Eski ou pe al annavan avek lorganizasyon Zeova?

“Lizye [Zeova] i fikse lo bann zis.”​—1 PYER 3:12.

KI OU POU REPONN?

Ki mannyer Zeova pou reazir anver zefor Satan pour detri son bann serviter?

Ki serten keksoz Bondye i ekspekte nou fer konman son pep?

Akoz nou devret kontinyen al annavan avek lorganizasyon Zeova?

1. Ki lorganizasyon ti ranplas nasyon Izrael konman sa pep pour non Zeova? (Vwar portre anler.)

NOU rekonnet ki se Zeova ki ti etabli kongregasyon Kretyen dan premye syek e i’n osi reetabli vre ladorasyon dan nou letan. Parey nou’n vwar dan sa lartik avan, sa lorganizasyon ki bann premye disip Zezi ti form parti ti ranplas nasyon Izrael konman sa pep pour non Zeova parski nasyon Izrael ti’n vin aposta. Sa nouvo lorganizasyon ki ti annan laprouvasyon Bondye ti sirviv destriksyon Zerizalenm lannen 70 N.L. (Lik 21:20, 21) Sa bann levennman ki ti arive dan premye syek ti endik sa ki ti pou arive avek bann serviter Zeova dan nou letan. Lemonn Satan pou byento ariv ver son lafen, me lorganizasyon Bondye pou sirviv bann dernyen zour. (2 Tim. 3:1) Kwa ki fer nou kapab asire ki sa pou arive?

2. Ki Zezi ti dir konsernan “gran ladetres” e ki mannyer i pou konmanse?

² Ler Zezi ti pe koz konsernan son prezans envizib e konklizyon sa sistenm, i ti dir: “Sa pou en lepok gran soufrans, [oubyen “gran ladetres,” NW] pli terib ki tou sa ki’n deza annan avan, depi konmansman lemonn ziska konmela, e pa pou zanmen ariv ankor.” (Mat. 24:3, 21) Sa gran ladetres ki pa kapab  ganny konpare pou konmans ler Zeova i detrir “Gran Babilonn,” setadir tou fo larelizyon par servi bann pwisans politik. (Rev. 17:3-5, 16) Ki pou arive apre?

AKSYON SATAN I ANMENN VER ARMAGEDON

3. Apre ki fo larelizyon i ganny detri, ki latak ki pou esey ganny fer lo pep Zeova?

³ Apre ki fo larelizyon i ganny detrir, Satan ek son lemonn pou atak bann serviter Zeova. Par egzanp, konsernan “Gog sorti dan pei Magog” Labib i predir: “Ou pou vin kont zot parey en tanpet e ou pou kouver sa pei parey nyaz, ou avek tou ou latroup e bokou lezot dimoun avek ou.” Parski bann Temwen Zeova napa okenn larme e sa pep pli anpe lo later, zot pou paret fasil pou ganny targete. Pa i pou bet pour atak zot!​—Ezek. 38:1, 2, 9-12.

4, 5. Ki mannyer Zeova pou reazir ler Satan pou esey detri son bann serviter?

⁴ Ki mannyer Bondye pou azir anver zefor Satan pour detri son pep? Zeova pou entervenir pour ed zot e egzers son drwa konman Souvren Liniver. Zeova i konsider latak lo son bann serviter parey en latak lo li menm. (Lir Zekarya 2:8. *) Alor, nou Papa dan lesyel pou deswit pran aksyon pour sov nou. Sa delivrans pour ariv lo son pik kan lemonn Satan pou ganny detrir zour Amargedon, “konbat . . . sa gran zour Bondye Toupisan.”​—Rev. 16:14, 16.

⁵ Konsernan Amargedon, bann profesi Labib i dir: “Zeova i dir: ‘Zeova i annan en konfli avek bann nasyon. Limenm li ki pou ziz tou imen. I pou touy bann move dimoun avek lepe.’ Sa ki Zeova bann larme in dir:‘Gete! En maler pe tonm lo en nasyon apre lot e en gro tanpet pou ganny large sorti dan bann landrwa pli lwen lo later. Sa zour bann ki Zeova i touye pou depi en bout later ziska en lot bout later. Napa personn ki pou an dey pour zot, ni pou rasanble zot ouswa anter zot. Zot pou vin parey fimyen lo sirfas later.’” (Zer. 25:31-33) Amargedon pou anmenn en lafen avek sa move lemonn. Lemonn Satan pou ganny retire, me parti lorganizasyon Zeova lo later pou sirviv.

