Zeova sa Enn ki pran swen e protez nou
Zeova sa Enn ki pran swen e protez nou
“Parski i annan lafeksyon pour mwan, mon pou delivre li. Mon pou protez li akoz i konn mon non.”—PS. 91:14.
KI OU POU REPONN?
Akoz nou kapab dir ki Zeova i sa Enn ki donn nou sa ki nou bezwen?
Ki rol Zezi in zwe pour rekonsilye bann imen avek Bondye?
Ki mannyer Zeova i protez bann ki kontan e obeir li?
1, 2. Ki diferan sirkonstans familyal e fason ki nou’n konn laverite ki nou annan?
LARANZMAN fanmir in vin an egzistans gras a Zeova. (Efe. 3:14, 15) Menm si nou form parti en sel fanmir, nou annan diferan karakteristik e fer fas avek diferan sirkonstans. Petet ou’n reste avek ou paran depi nesans ziska adilt. Lezot petet in perdi zot paran dan lanmor akoz maladi, aksidan ouswa lezot trazedi. Lezot ankor pa ni menm konnen lekel zot paran.
2 Parmi bann adorater Zeova ki form parti en sel fanmir, sakenn in konn laverite dan diferan fason. Petet ou’n grandi dan laverite e ou paran in fer antre bann prensip Bondye dan ou leker. (Det. 6:6, 7) Petet ou enn parmi sa plizyer milye ki’n konn laverite avek lezot serviter Zeova atraver predikasyon.—Rom. 10:13-15; 1 Tim. 2:3, 4.
3. Ki nou annan an komen?
3 Malgre sa bann diferans ki nou’n fek mansyonnen, nou tou nou annan serten keksoz an komen. Nou tou nou pe sibir konsekans dezobeisans Adan ek Ev e nou’n erit lenperfeksyon, pese ek lanmor. (Rom. 5:12) Kantmenm sa, konman bann vre adorater Zeova, nou kapab apel li “nou Papa.” Se pour sa rezon ki pep Bondye dan letan lontan, ti dir sa parol dan Izai 64:8: “O Zeova, ou nou Papa.” Deplis, dan lentrodiksyon son model lapriyer, Zezi ti dir: “Nou Papa ki dan lesyel Ki ou non sen i ganny glorifye.”—Mat. 6:9.
4, 5. Pour ogmant nou lapresyasyon pour nou Papa Zeova, ki nou pou egzaminen?
4 Nou Papa ki dan lesyel i pran swen avek nou e protez nou konman en pep ki kriy son non avek lafwa. Dapre sa psalmis, Zeova ti dir: “Parski i [en vre adorater] annan lafeksyon pour mwan, mon pou delivre li. Mon pou protez li akoz i konn mon non.” (Ps. 91:14) Wi, avek lanmour Zeova i delivre nou kont nou bann lennmi e i protez nou konman en pep pour ki nou pa ganny detri.
5 Pour ogmant nou lapresyasyon pour nou Papa ki dan lesyel, annou egzamin trwa pwen enportan: (1) Nou Papa i sa Enn ki pran swen avek nou. (2) Zeova i sa Enn ki protez nou. (3) Bondye i nou pli bon Zanmi. Anmezir nou egzamin sa bann pwen, i byen pour medit lo nou relasyon avek Bondye e aprann ki mannyer nou kapab onor li konman nou Papa. I ti a byen osi pour nou reflesir lo bann benediksyon ki Zeova i promet pour donn bann ki apros avek li.—Zak 4:8.
ZEOVA SA ENN KI DONN NOU SA KI NOU BEZWEN
6. Dan ki fason Zeova i prouve ki i sa Enn ki donn “tou don ekselan”?
6 Disip Zak ti ekrir: “Tou don ekselan, tou kado parfe i sorti lao, kot Bondye, Papa tou lalimyer.” (Zak 1:17) Lavi limenm, i en zoli kado ki Zeova in donn nou. (Ps. 36:9) Ler nou servi nou lavi pour fer lavolonte Bondye, nou resevwar en kantite benediksyon la konmela e lavi eternel dan nouvo lemonn. (Prov. 10:22; 2 Pyer 3:13) Me ki mannyer sa pou posib vi ki nou tou nou’n erit konsekans dezobeisans Adan?
