Magdiretso sa kaundan

Magdiretso sa listahan sang kaundan

Sin-o ang Dios?

Sin-o ang Dios?

 Sin-o ang Dios?

ANO ang imo sabat sa sini nga pamangkot? Ang pila ka tawo nagabatyag nga kilala gid nila ang Dios kag ginakabig sia subong isa ka suod nga abyan. Para naman sa iban, ang Dios daw kaangay sa isa ka malayo nga paryente. Nagapati sila nga may Dios apang diutay lang ang ila nahibaluan parte sa iya. Kon nagapati ka sa Dios, ano ang imo sabat sa masunod nga mga pamangkot?

1. Ang Dios bala isa ka matuod nga persona?

2. May ngalan bala ang Dios?

3. Si Jesus bala ang Labing Gamhanan nga Dios?

4. Nagaulikid bala ang Dios sa akon?

5. Ginabaton bala sang Dios ang tanan nga porma sang pagsimba?

Kon ipamangkot mo ini sa iban, mahimo nga lainlain nga sabat ang imo mabatian. Amo gani nga may madamo karon nga sugilanon kag sala nga paghangop tuhoy sa Dios.

Kon Ngaa Importante Gid ang mga Sabat

Sang nagaistorya sia sa isa ka relihioso nga babayi nga iya nakilala sa bubon, ginpakita ni Jesucristo nga importante gid nga mahibaluan ang kamatuoran tuhoy sa Dios. Nagapati ining Samaritana nga babayi nga si Jesus isa ka propeta. Apang may isa ka butang nga nagatublag sa iya. Ang relihion ni Jesus lain sang sa iya. Sang ginhambal niya ini kay Jesus, prangka sia nga ginsabat ni Jesus: “Nagasimba kamo sa wala ninyo makilala.” (Juan 4:19-22) Makita naton sa sabat ni Jesus nga gintudlo niya nga indi tanan nga relihioso nga tawo matuod gid nga nakakilala sa Dios.

 Buot bala silingon ni Jesus nga wala gid sing bisan isa nga makakilala sa Dios? Indi. Si Jesus nagsiling pa sa babayi: “Ang matuod nga mga sumilimba magasimba sa Amay sa espiritu kag kamatuoran, kay sa pagkamatuod amo sini ang ginapangita sang Amay nga magsimba sa iya.” (Juan 4:23) Isa ka bala sa mga nagasimba sa Dios “sa espiritu kag kamatuoran”?

Importante katama nga mahibaluan mo ang husto nga sabat sa sini nga pamangkot. Ngaa? Sang nangamuyo si Jesus, ginpakita niya nga kinahanglan gid ang sibu nga ihibalo: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Huo, ang imo paglaum nga mabuhi sa palaabuton nagadepende gid sa imo paghibalo sang kamatuoran parte sa Dios!

Posible gid bala nga mahibaluan ang kamatuoran parte sa Dios? Huo, posible gid! Apang paano? Si Jesus nagsiling tuhoy sa iya kaugalingon: “Ako amo ang dalan kag ang kamatuoran kag ang kabuhi. Wala sing makakadto sa Amay kon indi paagi sa akon.” (Juan 14:6) Nagsiling man sia: “Kon sin-o ang Amay, wala sang nakakilala kundi ang Anak, kag sia nga sa iya luyag sang Anak nga ipahayag sia.”—Lucas 10:22.

Gani makilala naton ang Dios paagi sa mga ginatudlo ni Jesucristo, ang Anak sang Dios. Ang matuod, si Jesus nagpromisa sa aton: “Kon padayon kamo nga nagatuman sa akon mga ginatudlo, matuod gid nga kamo akon mga sumulunod. Mahibaluan ninyo ang kamatuoran kag ang kamatuoran amo ang magahilway sa inyo.”—Juan 8:31, 32, ANG PULONG SANG DIOS.

Gani, ano ang sabat ni Jesus sa lima ka pamangkot nga ginsambit kaina?

[Retrato sa pahina 4]

Nagasimba ka bala sa Dios nga wala mo makilala?