May Ngalan Bala ang Dios?
May Ngalan Bala ang Dios?
Kinaandan nga mga sabat:
▪ “Ginuo ang iya ngalan.”
▪ “Wala sia sing ngalan.”
Ano ang ginsiling ni Jesus?
▪ “Gani, mangamuyo kamo sa sining paagi: ‘Amay namon nga yara sa langit, pakabalaanon ang imo ngalan.’” (Mateo 6:9) Nagapati si Jesus nga may ngalan ang Dios.
▪ “Ginpakilala ko ang imo ngalan sa ila kag ipakilala ko ini, agod ang gugma nga imo ginhigugma sa akon mangin yara sa ila kag ako mahiusa sa ila.” (Juan 17:26) Ginpakilala ni Jesus ang ngalan sang Dios.
▪ “Indi na ninyo ako makita tubtob magsiling kamo, ‘Pakamaayuhon sia nga nagakari sa ngalan ni Jehova.’” (Lucas 13:35; Salmo 118:26) Gingamit ni Jesus ang ngalan sang Dios.
ANG Dios mismo nagsugid sa aton sang iya ngalan. Nagsiling sia: “Ako si Jehova, ina ang akon ngalan.” * (Isaias 42:8, American Standard Version) Ang Hebreo nga ngalan sang Dios ginbadbad subong Jehova sa Hiligaynon. Mahimo nga makibot ka kon mahibaluan mo nga ining pinasahi nga Hebreo nga ngalan makita sing linibo ka beses sa daan nga mga manuskrito sang Biblia. Ang matuod, amo ini ang ngalan nga pinakamadamo nga beses nga makita sa Biblia.
Kon pamangkuton mo ang iban kon ano ang ngalan sang Dios, mahimo nga “Ginuo” ang ila sabat. Apang, daw pareho lang ini kon pamangkuton ka kon sin-o ang nagdaug sa eleksion. Masabat ka lang bala nga nagdaug ang “kandidato?” Ining duha ka sabat pareho nga indi maathag kay ang “Ginuo” kag “kandidato” indi mga ngalan.
Ngaa ginpakilala sang Dios sa aton ang iya ngalan? Ginsugid niya ini agod makilala pa gid naton sia sing maayo. Halimbawa, ang isa ka tawo mahimo tawgon nga Sir, Boss, Tatay, ukon Lolo. Ini nga mga titulo nagahatag sing ideya kon ano sia. Apang ang iya ngalan amo ang magasugid kon sin-o gid sia. Sing kaanggid, ang mga titulo nga Ginuo, Makagagahom, Amay, kag Manunuga nagahatag sa aton sing ideya kon ano ang mga ginahimo sang Dios. Apang, ang iya lamang personal nga ngalan, nga Jehova, ang magasugid sa aton kon sin-o gid sia. Paano mo makilala ang Dios sing bug-os kon wala mo nahibaluan ang iya ngalan?
Indi lang importante nga mahibaluan naton ang ngalan sang Dios kundi importante man nga gamiton naton ina nga ngalan. Ngaa? Bangod ang Biblia nagasugid sa aton: “Ang tagsatagsa nga nagatawag sa ngalan ni Jehova maluwas.”—Roma 10:13; Joel 2:32.
[Nota]
^ par. 9 Para sa paathag tuhoy sa kahulugan sang ngalan sang Dios, kag kon ngaa ini nga ngalan indi makita sa iban nga bersion sang Biblia, tan-awa ang pahina 195-197 sang libro nga Ano Gid ang Ginatudlo Sang Biblia? nga ginabalhag sang mga Saksi ni Jehova.
[Blurb sa pahina 6]
Ang isa ka tawo mahimo tawgon sa titulo nga Sir, Boss, Tatay, ukon Lolo. Apang ang iya ngalan amo ang magasugid kon sin-o gid sia.