7. Ki Zeova in fer pour ki nou annan en relasyon pros avek li?
7 Definitivman, Zeova i sa Enn ki donn nou tou sa ki nou bezwen. Par egzanp, i pare pour delivre nou akoz son labonte ekstraordiner. Wi, nou tou nou fer pese e nou’n erit lenperfeksyon avek Adan, nou premye papa lo later. (Rom. 3:23) Kantmenm sa, akoz Zeova i kontan nou, i ti pran linisyativ pour nou kapab annan en relasyon pros avek li. Zapot Zan ti ekrir: “La ki mannyer Bondye in montre son lanmour pour nou: in anvoy son sel Garson dan lemonn pour ki par li nou ganny lavi. Lala ki vedir lanmour: Se pa nou ki’n kontan Bondye, me plito se li ki’n kontan nou e ki’n anvoy son Garson konman en viktim pour ki par li nou ganny pardon nou bann pese.”—1 Zan 4:9, 10.
8, 9. Ki mannyer Zeova ti demontre ki i sa Enn ki donn sa ki nou bezwen dan letan Abraam ek Izaak? (Vwar portre lo paz 16.)
8 Dan diznevyenm syek A.N.L., en levennman profetik ti revel provizyon ki Zeova ti pou fer pour imen obeisan ganny lavi eternel. Ebre 11:17-19 i eksplike: “Par lafwa, Abraam ti ofer Izaak an sakrifis ler Bondye ti teste li, e li ki ti’n resevwar bann promes, ti pare pour ofer son sel Garson an sakrifis. Pourtan i ti’n ganny dir, ‘Se par Izaak ki ou pou ganny en desandans.’ I ti mazin dan limenm ki Bondye i annan sa pouvwar pour resisit menm en dimoun mor. Pour sa rezon, senbolikman, Abraam ti reganny son garson.” Zis parey Abraam ti pare pour sakrifye son garson Izaak, Zeova ti pare pour ofer son Garson, Zezi Kri, pour sov limanite.—Lir Zan 3:16, 36.
9 Eski ou kapab imazinen ki mannyer Izaak ti’n bezwen santi ler i ti realize ki i pa ti bezwen mor konman en sakrifis? San dout, Izaak ti vreman rekonesan ki Bondye ti ranplas li avek en mal mouton ki ti’n pri dan en brousay. (Zen. 22:10-13) I pa drol alor ki sa landrwa ti ganny apele “Zeova-Yire,” ki vedir “Zeova pou fourni.”—Zen. 22:14; not.
PROVIZYON POUR REKONSILYASYON
10, 11. Lekel ki’n aksepte sa “misyon pour fer lezot rekonsilye” avek Bondye e ki mannyer zot in fer li?
10 Anmezir ki nou reflesir lo lafason ki Zeova i montre ki i sa Enn ki donn nou sa ki nou bezwen, annou rekonnet sa rol enportan ki Zezi Kri in zwe. Parey zapot Pol in ekri: “Wi, lanmour Kris i kontrol nou, parski nou asire ki en sel in mor pour tou dimoun e alor tou in mor. E i’n mor pour tou bann vivan pour ki bann vivan i nepli viv pour zot menm, me pour li ki’n mor e resisite pour zot.”—2 Kor. 5:14, 15.
11 Parski zot ti kontan Bondye e apresye sa gran privilez ki zot ti annan pour servi li, bann premye Kretyen ti aksepte “sa misyon pour fer lezot rekonsilye avek li.” Zot travay pour anons sa bon nouvel e fer disip ti permet bann ki ti annan en leker senser vin anpe avek Bondye, vin son zanmi e finalman vin son bann zanfan spirityel. Ozordi, bann Kretyen swazir i fer sa menm travay. Sa ki zot fer konman bann anbasader Bondye ek Kris i permet bann ki annan en leker senser ganny atire par Zeova e vin bann krwayan.—Lir 2 Korentyen 5:18-20; Zan 6:44; Akt 13:48.
12, 13. Ki mannyer nou kapab montre ki nou apresye bann provizyon Zeova?
12 Parski zot rekonesan anver Zeova, sa Enn ki donn nou sa ki nou bezwen, tou Kretyen ki annan lespwar pour viv lo later i partisip ansanm avek bann Kretyen swazir dan predikasyon. Dan sa travay, nou servi Labib, sa provizyon merveye ki Bondye in donn nou. (2 Tim. 3:16, 17) Par servi byen Parol Bondye dan predikasyon, nou donn lezot sa loportinite pour ganny lavi eternel. Pour ed nou dan sa travay, nou tou nou depan lo en lot provizyon Zeova e sa i son lespri sen. (Zeka. 4:6; Lik 11:13) Bann rezilta enpresyonan parey nou vwar dan Yearbook of Jehovah’s Witnesses sak lannen i konfirm sa. Pa i en loner pour partisip dan sa travay ki permet nou loue nou Papa, sa Enn ki donn nou sa ki nou bezwen!
