1-3. Yezu ye mun lo kɛ tuma min na a y’a ye ko mɔgɔw tun be koo bɛnbaliw kɛra Alabatosoba kɔnɔ?

 ALABATOSOBA min tun be Zeruzalɛmu, Yezu tun be bonyaba la o kan sabu a tun b’a lɔn o batosoba be yen kuun min kama. Kabi wagatijan, mɔgɔw tun be tiɲɛn batoli kɛ o yɔrɔ lo la. O batoli min be lase Ala senuman Jehova ma, o ka kan ka saniya. Yezu nana Alabatosoba kɔnɔ saan 33, Nisankalo tile 10nan loon, ani a y’a ye ko mɔgɔw tun be koo bɛnbaliw kɛra a kɔnɔ. Miiri k’a filɛ, o ye min kɛ a la! Mɔgɔw tun be mun lo kɛra tigitigi?—Matiyo 21:12, 13 kalan.

² Yɔrɔ dɔ tun be yen Alabatosoba kɔnɔ min be weele ko siya wɛrɛ mɔgɔw ka lukɛnɛ. Jehova sagokɛla minw tun be na saraka bɔ a ye, jagokɛlaw ani warifalenbaga natabaw tun be olu nanbara o yɔrɔ la. a Yezu ye “feerekɛlaw, ni sannikɛlaw gwɛn ka bɔ yen, ka warifalenbagaw ka tabaliw . . . ɲɔnti k’u benben duguma.” (Neemi 13:​7-9 lajɛ). Yezu ko o cɛɛ natabaw ye a Faa ka soo kɛ “soonw ka yɔrɔ ye.” O cogo la, Yezu y’a yira ko a be bonya la Alabatosoba kan ani batoli senuman min be kɛ yen. Batoli min be lase a Faa ma, o saniyanin ka ɲi ka to!

³ Saan kɛmɛkulu caaman Yezu siginin kɔ masaya la, a ye Alabatosoba dɔ saniya tugun. Bi, minw b’a fɛ ka Jehova bato i ko a b’a fɛ cogo min na, o saniyali koo ɲɛsinna olu bɛɛ ma. Yezu ye Alabatosoba juman lo saniya?

4, 5. a) Saan 1914 ka taga se saan 1919 daminɛ na, Yezu ye kerecɛn mɔlenw saniya cogo di? b) Yala Ala ka mɔgɔw saniyali banna o wagati lo la wa? A ɲɛfɔ.

⁴ Yezu siginin kɔ masaya la saan 1914, ale ni a Faa nana walisa ka Alabatosoba sɛgɛsɛgɛ. An y’o lo ye gafe nin sapitiri filanan na. O Alabatosoba ye labɛnw ye, Ala ye minw bila sen kan batoli senuman kama. b O sɛgɛsɛgɛri sen fɛ, Masacɛ Yezu y’a ye ko “Levi kɔmɔgɔw,” o kɔrɔ kerecɛn mɔlenw, ka ɲi ka saniya (Mal. 3:​1-3). Saan 1914 ka taga se saan 1919 daminɛ na, Jehova y’a to a sagokɛlaw ye gwɛlɛyaw ni kɔrɔbɔli caaman sɔrɔ walisa k’u saniya. Ninsɔndiya lo k’a lɔn ko o kerecɛn mɔlenw tora kantigiya la ani u saniyara o  kɔrɔbɔlibaw sen fɛ! U tun kɔrɔtɔnin lo fana ka Masacɛ Yezu Krista dɛmɛ!

⁵ Yala Ala ka mɔgɔw saniyali banna o wagati lo la wa? Ayi. Laban wagati kuru bɛɛ la, Jehova bele be tɛmɛ Masacɛ Yezu Krista fɛ k’a sagokɛlaw saniya janko u ka se ka to ale batosoba kɔnɔ. Sapitiri fila nɔfɛtaw la, an bena a ye cogo min na Jehova ye u saniya tagamacogo ta fan fɛ ani k’u dɛmɛ k’a ka ɔriganisasiyɔn ka koow labɛn koɲuman. An k’a filɛ fɔlɔ a y’u saniya cogo min na Alako ta fan fɛ. Yezu ye koo caaman kɛ walisa k’a ka kalandenw saniya Alako ta fan fɛ. Tiɲɛn lo ko o koo dɔw kɛra an ɲina ma. Nka an be minw lɔn, n’an miirila koɲuman olu la, o bena an ka limaniya barika bonya.

