Magdiretso sa kaundan

Magdiretso sa listahan sang kaundan

Ang Dios Bala Isa Ka Matuod nga Persona?

Ang Dios Bala Isa Ka Matuod nga Persona?

 Ang Dios Bala Isa ka Matuod nga Persona?

Kinaandan nga mga sabat:

▪ “Ang Dios yara bisan diin. Daw pareho sia sang hangin.”

▪ “Kaalam sia nga indi matungkad ukon gamhanan nga puersa.”

Ano ang ginsiling ni Jesus?

▪ “Sa balay sang akon Amay may madamo nga puluy-an.” (Juan 14:2) Si Jesus nagsiling nga ang Dios may malaragwayon nga balay, ukon puluy-an.

▪ “Naggikan ako sa Amay kag nagkari sa kalibutan. Dugang pa, magabiya ako sa kalibutan kag makadto sa Amay.” (Juan 16:28) Si Jesus nagapati nga ang Dios isa ka matuod nga Persona nga nagaistar sa isa ka espesipiko nga lugar.

WALA gintudlo ni Jesus nga ang Dios isa lamang ka gamhanan nga puersa. Sa baylo, nakighambal sia sa Dios kag nangamuyo sa iya. Pirme niya gintawag si Jehova subong iya langitnon nga Amay, isa ka termino nga nagapakita nga suod ang iya kaangtanan sa Dios.—Juan 8:19, 38, 54.

Matuod nga “wala gid sing tawo nga nakakita sa Dios sa bisan ano nga tion,” kay “ang Dios Espiritu.” (Juan 1:18; 4:24) Apang wala ini nagapahangop nga wala sia sing lawas. Ang Biblia nagasiling sa aton: “Kon may pisikal nga lawas, may espirituwal man.” (1 Corinto 15:44) Gani, si Jehova bala may lawas nga espiritu?

Huo. Sang ginbanhaw si Jesus, “nagsulod [sia] . . . sa langit mismo, agod mag-atubang sa Dios mismo para sa aton.” (Hebreo 9:24) Ginatudlo sini sa aton ang duha ka importante nga kamatuoran tuhoy sa Dios. Una, may puluy-an sia. Ikaduha, isa sia ka Persona, kag indi lamang isa ka gamhanan nga puersa nga yara bisan diin.

Apang, paano makontrol sang Dios ang mga butang sa bisan diin nga lugar? Puede ipadala sang Dios ang iya balaan nga espiritu, ukon aktibo nga gahom, sa bisan diin nga lugar sa uniberso. Sa pag-ilustrar: Ang planta sang koryente nga nahamtang sa isa ka lokasyon sarang makahatag sing koryente sa madamo nga lugar. Sing kaanggid, ang Dios makapadala man sang iya balaan nga espiritu gikan sa iya nahamtangan agod matuman ang iya katuyuan.—Salmo 104:30; 139:7.

Bangod ang Dios isa ka Persona, may personalidad man sia kag may mga butang nga naluyagan kag wala naluyagan. May balatyagon man sia. Ang Biblia nagasugid sa aton nga ginahigugma sang Dios ang mga nagasimba sa iya, nalipay sia sa iya mga hinimuan, ginadumtan niya ang pagsimba sa mga imahen, kag nagakalisod sia sa mga malain nga nagakatabo. (Genesis 6:6; Deuteronomio 16:22; 1 Hari 10:9; Salmo 104:31) Sa 1 Timoteo 1:11, ginatawag sia nga “malipayon nga Dios.” Amo gani nga nagsiling si Jesus nga matun-an naton nga higugmaon ang Dios sing bug-os tagipusuon!—Marcos 12:30. *

[Nota]

^ par. 12 Para sa dugang pa nga impormasyon tuhoy sini nga topiko, tan-awa ang kapitulo 1 sang libro nga Ano Gid ang Ginatudlo Sang Biblia? nga ginabalhag sang mga Saksi ni Jehova.