13 Ler nou reflesir lo tou sa ki Zeova in donn nou, i byen pour nou demann nou lekor: ‘Eski mon pe fer tou sa ki mon kapab dan predikasyon pour montre Zeova ki kantite mon apresye son bann provizyon? Ki mon kapab fer pour amelyor mon kalite servis e vin en pli bon proklanmater sa bon nouvel?’ Nou kapab demontre nou rekonesans anver bann provizyon merveye Zeova par kontinyen met lentere Rwayonm premye dan nou lavi. Si nou fer sa, Zeova pou fer sir ki nou ganny sa ki nou bezwen. (Mat. 6:25-33) Lefet ki Zeova i kontan nou, sirman nou anvi fer tou sa ki nou kapab pour fer li plezir e fer son leker rezouir.—Prov. 27:11.
14. Ki mannyer Zeova in delivre son pep?
14 Psalmis David ti sante: “Mon san defans e pov. Ki Zeova i vey lo mwan. Ou mon led e mon sover.” (Ps. 40:17) Plizyer fwa Zeova in delivre son pep konman en group, sirtou ler zot ti pe ganny persekite severman e zot bann lennmi ti fatig zot zanmen fini. Dan sa bann sityasyon koumsa, pa nou vreman rekonesan pour led Zeova e sa kantite provizyon spirityel ki i pe kontinyelman donn nou!
ZEOVA I PROTEZ NOU
15. Donn legzanp pour montre ki mannyer en bon papa i kapab protez son zanfan.
15 En bon papa pa zis donn son zanfan sa ki zot bezwen me i osi protez zot. I ti pou normal pour li sov zot si zot lavi ti an danze. En frer i ankor rapel en lensidan ki ti arive ler i ti ankor en pti garson. Li ek son papa ti pe retourn kot lakour apre predikasyon e zot ti bezwen travers en pti larivyer. En gro lapli ti’n tonbe son bomaten e sa pti larivyer ti’n deborde. Sel fason zot ti kapab traverse ti par sot lo bann gro ros. Sa pti garson ki ti par devan son papa ti perdi lekilib lo enn sa bann ros, i ti tonm dan delo e de fwa i ti pran fon. Sa pti garson ti rekonesan ki son papa ti deswit graponn son zepol e anpes li noye. Nou Papa ki dan lesyel i protez nou kont sa lemonn danzere ek son dirizan Satan. San dout, napa en lot ki kapab protez nou pli byen ki Zeova.—Mat. 6:13; 1 Zan 5:19.
16, 17. Ki mannyer Zeova ti ed e protez bann Izraelit ler zot ti lager avek bann Amalekit?
16 Fason ki Zeova ti protez son pep avek lanmour i ganny byen demontre par sa ki ti arive apre ki i ti’n delivre bann Izraelit dan lesklavaz Lezip e dan en fason mirakile i ti protez zot anmezir zot ti travers Lanmer Rouz 1513 A.N.L. Apre ki zot ti’n mars dan dezer pour al ver Montanny Sinai, sa pep ti ariv Refidim.
17 Anliny avek sa profesi dan Zenez 3:15, i kapab ki Satan ti pe esey rod tou fason pour atak bann Izraelit ki ti paret san defans. I ti fer sa atraver bann Amalekit ki ti bann lennmi pep Bondye. (Nom. 24:20) Reflesir lo sa ki Zeova ti akonplir atraver kat zonm fidel, Zozye, Moiz, Aaron ek Our. Anmezir Zozye ti pe lager avek bann Amalekit, Moiz, Aaron ek Our ti’n stasyonnen lo en pti montanny pa tro lwen. Bann Izraelit ti pli for ler Moiz ti lev son lanmen, me ler i ti nepli kapab kit son lanmen anler, Aaron ek Our ti tenir son lanmen. Alor, i ti avek led Zeova ek son proteksyon ki “Zozye ti defet Amalek ek son pep.” (Egz. 17:8-13) Moiz ti konstri en lotel laba e i ti apel li “Zeova-Nisi,” ki vedir “Zeova i mon poto sinyal.”—Lir Egzod 17:14, 15 *; not.
