Magdiretso sa kaundan

Magdiretso sa listahan sang kaundan

Ngaa ang mga Saksi ni Jehova Wala Nagagamit Sing mga Imahen sa Ila Pagsimba?

Ngaa ang mga Saksi ni Jehova Wala Nagagamit Sing mga Imahen sa Ila Pagsimba?

 Pamangkot sang Amon Bumalasa

Ngaa ang mga Saksi ni Jehova Wala Nagagamit Sing mga Imahen sa Ila Pagsimba?

Sa bug-os nga kalibutan, ang mga Hindu, Budhista, Katoliko, kag mga miembro sang Ortodokso nga Simbahan nagakabig sa mga idolo, imahen, ukon mga larawan subong importante nga bahin sang ila pagsimba. Sa pila ka bahin sang Aprika, ginasimba sang mga tawo ang tinigib nga mga kahoy ukon bato kay nagapati sila nga ginapuy-an ini sang isa ka dios ukon sang espiritu sang isa ka dios.

Sa kabaliskaran, ang mga Saksi ni Jehova wala nagagamit sing bisan ano nga idolo ukon larawan sa ila pagsimba. Kon magkadto ka sa ila tilipunan, nga ginatawag nga Kingdom Hall, wala ka sing makita nga larawan sang “mga santos” ukon mga rebulto ni Jesus kag ni Maria. * Ngaa? Tan-awa kon ano ang ginasiling sang Biblia parte sa sini.

Ano ang Ginsugo sang Dios sa mga Israelinhon?

Pagkatapos sila mahilway sa Egipto, ginhatagan ni Jehova nga Dios sing maathag nga sugo ang mga Israelinhon kon paano sila dapat magsimba sa iya. Ang ikaduha sa Napulo ka Sugo nagasiling: “Dili ka maghimo nga sa imo sing larawan nga tinigban, ukon bisan ano nga kaangay sang bisan anong butang nga yara sa langit sa ibabaw, ukon yara sa duta sa idalum, ukon yara sa tubig sa idalum sang duta; dili ka magyaub sa ila ukon mag-alagad sa ila; kay Ako ang GINOO nga imo Dios maimon nga Dios.”—Exodo 20:4, 5.

Sang ginhatag sang Dios ining mga sugo kay Moises, ang mga Israelinhon naghimo sing bulawan nga tinday nga baka, ayhan bilang pag-ilog sa pagsimba sang mga taga-Egipto sa mga sapat. Wala nila gintawag ang imahen sa ngalan sang isa ka dios sang Egipto. Sa baylo, gingamit nila ini sa pagsimba kay Jehova. (Exodo 32:5, 6) Ano ang reaksion sang Dios? Nagdabdab gid ang iya kaakig sa mga nagsimba sa idolo, amo nga ginguba ini ni Moises.—Exodo 32:9, 10, 19, 20.

Sang ulihi, gindetalye ni Jehova nga Dios ang ikaduha nga sugo. Paagi kay Moises, ginpahanumdom niya ang mga Israelinhon nga indi sila dapat maghimo sing “larawan nga tinigban sa kaangay sang bisan ano nga dagway, ang kaangay sang lalaki ukon babayi, ang kaangay sang bisan ano nga sapat nga yara sa duta, ang kaangay sang bisan ano nga pispis nga pakpakan nga nagalupad sa mga langit, ang kaangay sang bisan ano nga sapat nga nagasaug sa duta, ang kaangay sang bisan ano nga isda nga yara sa tubig sa idalum sang duta.” (Deuteronomio 4:15-18) Maathag nga ang mga Israelinhon indi dapat maggamit sing bisan ano nga idolo ukon larawan sa pagsimba sa Dios.

Wala sapayan sini, ang Israel nagsimba gihapon sa mga idolo sang ulihi. Gani, nagpadala si Jehova sing mga propeta agod tadlungon sila kag paandaman sang manug-abot nga silot bangod sa ila pagsimba sa mga idolo. (Jeremias 19:3-5; Amos 2:8) Apang ang bug-os nga pungsod sang Israel wala nagsapak sa paandam sang Dios. Bangod sini, sang 607 B.C.E., gintugutan ni Jehova ang mga Babilonianhon nga salakayon ang Jerusalem kag bihagon ang pungsod.—2 Cronica 36:20, 21; Jeremias 25:11, 12.

 Ano ang Ginpatihan sang Unang Siglo nga mga Cristiano?

Sang nangin Cristiano ang indi Judiyo nga mga tawo sang unang siglo, nag-untat na sila sa paggamit sing mga idolo sa ila pagsimba sa Dios. Talupangda ang ginsiling ni Demetrio, ang platero nga nagahimo sing mga idolo sa Efeso, sa pagwali ni apostol Pablo: “Mga lalaki, nakahibalo gid kamo nga nagtin-ad kita bangod sini nga negosyo. Subong man, nakita kag nabatian ninyo indi lamang sa Efeso kundi halos sa bug-os nga distrito sang Asia nga ginbuyok sini nga Pablo ang daku nga kadam-an kag ginpaliso sila sa tuhay nga pagpati, nga nagasiling nga ang mga dios nga ginhimo sang mga kamot indi mga dios.”—Binuhatan 19:25, 26.

Ang ginsiling mismo ni Pablo nagapamatuod sa panumbungon ni Demetrio. Sang nagapamulongpulong sia sa mga Griego sa Atenas, si Pablo nagsiling: “Indi naton dapat paghunahunaon nga ang Dios kaangay sa bulawan ukon pilak ukon bato, kaangay sa isa ka butang nga gintigib paagi sa kalantip kag pagkamapahituon sang tawo. Matuod, ginpaligad sang Dios ang mga tion nga wala sing nahibaluan ang mga tawo, apang karon nagasiling sia sa katawhan bisan diin nga sila tanan dapat maghinulsol.” (Binuhatan 17:29, 30) Si Pablo nagsulat sa Tesalonica parte sa sini man nga topiko kag ginhatagan sila sing komendasyon: “Kamo nagliso sa Dios gikan sa inyo mga idolo.”—1 Tesalonica 1:9.

Luwas kay Pablo, nagpaandam man si apostol Juan sa mga Cristiano batok sa paggamit sang mga imahen sa ila pagsimba. Sa katapusan nga bahin sang unang siglo, malig-on sila nga ginsilingan ni Juan: “Magbantay kamo batok sa mga idolo.”—1 Juan 5:21.

Ginatuman sang mga Saksi ni Jehova ang maathag nga sugo sang Dios nga indi maggamit sing bisan ano nga imahen sa pagsimba sa iya. Ginasunod nila ang ginsiling mismo ni Jehova: “Ako si Jehova. Ina amo ang akon ngalan; kag indi ko pag-ihatag sa iban ang akon himaya, ukon ang akon kadayawan sa mga larawan nga tinigban.”—Isaias 42:8, NW.

[Nota]

^ par. 4 May mga Kingdom Hall nga nagadispley sang mga painting sang mga tawo nga ginsambit sa Biblia. Apang, ining mga larawan ginagamit lamang subong dekorasyon kag wala ginasimba nga pareho sang relihioso nga mga larawan. Ang mga Saksi ni Jehova wala nagapangamuyo ukon nagayaub sa sini nga mga larawan.

[Blurb sa pahina 31]

“Ako si Jehova. Ina amo ang akon ngalan; kag indi ko pag-ihatag sa iban ang akon himaya, ukon ang akon kadayawan sa mga larawan nga tinigban.” —Isaias 42:8, NW.