LORGANIZASTON ZEOVA PE PROGRESE OZORDI

6, 7. (a) Kote bann ki form parti sa “gran lafoul” i sorti? (b) Ki logmantasyon in annan diran bann lannen ki’n fek pase?

⁶ Lorganizasyon Bondye in touzour egziste e pe progrese lo later akoz bann dimoun ki form parti son lorganizasyon i annan son laprouvasyon. Labib i asir nou: “Lizye [Zeova] i fikse lo bann zis, E son zorey i ouver pour ekout zot lapriyer.” (1 Pyer 3:12) Sa bann zis i enkli “en gran lafoul” ki “pas par en gran [“ladetres,” NW].” (Rev. 7:9, 14) Sa bann sirvivan pa zis en lafoul me zot “en gran lafoul,” setadir en kantite dimoun. Eski ou vwar ou lekor parmi bann sirvivan sa gran ladetres?

⁷ Kote sa bann ki form parti sa gran lafoul i sorti? Zot pe reini ansanm akoz sa ki Zezi ti’n predir ti pou form parti sa siny ki ti pou idantifye son prezans. I ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Mat. 24:14) Dan sa bann dernyen zour, sa i travay prensipal lorganizasyon Bondye. Parski sa travay predikasyon ek lansennyman bann Temwen Zeova, plizyer milyon dimoun in aprann pour ador Bondye “an-espri e an verite.”  (Zan 4:23, 24) Par egzanp, dan sa di-z-an depi 2003 ziska 2012 plis ki 2,707,000 dimoun in dedye zot lavi avek Bondye e batize. Dan lemonn ozordi, i annan plis ki 7,900,000 Temwen avek plizyer milyon dimoun ankor ki pe asosye avek zot, sirtou pandan selebrasyon Memoryal ki ganny fer tou le zan. Nou pa fer vantar avek bann sif parski se ‘Bondye ki kontinyen fer pouse.’ (1 Kor. 3:5-7) Toutfwa, i evidan ki sa gran lafoul pe agrandi e pe vin pli gran tou le lannen.

8. Akoz nou’n vwar en logmantasyon remarkab dan lorganizasyon Zeova denozour?

⁸ Vi ki Zeova pe siport son bann Temwen, nou’n vwar en logmantasyon remarkab dan sa kantite serviter Bondye. (Lir Izai 43:10-12. *) Sa logmantasyon ti’n ganny predir par sa parol profetik: “Sa enn ki pti pou vin en milye, e sa enn ptipti en nasyon pwisan. Mwan menm Zeova, mon pou akseler li dan son letan.” (Iza. 60:22) A en serten moman, bann Kretyen swazir ki ankor lo later ti parey “enn ptipti,” me zot sif in ogmante anmezir ki lezot Izraelit spirityel ti vin dan lorganizasyon Bondye. (Gal. 6:16) Gras a benediksyon Zeova diran tou sa bann lannen, sa logmantasyon i kontinyen avek rasanbleman sa gran lafoul.

SA KI ZEOVA I EKSPEKTE NOU FER

9. Ki nou bezwen fer si nou anvi eksperyans sa zoli lavenir ki’n ganny promet dan Parol Bondye?

⁹ Ki swa nou en Kretyen swazir oubyen en manm sa gran lafoul, nou kapab eksperyans sa zoli lavenir ki’n ganny promet dan Parol Bondye. Par kont, pour arive fer sa nou bezwen azir anliny avek sa ki Zeova i ekspekte. (Iza. 48:17, 18) Annou vwar legzanp bann Izraelit ki ti anba Lalwa Moiz. En rezon ki Lalwa ti ganny met an plas se pour protez pep Izraelit par donn zot bann regilasyon lo kondwit seksyel, bann zafer biznes, konman pour pran swen avek zanfan, konman pour tret byen bann dimoun e lezot keksoz ankor. (Egz. 20:14; Lev. 19:18, 35-37; Det. 6:6-9) Pareyman, kan nou azir anliny avek sa ki Bondye i ekspekte, sa i benefisye nou e sirman nou pa vwar li en fardo pour fer son lavolonte. (Lir 1 Zan 5:3.) Anfet, zis parey bann Izraelit ti ganny proteze par Lalwa, kan nou obei Lalwa ek prensip Zeova sa pa zis protez nou me i osi gard nou “solid dan lafwa.”​—Tit 1:13, NW.