6. Yahutuw bɔtɔ jɔnya la, Jehova ye cikan minw di u ma, o b’an dɛmɛ ka mun lo faamu saniyali koo la Alako ta fan fɛ?

⁶ Ka Saniya Alako ta fan fɛ, o kɔrɔ ko di? Walisa k’o ɲiningali jaabi, an k’a filɛ Jehova ye min fɔ Yahutuw ye tuma min na u tun be labɛnna ka bɔ jɔnya la Babilɔni. O kɛra saan kɛmɛkulu 6nan na ka kɔn Krista tile ɲɛ (Ezayi 52:11 k alan). U tun be kɔsegira Zeruzalɛmu kuun fɔlɔ min kama, o tun ye ka segi ka Alabatosoba lɔ ani ka tiɲɛn batoli sigi sen kan kokura (Ɛsid. 1:​2-4). Jehova tun t’a fɛ a sagokɛlaw ka Babilɔnikaw ka batoliko si kɛ. O lo kama, a tun ye cikan dɔw di u ma i n’a fɔ: “Aw kana maga fɛɛn nɔgɔnin si la,” “aw ye bɔ a kɔnɔ” ani “k’aw yɛrɛ saniya.” An man ɲi ka tiɲɛn batoli ɲagami ni ngalon alaw batoli ye. O koo b’an dɛmɛ ka mun lo faamu? Ka saniya Alako ta fan fɛ, o kɔrɔ ko k’an yɛrɛ tanga ngalon diinanw ka kalanw n’u ka kɛwalew ma.

7. Yezu be tɛmɛ fɛɛrɛ juman lo fɛ k’a ka kalandenw dɛmɛ walisa u ka saniya Alako ta fan fɛ?

⁷ Dɔɔni Yezu siginin kɔ masaya la, a tun gwɛnin lo ko a ye fɛɛrɛ dɔ bila sen kan. A tun bena tɛmɛ o fɛɛrɛ lo fɛ k’a ka kalandenw dɛmɛ u ka saniya Alako ta fan fɛ. O fɛɛrɛ ye jɔncɛ kantigiman hakiliman lo ye, Yezu ye min sigi saan 1919 (Mat. 24:45). O wagati la, Bibulu Kalandenw tun banna ngalon diinanw ka kalan caaman na ka ban. Nka, u bele tun ka ɲi k’u yɛrɛ saniya Alako ta fan fɛ. Krista tɛmɛna a ka jɔncɛ kantigiman fɛ k’a ka kalandenw dɛmɛ dɔɔni dɔɔni u ye faamuyali sɔrɔ fɛtiw ni kɛwale caaman koo la, u tun ka ɲi ka minw dabila (Talenw 4:​18). An k’u dɔw lajɛ.

8. Kabi wagatijan, Bibulu Kalandenw tun be mun lo lɔn nowɛli fɛti koo la? Nka, u m’a faamu ko u tun ka ɲi ka mun lo kɛ?

⁸ Kabi wagatijan, Bibulu Kalandenw tun b’a lɔn ko nowɛli fɛti bɔra kafiriyakow lo la ani ko Yezu ma wolo desanburu tile 25nan loon na. A tun fɔra saan 1881, desanburukalo ka Kɔrɔsili Sangaso kɔnɔ (angilikan na) ko: “Kafiri miliyɔn caaman kɛra kerecɛnw ye. Nka, o yɛlɛmani tun ye tɔgɔ dama lo ye sabu kafiriw ka sarakalasebagaw kɛra kerecɛnw ka sarakalasebagaw ye, ani kafiriw ka fɛtiw kɛra kerecɛnw ka  fɛtiw ye. Nowɛli ye o fɛtiw dɔ ye.” Saan 1883, Kɔrɔsili Sangaso dɔ kuun tun ye ko: “Yezu wolola tuma juman?” A tun ɲɛfɔra a kɔnɔ ko Yezu wolola ɔkutɔburukalo daminɛ fan fɛ. c Nka, an tun m’a faamu ka gwɛ ko a kɔrɔtanin lo an kana nowɛli fɛti kɛ tugun. Buruklini Betɛli ka denbayamɔgɔw yɛrɛ tora k’o fɛti kɛ. Nka, saan 1926 kɔ, koow y’a daminɛ ka yɛlɛma. Mun na do?

