Madumduman Mo Bala?

Ginaapresyar mo bala ang pagbasa sang bag-o nga mga isyu sang Ang Lalantawan? Ti, tan-awa kon masabat mo ang masunod nga mga pamangkot:

• Ngaa makapat-od kita nga ang katumanan sang tagna sa “bag-ong mga langit kag bag-ong duta” sa Isaias 65:17-19 wala lamang nagadalahig sang pagbalik sang mga Judiyo gikan sa pagkabihag?

Bangod sanday apostol Pedro kag Juan, sang nagsulat sang unang siglo C.E., nagtudlo sa isa ka palaabuton nga katumanan, nga nagalakip sang mga pagpakamaayo nga magaabot pa. (2 Pedro 3:13; Bugna 21:1-4)—4/15, pahina 10-12.

• Ano ang mahimo basihan sang dumaan nga Griegong mga mito tuhoy sa masingki nga mga dios-tawo?

Mahimo nga mga pagpatahom kag mga pagpatalang ini sang kamatuoran nga antes sang Anaw ang pila ka anghel nagpakatawo kag nagkabuhi sing masingki kag imoral sa duta. (Genesis 6:1, 2)—4/15, pahina 27.

• Ano ang pila ka katalagman nga dapat bantayan sang hamtong nga mga Cristiano sa mga kasal?

Importante nga likawan ang magahod nga kinalipay, nga mahimo matabo kon ang alkohol wala sing limite kag may magarot nga sinaot sa matunog nga musika. Magluwas kon maathag nga ang sinalusalo bukas para sa tanan, ang mga wala gin-agda indi dapat magtambong. Dapat pat-uron sang nobyo nga may masaligan nga mga Cristiano tubtob matapos ang selebrasyon sa rasonable nga oras.—5/1, pahina 19-22.

• Ano ang ginapanugyan sa pagsambit sang Salmo 128:3 sang mga anak nga lalaki nga “subong sang mga singil sang kahoy nga olivo” sa palibot sang lamesa sang isa ka tawo?

Masami nga ang ­bag-o nga mga singil nagatubo sa puno sang kahoy nga olivo. Kon ang puno sang tigulang nga kahoy wala na nagapamunga sing maayo, ang ­bag-o nga mga singil mangin daku nga mga kahoy sa palibot sini. Sing kaanggid, ang mga ginikanan sarang magkalipay nga may nagapamunga nga kabataan sa pag-alagad kay Jehova upod sa ila.—5/15, pahina 27.

• Ano ang pila ka benepisyo nga makuha sang kabataan gikan sa makapalig-on nga kahimtangan sa pamilya?

Nagapahamtang ini sing sadsaran para sa ila maayo nga pagtamod sa awtoridad, apresasyon sa nagakaigo nga mga kinaiya, kag malipayon nga mga kaangtanan sa iban. Ina nga kahimtangan makabulig man sa ila sa pagpalambo sang pagpakig-abyan sa Dios.—6/1, pahina 18.

• Sa isa ka pungsod sa Malayo nga Sidlangan, ano ang ginhimo agod palig-unon ang ideya nga ang tanan nga Cristiano mag-ulutod?

Ang tanan nga kongregasyon ginpalig-on nga indi pagtawgon ang iban sing nagapadungog nga mga termino. Sa baylo, ang tanan dapat tawgon sing alangay subong mga utod.—6/15, pahina 21, 22.

• Nagabaton bala ang mga Saksi ni Jehova sing mga bulong nga ginkuha sa dugo?

Nagapati kami nga ang sugo sang Biblia nga ‘maglihi sa dugo’ nagalakip sang pagpatayon sang puro nga dugo ukon sang panguna nga mga elemento sini (plasma, pula nga mga selula, puti nga mga selula, kag mga ­platelet). (Binuhatan 15:28, 29) Kon tuhoy sa mga bahin gikan sa panguna nga mga elemento sang dugo, ang tagsa ka Cristiano magapamat-od sing personal, nagahunahuna kon ano ang ginasiling sang Biblia kag ang iya kaangtanan sa Dios.—6/15, pahina 29-31.

• Posible bala nga makasapo sang kalinong sa kaugalingon karon?

Huo. Paagi sa Biblia, si Jesucristo nagatuytoy sa mga tawo sa dalanon sang matuod nga pagsimba kag sa kalinong nga ginalaragway sa Isaias 32:18. Dugang pa, yadtong nagatigayon sina nga kalinong may paglaum nga makatigayon sing mapinadayunon nga kalinong sa duta sa katumanan sang Salmo 37:11, 29.—7/1, pahina 7.

• Ano ang papel ni George Young sa modernong teokratikong kasaysayan?

Sugod sang 1917, nangin manugdala sia sang kapawa sang maayong balita sang Ginharian sa madamo nga kadutaan. Ang iya ministeryo naglakip sa bug-os nga Canada, sa mga isla sang Caribbean, sa Brazil kag sa iban nga mga pungsod sang Bagatnan nga Amerika, sa Sentral nga Amerika, sa Espanya, sa Portugal, sa ginatawag anay nga Unyon Sobyet, kag sa Estados Unidos.—7/1, pahina 22-7.

• Ano ang buot silingon sang 1 Corinto 15:29 sang naghambal ini sa pila nga “ginbawtismuhan sa tuyo nga mangin mga patay”?

Ang punto amo nga kon ang mga Cristiano ginhaplas sang balaan nga espiritu, ginbawtismuhan sila sa dalanon sang kabuhi nga magadul-ong sa ila kamatayon kag pagkabanhaw sa langitnon nga pagkabuhi.—7/15, pahina 17.

• Ano ang ginhimo ni apostol Pablo sa ginpatuhuyan subong wala niya batia nga mga tinuig?

Mahimo nga nagbulig sia sa pagtukod ukon sa pagpalig-on sang mga kongregasyon sa Siria kag Cilicia. Madamo sang mga kabudlayan nga ginsambit sa 2 Corinto 11:23-27 ang mahimo natabo sa sadto nga tion, nagapakita nga aktibo sia sa ministeryo.—7/15, pahina 26, 27.

• Ano ang makabulig sa aton nga mangin makatarunganon sa aton mga ginapaabot?

Dumduma nga si Jehova mahinangpanon. Makabulig sa aton ang pagpangamuyo sa iya nga mabalanse ang aton panghunahuna, kag nagapakita ini sing pagkaugdang. Ang dugang nga bulig amo ang pagtigayon sing ­bag-o nga pagtamod paagi sa pagpakighambal upod sa hamtong nga abyan.—8/1, pahina 29, 30.