Magdiretso sa kaundan

Magdiretso sa listahan sang kaundan

3 Tun-i ang Kamatuoran Parte kay Jesus

3 Tun-i ang Kamatuoran Parte kay Jesus

 3 Tun-i ang Kamatuoran Parte kay Jesus

“Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.”—Juan 3:16.

UPANG: Nagapati ang iban nga indi matuod nga persona si Jesus. Ang iban naman nagapati nga nagluntad sia, pero isa lang sia ka ordinaryo nga tawo kag madugay na nga napatay.

PAANO MO INI MALANDAS? Iluga si disipulo Natanael. * Ginsilingan sia sang iya amigo nga si Felipe nga nakita niya ang Mesias, “si Jesus, nga anak ni Jose, nga taga-Nazaret.” Apang, wala dayon nagpati si Natanael. Sa pagkamatuod, sia nagsabat: “May maayo bala nga butang nga magagikan sa Nazaret?” Bisan pa sa sini, ginbaton niya ang pangagda ni Felipe nga ‘tan-awon’ mismo ang Mesias. (Juan 1:43-51) Makabenepisyo ka man kon usisaon mo mismo ang pamatuod parte kay Jesus. Ano ang puede mo himuon?

Usisaa ang mga pamatuod sa kasaysayan nga si Jesus matuod nga persona. Kilala nga mga istoryador sanday Josephus kag Tacitus sang unang siglo kag indi sila mga Cristiano. Pero suno sa ila, si Jesucristo isa gid ka matuod nga persona. Ginlaragway ni Tacitus kon paano ginpasibangdan sang Romano nga Emperador nga si Nero ang mga Cristiano sa sunog sa Roma sang 64 C.E. Nagsulat sia: “Ginpasibangdan ni Nero kag ginsilutan sing makangilidlis ang isa ka grupo bangod sang ila pagpati, ginatawag sila nga mga Cristiano. Si Christus [Cristo], kon sa diin ginbase ang ila ngalan, nag-antos man sing grabe nga silot sa tion sang paggahom ni Tiberio sa kamot sang aton gobernador nga si Poncio Pilato.”

Ang Encyclopædia Britannica, 2002 nga Edisyon nagsiling parte sa mga komento sang una kag ikaduhang siglo nga mga istoryador parte kay Jesus kag sa mga Cristiano sang una: “Ini nga mga kasaysayan nagapamatuod nga sang una, bisan ang mga nagapamatok sa mga Cristiano wala nagaduhaduha nga nagkabuhi si Jesus, kag wala sing basihan nga ginduhaduhaan sugod lang sang katapusan nga bahin sang ika-18 nga siglo, ika-19 nga siglo, kag sang panugod sang ika-20 nga siglo.” Sang 2002, ang editoryal sang The Wall Street Journal nagsiling: “Ang kalabanan sang mga iskolar, luwas sa iban nga mga ateista, nagapati na nga si Jesus sang Nazaret matuod gid nga nagkabuhi.”

Binagbinaga ang pamatuod nga si Jesus ginbanhaw. Sang gin-aresto si Jesus sang mga nagapamatok sa iya, ginbayaan sia sang iya suod  nga mga kaupod kag ginpanghiwala sia ni Pedro. (Mateo 26:55, 56, 69-75) Pagkatapos nga gin-aresto si Jesus, naglinapta ang iya mga sumulunod. (Mateo 26:31) Dayon, nagpanghikot liwat ang iya mga disipulo. Maisugon nga gin-atubang ni Pedro kag ni Juan ang mga nagpapatay kay Jesus. Napalig-on ang mga disipulo ni Jesus amo nga ginpaambit nila ang maayong balita sa bilog nga Emperyo sang Roma. Mas gusto pa nila mapatay sangsa ikompromiso ang ila pagpati.

Ngaa? Ginpaathag ni apostol Pablo nga ginbanhaw si Jesus kag “nagpakita sia kay Cefas, dayon sa napulog-duha.” Sia nagdugang: “Pagkatapos sina nagpakita sia sa kapin sa lima ka gatos ka kauturan sa isa ka higayon.” Ang kalabanan sang mga nakakita buhi pa sang ginsulat ini ni Pablo. (1 Corinto 15:3-7) Mas madali nga ipanghiwala sang mga maduhaduhaon ang testimonya sang isa ukon duha ka tawo. (Lucas 24:1-11) Pero ang testimonya sang sobra sa lima ka gatos nga nakasaksi, malig-on nga nagpamatuod nga ginbanhaw si Jesus.

ANO ANG ATON MATIGAYON? Ang mga nagatuo kag nagatuman kay Jesus mapatawad sang ila mga sala kag may matinlo nga konsiensia. (Marcos 2:5-12; 1 Timoteo 1:19; 1 Pedro 3:16-22) Kon mapatay sila, nagsaad si Jesus nga banhawon sila sa “sa katapusan nga adlaw.”—Juan 6:40.

Para sa dugang nga impormasyon, tan-awa ang libro nga Ano Gid ang Ginatudlo sang Biblia? * sa kapitulo 4 nga natig-uluhan, “Sin-o si Jesucristo?” kag kapitulo 5, “Ang Gawad—Ang Labing Bilidhon nga Regalo sang Dios.”

[Mga Nota]

^ par. 4 Ang mga manunulat sang Ebanghelyo nga sanday Mateo, Marcos, kag Lucas nagtawag kay Natanael nga Bartolome.

^ par. 10 Ginhimo sang mga Saksi ni Jehova.

[Retrato sa pahina 7]

Kaangay ni Natanael, usisaa man ang ebidensia parte kay Jesus