9. Bibulu Kalandenw nana mun lo faamu nowɛli fɛti koo la?

⁹ Bibulu Kalandenw ye sɛgɛsɛgɛri kɛ koɲuman nowɛli fɛti koo la ani u nan’a faamu k’o fɛti bɔyɔrɔ ani koo minw be kɛ a sen fɛ, u be Ala tɔgɔ tiɲɛ le. Saan 1927, desanburukalo tile 14nan ka L’Âge d’Or kɔnɔ, barokun nin tun be yen: “Nowɛli fɛti bɔyɔrɔ.” A tun fɔra o barokun kɔnɔ ko nowɛli ye kafiriw ka fɛti dɔ lo ye, a be sinsin ɲɛnagwɛkow lo kan ani mɔgɔ be boliw bato o fɛti sen fɛ. A tun ɲɛfɔra fana o barokun kɔnɔ ka gwɛ ko Krista m’a ɲini an fɛ an k’o fɛti kɛ. O barokun kuncɛra nin cogo la ko: “Duniɲamɔgɔw ni Sutana t’a fɛ nowɛli fɛti ka dabila ani farisogo negelakow lo be kɛ o fɛti sen fɛ. . . O kama, mɔgɔ minw be Jehova sago kɛ n’u dusu bɛɛ ye, olu man ɲi k’o fɛti kɛ.” O kuncɛli kumaw tun gwɛnin lo yɛrɛ le! A tɛ bari an na ko Betɛli denbayamɔgɔw ma nowɛli fɛti kɛ o saan na ani u yɛrɛ m’a kɛ tugun pewu!

10. a) Saan 1928 desanburukalo la, an ye ɲɛfɔli jumanw lo sɔrɔ nowɛli fɛti koo la minw gwɛnin lo? (koorilen nin fana lajɛ: “ Nowɛli fɛti bɔyɔrɔ n’a kuun”). b) Mun lo fɔra Ala sagokɛlaw ye fɛti wɛrɛw koo la u man ɲi ka minw kɛ? (koorilen nin lajɛ: “ An man ɲi ka fɛti wɛrɛ minw kɛ).

¹⁰ Saan 1928, Bibulu Kalandenw ye ɲɛfɔli wɛrɛw sɔrɔ minw gwɛnin lo nowɛli fɛti koo la. Desanburukalo tile 12nan na, balimacɛ Richard Barber, min tun be an ka sigiyɔrɔsoba  la, ale ye kalan dɔ kɛ arajo la. O kalan na, a y’a yira ka gwɛ nowɛli fɛti bɔra yɔrɔ min na. An ka sigiyɔrɔsoba balimaw ye cikan minw di, Ala sagokɛlaw y’o ta cogo di? Balimacɛ Charles Brandlein hakili b’a la min kɛra tuma min na ale n’a ka denbayamɔgɔw ye nowɛli fɛti kɛli dabila. A ko: “Yala a gwɛlɛyara an ma ka o kafiriya fɛti dabila wa? A ma gwɛlɛya an ma fewu! . . . A kɛra komi an ye fani nɔgɔninba dɔ lo bɔ an kaan na k’a fili.” Balimacɛ Henry Cantwell, min kɛra kɔrɔsibaga tagamakɛla ye kɔfɛ, ale tun be n’o miiriya kelen lo ye. A ko: “An ninsɔn diyara ka fɛɛn dɔw to yen walisa k’a yira Jehova la ko an b’a kanu.” Krista ka kalanden kantigiw tun labɛnnin lo ka yɛlɛmaniw kɛ walisa u kana u seen don fɛti si la min bɔra kafiriyakow la. d—Zan 15:19; 17:14.

11. An be se k’a yira cogo di ko an be sɔn an ka Masacɛ Masiya ka fɔta ma?

¹¹ O Bibulu Kalanden kantigiw ye ɲɛyirali ɲumanw ye yɛrɛ le an fɛ! Walisa k’u ladegi, an ka ɲi k’an yɛrɛ ɲininga ko: “N’ be jɔncɛ kantigiman hakiliman ka cikanw ta cogo di? Yala n’ b’a waleɲuman lɔn o cikanw kosɔn ani n’ b’o cikanw sira tagama wa?” N’an b’o kɛ, an b’a yira ko an be sɔn Masacɛ Masiya ka fɔta ma sabu a be tɛmɛ jɔncɛ kantigiman lo fɛ ka dumuni di an ma Alako ta fan fɛ wagati bɛnnin na.—Kɛw 16:4, 5.