10. Akoz nou devret met letan dekote pour fer letid Labib e fer Ladorasyon Fanmir tou le semenn?

¹⁰ Parti lorganizasyon Bondye lo later pe al annavan dan diferan fason. Par egzanp, nou konprenezon lo laverite dapre Labib pe vin deplizanpli pli kler. Sa pa sirprann nou, akoz “santye bann dimoun drwat i parey sa lalimyer briye dan bomaten ki pe vin deplizanpli kler ziska gran lizour.” (Prov. 4:18) Me i ti a byen pour demande: ‘Eski mon azour avek bann nouvo leksplikasyon ki lesklav fidel i donn nou lo Labib? Eski mon abitye lir Labib tou le zour? Eski mon kontan lir nou bann piblikasyon? Eski mwan avek mon fanmir nou fer Ladorasyon Fanmir tou le semenn? Bokou nou pou dakor ki i pa tro difisil pour fer sa bann keksoz. Souvandfwa, nou zis bezwen met en pe letan dekote pour fer zot. Pa i enportan pour ganny konnesans egzakt baze  lo Labib, aplik li e fer progre spirityel, sirtou la ki gran ladetres i pros!

11. Dan ki fason bann lafet dan lepase e bann renyon ek lasanble denozour in anmenn byenfe?

¹¹ Lorganizasyon Zeova pe ed nou pour nou prop dibyen ler i ankouraz nou pour swiv konsey zapot Pol: “Annou rode konman pous kanmarad pour annan lanmour e fer sa ki byen. Pa abandonn zot lasanble parey labitid serten parmi zot, me ankouraz kanmarad sirtou ki la sa Zour Senyer pe aprose.” (Ebr. 10:24, 25) Bann lafet ki ti ganny fer tou le zan ek lezot rasanbleman pour ladorasyon ti fortifye bann Izraelit spirityelman. Deplis, sa bann levennman parey Lafet bann Payot dan letan Neemya ti bann moman zwaye. (Egz. 23:15, 16; Nee. 8:9-18) Pareyman, nou ganny bann byenfe dan nou bann renyon ek lasanble. Pour nou lasante ek boner spirityel, annou profit o maksimonm tou sa bann provizyon.​—Tit 2:2.

12. Ki mannyer nou devret santi konsernan sa travay predikasyon Rwayonm?

¹² Konman bann ki asosye avek lorganizasyon Bondye, nou annan sa lazwa pour partisip dan “servis sakre anonsan Bonn Nouvel Bondye.” (Rom. 15:16) Lefet ki nou partisip dan sa “servis sakre” sa i fer ki nou “travay ansanm” avek Zeova, sa Enn ki “sen.” (1 Kor. 3:9; 1 Pyer 1:15) Kan nou pres sa bon nouvel, sa i kontribye pour sanktifye non sen Zeova. Eski pa i en privilez enkonparab ki nou’n ganny konfye avek ‘Levanzil laglwar sa Bondye beni [oubyen “ere,” NW].’​—1 Tim. 1:11.

13. I tou depan lo kwa pour nou ganny en bon lasante spirityel ek lavi?

¹³ Bondye i anvi ki nou vey byen nou lasante spirityel par reste atase avek li e siport son lorganizasyon par partisip dan bann diferan aktivite. Moiz ti dir bann Izraelit: “Mon pran lesyel ek later konman temwen kont zot ozordi, ki mon’n met lavi ek lanmor devan zot, benediksyon ek malediksyon e ou devret swazir lavi pour ki ou reste vivan, ou ek ou desandans, par kontan Zeova ou Bondye, par ekout son lavwa e par reste atase avek li parski i ou lavi e i kapab fer ou viv lontan dan sa pei ki Zeova ti fer serman pour donn avek ou zanset Abraam, Izaak ek Zakob.” (Det. 30:19, 20) Nou lavi i depan lo fer lavolonte Zeova, kontan li, obeir li par ekout son lavwa e reste atase avek li.