GANNY PROTEZE KONT LATAK SATAN
18, 19. Ki Zeova pe fer pour protez son pep dan nou letan?
18 Zeova i protez tou bann ki kontan e obei li. Parey bann Izraelit ki ti Refidim, nou depan lo Bondye pour protez nou kan nou an fas avek bann lennmi. Souvan, Zeova in protez nou konman en group kont bann latak Dyab. Mazin sa kantite fwa ki Bondye in protez nou bann frer ek ser ki pa ti pran kote dan politik. Par egzanp, sa ti leka pandan lepok Nazi Lalmanny ek lezot pei dan bann lannen 1930 ek 1940. Ler nou lir e reflesir lo leksperyans bann frer ek ser ek bann resi dan Yearbook lo lafason ki Bondye in protez zot kont persekisyon, sa pou ranforsi nou konfyans dan li konman nou Refiz.—Ps. 91:2.
19 Atraver lorganizasyon Zeova ek bann piblikasyon, nou ganny bann rapel pour nou prop proteksyon. Reflesir lo konman ki sa in benefisye nou tou dernyenman. Anmezir ki bann standar moral sa lemonn i kontinyen degrade e pornografi i ogmante, Zeova in donn nou bann rapel ek led pratik ki averti nou kont danze limoralite. Par egzanp, nou Papa i konsey nou pour veye konman nou servi sit sosyal lo Enternet ki pou ed nou evit bann move frekantasyon. *—1 Kor. 15:33.
20. Ki kalite proteksyon ek gidans ki nou kapab gannyen dan kongregasyon?
20 Ki mannyer nou kapab demontre ki nou pe vreman “ganny ansennyen par Zeova”? Par fer sir nou ekout son bann komannman. (Iza. 54:13) Nou ganny gidans ek proteksyon dan nou bann kongregasyon kot i sen e sof, kot bann zonm fidel ki pe servi konman ansyen i donn led ek konsey baze lo Labib. (Gal. 6:1) Zeova i demontre lentere senser dan nou atraver bann “kado zonm.” (Efe. 4:7, 8) Ki mannyer nou devret reazir? Kan nou pare pour soumet e obeir, nou pou ganny benediksyon Bondye.—Ebr. 13:17.
21. (a) Ki nou devret determinen pour fer? (b) Ki nou pou egzaminen dan lot lartik?
21 Annou determinen pour les lespri sen gid nou e dan sa fason nou a soumet avek gidans nou Papa dan lesyel. Nou osi bezwen medit lo lavi son Garson, Zezi Kri e fer bokou zefor pour swiv son legzanp parfe. Parski i ti obei menm ziska lanmor, Zezi ti ganny en gran rekonpans. (Fili. 2:5-11) Parey li, nou pou ganny beni si nou met konfyans dan Zeova avek tou nou leker. (Prov. 3:5, 6) Alor, annou toultan depan lo Zeova. Napa enn ki protez e donn nou sa ki nou bezwen otan ki li. Pa i en lazwa ek en gran privilez pour servi li! Nou lanmour pour li pou ogmante anmezir nou reflesir lo trwazyenm fason ki Zeova i pran swen avek nou, sa i atraver son lanmitye. Sa lot lartik i konsantre lo konman Zeova i nou pli bon Zanmi.
[Not anba lo paz]
^ par. 17 Egzod 17:14, 15: “14 Alor Zeova ti dir Moiz: ‘Ekrir sa konman en souvenir dan liv e dir sa dan zorey Zozye, “Mon konpletman efas souvenir Amalek lo later.”’ 15 Alor, Moiz ti konstri en lotel e i ti apel li Zeova-Nisi.”
^ par. 19 Legzanp bann rapel koumsa i kapab ganny trouve dan sa bann lartik “The Internet—Making Wise Use of a Global Tool” dan Latour Veyer le 15 Out 2011 paz 3-5 an Angle, “Tasyon pyez Dyab!” ek “Reziste e evit bann latrap Satan!” dan Latour Veyer le 1 Out 2012 paz 23-32.
[Kestyon]
[Portre lo paz 19]
Zeova i kapab servi nou bann frer ek ser pour ed nou reste fidel ler nou dan difikilte (Vwar paragraf 18-20)