12. Saan caaman kɔnɔ, Bibulu Kalandenw tun be kuruwa jati cogo di?

¹² Saan caaman kɔnɔ, Bibulu Kalandenw tun b’a jati ko kuruwa ye tagamasiɲɛ ye min bɛnnin lo kerecɛnw fɛ. Nka, u  tun t’a jati ko mɔgɔ ka ɲi ka kuruwa bato, sabu u tun b’a lɔn ko boli batoli ye koo jugu lo ye (1 Kor. 10:14; 1 Zan 5:21). Kabi saan 1883, a tun fɔra Kɔrɔsili Sangaso kɔnɔ ka gwɛ ko “boli batoli sifa bɛɛ koo ka gwo Ala ye.” Nka a daminɛ na, Bibulu Kalandenw tun b’a miiri ko mɔgɔ be se ka baara kɛ ni kuruwa ye cogo bɛnnin dɔw la. Misali la, a tun ka di u ye ka tagamasiɲɛ dɔ dulon u ka fani na, kuruwa ni masafugulan jaa tun be min kan. Olu fɛ, o tagamasiɲɛ kɔrɔ tun ko n’u tora kantigiya la fɔɔ ka taga se saya ma, u bena ɲɛnamaya masafugulan sɔrɔ. K’a ta saan 1891, o tagamasiɲɛ tora ka bɔ Kɔrɔsili Sangaso ɲɛɛ fɔlɔ kan.

13. Krista ka kalandenw ye mun lo faamu kuruwa koo la? (koorilen nin lajɛ: “ U ye faamuyali sɔrɔ dɔɔni dɔɔni kuruwa koo la”).

¹³ Kuruwa ni masafugulan tagamasiɲɛ koo tun ka di Bibulu Kalandenw ye kosɔbɛ. Nka, k’a ta saan 1928 fan fɛ, Krista ka kalandenw ye faamuyali sɔrɔ dɔɔni dɔɔni kuruwa koo la. Lajɛnba dɔ kɛra saan 1928 Deturuwa duga la, Misigan mara la Etazini ani balimacɛ Grant Suiter tun b’o lajɛnba la. Kɔfɛ, a kɛra Koow Ɲɛnabɔla Jɛnkulu mɔgɔ dɔ ye. O balimacɛ miirila o lajɛnba koo la ani a ko: “O lajɛnba la, u y’a ɲɛfɔ ko nafa tɛ kuruwa la ani ko a yɛrɛ bɛnnin tɛ.” Saan minw tugura o kɔ, ɲɛfɔli wɛrɛw kɛra o koo la. A tun gwɛnin lo ko an man ɲi ka baara kɛ fewu ni kuruwa ye tiɲɛn batoli la!

14. Ala sagokɛlaw tora ka faamuyali sɔrɔ dɔɔni dɔɔni kuruwa koo la minkɛ, u ye mun lo kɛ?

¹⁴ Ala sagokɛlaw tora ka faamuyali sɔrɔ dɔɔni dɔɔni kuruwa koo la minkɛ, u ye mun lo kɛ? Kuruwa ni masafugulan tagamasiɲɛ koo tun ka gwɛlɛ u ma kosɔbɛ. Yala u bele tora ka baara kɛ n’o tagamasiɲɛ ye wa? Balimamuso Lela Roberts be Jehova sago kɛra kabi wagatijan ani a ko: “Tuma min na an y’a faamu kuruwa kɔrɔ ye min ye, a ma gwɛlɛya an ma k’a ye k’a to yen.” Ursula Serenco ye balimamuso kantigi wɛrɛ ye ani mɔgɔ caaman tun be min miiri, a y’o fɔ ko: “An y’a faamu ko tagamasiɲɛ min koo tun ka di an ye kosɔbɛ ani an tun b’a jati an Matigi ka saya ani an ka kantigiya tagamasiɲɛ ye, o tun tɛ fɛɛn wɛrɛ ye kafiriw ka tagamasiɲɛ kɔ. Ka kɛɲɛ ni Talenw 4:​18 ye, an be Ala waleɲuman lɔn sabu a ye dɔ fara an ka faamuyali kan.” Krista ka kalanden kantigiw tun t’a fɛ ka ngalon diinanw ka koo nɔgɔnin si kɛ!