14. Ki mannyer en frer ti santi konsernan lorganizasyon vizib Bondye?

¹⁴ Frer Pryce Hughes ti determinen pour reste atase avek Bondye e azour avek Son lorganizasyon, i ti ekrir: “Mon vreman kontan ki mon’n viv dapre sa ki mon ti konnen lo plan Zeova depi zis avan 1914 . . . sa ki’n pli enportan ki tou pour mwan, se reste pros avek lorganizasyon vizib Zeova. Bann keksoz ki’n mon’n eksperyanse dan lepase ti montre mwan ki i pa fer sans pour depan lo bann rezonnman imen. Kan mon’n ti’n fini desid lo sa pwen, mon ti determinen pour reste atase avek sa lorganizasyon ki fidel. Ki lot fason nou kapab ganny laprouvasyon Zeova ek son benediksyon?”

KONTINYEN AL ANNAVAN AVEK LORGANIZASYON BONDYE

15. Donn en legzanp baze lo Labib ki montre ki mannyer nou devret konsider bann sanzman dan nou konprenezon bann topik baze lo Labib.

¹⁵ Si nou anvi ganny laprouvasyon ek benediksyon Zeova, nou bezwen siport son lorganizasyon e aksepte bann azisteman dan lafason ki nou konpran Labib. Par egzanp: Apre ki Zezi ti’n mor, i ti annan plizyer milye Kretyen Zwif ki ti  devoue pour Lalwa e zot ti vwar li difisil pour liber zot avek Lalwa. (Akt 21:17-20) Me atraver son let pour bann Ebre, Pol ti ed zot aksepte ki zot pa ti’n ganny sanktifye par mwayen bann “sakrifis ordonnen dapre Lalwa” me “par sakrifis lekor Zezi-Kri enn fwa pour tou.” (Ebr. 10:5-10) San dout, laplipar bann Kretyen desandans Zwif ti aziste zot fason panse e ti kontinyen progrese spirityelman. Nou osi nou bezwen etidye o profon e pare pour adapte avek okenn sanzman dan lafason ki nou konpran Parol Bondye oubyen nou predikasyon.

16. (a) Akoz lavi dan Paradi pou merveye? (b) Ki ou enpasyan pour vwar dan nouvo lemonn?

¹⁶ Tou dimoun ki reste fidel anver Zeova ek son lorganizasyon pou kontinyen ganny son benediksyon. Bann Kretyen swazir ki fidel pou ganny bann gran privilez konman zeritye Kris dan lesyel. (Rom. 8:16, 17) Si nou annan sa lespwar pour viv lo later, zis mazinen ki degre gou i pou gou pour viv dan Paradi. Lefet ki nou form parti lorganizasyon Zeova, pa i en lazwa pour nou koz avek lezot konsernan sa nouvo lemonn ki Bondye in promet! (2 Pyer 3:13) Psonm 37:11 i dir: “Bann dimoun ki annan limilite pou posed later e zot pou trouv bokou plezir dan labondans lape.” Dimoun pou “konstri lakaz e zot pou reste ladan” e pou rezouir “travay zot lanmen.” (Iza. 65:21, 22) I pou nepli annan okenn labi, lapovrete ek lafamin. (Ps. 72:13-16) Gran Babilonn pou nepli anbet personn akoz i pou nepli egziste. (Rev. 18:8, 21) Bann dimoun mor pou ganny resisite e ganny sa sans pour viv pour touzour. (Iza. 25:8; Akt 24:15) Pa tousala i en lespwar merveye pour sa plizyer milyon dimoun ki’n dedye zot lavi avek Zeova! Pour sa bann promes dan Labib vin vre pour nou personnelman, nou bezwen kontinyen fer progres spirityel, toultan azour e al annavan avek lorganizasyon Bondye.

17. Ki latitid nou bezwen annan anver nou ladorasyon pour Zeova ek son lorganizasyon?

¹⁷ Vi ki sa move lemonn i pros pou ariv ver son lafen, annou reste ferm dan lafwa e demontre en gran lapresyasyon konsernan laranzman ladorasyon ki Bondye in fer. Sa ti latitid Psalmis David, ki ti sante: “Mon’n demann Zeova en keksoz, sanmenm ki mon pou rode, ki mon kapab reste dan lakaz Zeova tou mon lavi, pour admir labote Zeova e pour get son tanp avek lapresyasyon.” (Ps. 27:4) Annou reste atase avek Bondye, reste azour avek son pep e kontinyen al annavan avek lorganizasyon Zeova.

[Not anba lo paz]

[Kestyon]

[Portre lo paz 30]

Eski ou kapab vwar ou dan Paradi? (Vwar paragraf 16)