Magdiretso sa kaundan

Magdiretso sa listahan sang kaundan

Si Jesus Bala ang Labing Gamhanan nga Dios?

Si Jesus Bala ang Labing Gamhanan nga Dios?

 Si Jesus Bala ang Labing Gamhanan nga Dios?

Kinaandan nga mga sabat:

▪ “Huo, si Jesus ang Labing Gamhanan nga Dios.”

▪ “Si Jesus Dios nga nagpakatawo.”

Ano ang ginsiling ni Jesus?

▪ “Kon ginahigugma gid ninyo ako, magakasadya kamo nga makadto ako sa Amay, bangod ang Amay daku pa sa akon.” (Juan 14:28) Ginpakita ni Jesus nga indi sia tupong sa iya Amay.

▪ “Magakayab ako sa akon Amay kag inyo Amay kag sa akon Dios kag inyo Dios.” (Juan 20:17) Wala nagsiling si Jesus nga sia ang Dios kundi nagsiling sia nga lain nga Persona ang Dios.

▪ “Wala ako naghambal gikan sa akon lamang kaugalingon, kundi ang Amay nga nagpadala sa akon nagsugo sa akon kon ano ang isiling kag kon ano ang ihambal.” (Juan 12:49) Ang mga gintudlo ni Jesus wala naghalin sa iya kaugalingon; naghalin ini sa iya Amay.

SI Jesus nagsiling nga sia ang Anak sang Dios, indi ang Labing Gamhanan nga Dios. Kon si Jesus amo ang Dios, kay sin-o sia nangamuyo sang yari sia sa duta? (Mateo 14:23; 26:26-29) Sigurado gid nga wala sia nagapakunokuno nga nagaistorya sa iban!

Sang ginpangabay si Jesus sang iya mga disipulo nga hatagan sila sing pinasahi nga posisyon sa iya Ginharian, nagsabat si Jesus: “Ining paglingkod sa akon tuo kag sa akon wala indi ako ang magahatag, kundi ila ini sang mga gin-amanan sini sang akon Amay.” (Mateo 20:23) Nagabinutig bala si Jesus sa ila sang nagsiling sia nga wala sia sing awtoridad sa paghatag sang ila ginapangabay? Wala gid! Sa baylo, mapainubuson niya nga ginkilala nga Dios lamang ang may awtoridad sa paghimo sini nga desisyon. Ginpaathag pa gani ni Jesus nga may mga butang nga wala niya nahibaluan, kag bisan ang mga anghel wala man nakahibalo, kundi ang iya Amay lamang.—Marcos 13:32.

Matuod bala nga si Jesus nangin kubos sa Dios sa tion lang nga yari sia sa duta subong tawo? Indi. Bisan sang napatay na sia kag nabanhaw, ginlaragway sa Biblia si Jesus nga kubos gihapon sa Dios. Si apostol Pablo nagpahanumdom sa aton nga “ang Dios supremo kay Cristo.” (1 Corinto 11:3, Today’s English Version) Ang Biblia nagsiling nga sa palaabuton, “kon mabutang na ang tanan sa idalom sang paggahom ni Cristo, ti, ang Anak mismo magapasakop sang iya kaugalingon sa Dios nga nagbutang sang tanan sa idalom niya. Dayon ang Dios magagahom sing bug-os sa tanan.”—1 Corinto 15:28, Maayong Balita nga Biblia.

Maathag nga indi si Jesus ang Labing Gamhanan nga Dios. Amo sina ang rason kon ngaa gintawag niya ang iya Amay subong ang “akon Dios.”—Bugna 3:2, 12; 2 Corinto 1:3, 4. *

[Nota]

^ par. 12 Para sa dugang pa nga impormasyon tuhoy sini nga topiko, tan-awa ang pahina 201-204 sang libro nga Ano Gid ang Ginatudlo Sang Biblia? nga ginabalhag sang mga Saksi ni Jehova.

[Blurb sa pahina 7]

Ginsiling ni Jesus nga may mga butang nga wala niya nahibaluan, kag bisan ang mga anghel wala man nakahibalo, kundi ang iya Amay lamang