15, 16. Alabatosoba lukɛnɛ min be dugukolo kan, an be se k’a yira cogo di ko an cɛsirinin lo o saniyanin ka to?

¹⁵ Bi, an fana cɛsirinin lo o cogo kelen na walisa Jehova batoli saniyanin ka to. A gwɛnin lo ko Krista be tɛmɛ jɔncɛ kantigiman lo fɛ walisa k’a ka kalandenw dɛmɛ u saniyanin ka to Alako ta fan fɛ. O la, ni jɔncɛ kantigiman y’an lasɔmi a ka kalanw fɛ ko fɛti dɔw wala landako dɔw bɔra ngalon diinan na, an be sin k’u dabila. Alabatosoba lukɛnɛ min be dugukolo kan, an cɛsirinin lo o saniyanin ka to i ko an balimaw y’a kɛ cogo min na Krista sigituma na masaya la.

¹⁶ Laban loon nunu na, Krista be koo dɔw kɛra fana an  ɲɛɛ tɛ minw na walisa ka kafow latanga. Mɔgɔ minw b’a ɲinina ka Jehova sagokɛlaw ka batoli senuman nɔgɔ, a b’an latanga olu ma. A b’o kɛra cogo di? An k’o lajɛ.

17, 18. Kuma nunu kɔrɔ ko di: a) Ka jɔɔ fili baji la, b) “Ka jigɛ sifa bɛɛ minɛ,” c) “Jigɛ minw ka ɲi, a ye olu kɛ minan kɔnɔ”, ani d) “Jigɛ minw ma ɲi, a ye olu fili”?

¹⁷ An ka Masacɛ Yezu Krista be a jantora Ala ka mɔgɔw la dugukolo kuru bɛɛ kan. Hali n’an t’o yera bɛrɛbɛrɛ, Krista ni mɛlɛkɛw be mɔgɔjuguw wolomana k’u bɔ mɔgɔɲumanw na. Yezu y’a ɲɛfɔ o baara be kɛ cogo min na a ka ntalen dɔ la. A y’o ntalen la jɛgɛminɛjɔ koo la (Matiyo 13:47-50 kalan). O ntalen kɔrɔ ko di?

¹⁸ Ka “jɔɔ . . . fili baji la”: Jɔɔ ye Masaya waajuli baara lo ye ani baji ye adamadenw ye. “Ka jigɛ sifa bɛɛ minɛ”: Kibaro diiman ka di mɔgɔ sifa bɛɛ ye. Dɔw be yɛlɛmaniw kɛ walisa ka kɛ kerecɛn sɔbɛw ye, ani caaman be u mako don dɔɔni a daminɛ na nka u t’a latigɛ ka sɔn batoli senuman ma. e “Jigɛ minw ka ɲi, a ye olu kɛ minan kɔnɔ”: Mɔgɔ kɔnɔgwɛw be lajɛnna kafow kɔnɔ ani u be batoli senuman lasera Jehova ma yen. “Jigɛ minw ma ɲi, a ye olu fili”: Laban loonw na, Krista ni mɛlɛkɛw be ‘mɔgɔjuguw wolomana k’u bɔ mɔgɔɲumanw na.’ f O la, minw tɛ mɔgɔ kɔnɔgwɛw ye, olu tɛ kafo nɔgɔ. Misali la, u dɔw tɛ sɔn ka ngalon lannakow ni kɛwale juguw dabila. g

19. Krista be min kɛra walisa Ala sagokɛlaw ani tiɲɛn batoli saniyanin ka to, i be mun lo miiri o koo la?

¹⁹ Jehova ye mɔgɔ minw kalifa an ka Masacɛ Yezu Krista ma, Yezu be olu latangara. O b’an hakili sigi yɛrɛ le! Yezu kisɛyanin lo tiɲɛn batoli koo la i ko saan kɛmɛkulu fɔlɔ la tuma min na a ye Alabatoso saniya. A kisɛyanin lo fana Jehova batobaga sɔbɛw koo la. An mana miiri o la, o b’an dusu saalo yɛrɛ le! An b’a waleɲuman lɔn kosɔbɛ sabu a be baara kɛra walisa Ala sagokɛlaw ani tiɲɛn batoli saniyanin ka to. An be se k’a yira ko an b’an ka Masacɛ kɔ, an kɛtɔ ka ban k’an seen don ngalon diinan ka koow bɛɛ la.