isa ka tawo bangod sang kaalam halin sa Biblia. (Salmo 19:7) Isa pa, kon may pagsalig na kita sa Biblia, makabulig ini sa aton nga mapalig-on ang aton pagtuo.

Para sa dugang nga impormasyon, tan-awa ang libro nga Ano Gid ang Ginatudlo sang Biblia? * sa kapitulo 2 nga natig-uluhan, “Ang Biblia-Isa ka Libro Gikan sa Dios.”

[Nota]

^ par. 12 Ginhimo sang mga Saksi ni Jehova.