Gikondenar ba sa Bibliya ang Pagsugal?

SAGAD gipakita sa popular nga mga pelikula ug salida sa telebisyon nga ang pagsugal, ilabina sa mga kasino, maoy kalingawan sa mga maanyag, dato, ug sosyal nga mga tawo. Siyempre, ang kadaghanang mga tumatan-aw nasayod nga kini nga mga paglarawan maoy hinanduraw lamang.

Apan sa pagkatinuod, ang mga loteriya, pagpusta sa mga dula, ug pagsugal sa Internet kaindig na sa mga kasino ug kini nakapadani kaayo sa mga sugarol. Ang pagsugal maoy “kaylap nga bisyo nga kusog kaayong nakapadani,” sumala sa librong Internet Gambling. Pananglitan, ang poker komon na karon nga dula sa telebisyon ug sa Internet. Sumala sa usa ka mantalaan, gibanabana sa mga eksperto nga sa United States, ang gidaghanon sa mga nagdula niini midoble sulod sa dili pa dugayng 18 ka bulan.

Ang pagsugal gihubit ingong pagpusta ug salapi nga pamasin lamang. Daghang tawo ang nangatarongan nga basta ang kuwarta iya sa sugarol ug wala siya magiyan, walay daotan sa pagsugal. Ngani ang New Catholic Encyclopedia miingon nga ang pagsugal “wala isipa nga sala gawas nga kon sa paghimo niana mapasagdan niya ang iyang mga responsibilidad.” Apan, wala kini paluyohi sa Bibliya. Nan, unsa ang angayng panglantaw sa Kristohanon niini? Giuyonan ba o gikondenar kini sa Bibliya?

Angayng matikdan nga wala direktang hisgoti sa Bibliya ang pagsugal. Apan, wala kini magpasabot nga wala tay giya bahin niini. Inay maghatag ug mga lagda sa matag kalihokan o kahimtang, giawhag ta sa Bibliya nga ‘padayong sabton kon unsa ang kabubut-on ni Jehova.’ (Efeso 5:17) Ang Gregong pulong nga gihubad nga ‘sabton,’ sumala sa eskolar sa Bibliya nga si E. W. Bullinger, nagpasabot sa paghugpong sa mga bahin sa usa ka butang pinaagi sa “paghunahuna, sa kahibalo nga makab-ot tungod sa pagpamalandong ug pagkonsiderar.” Busa ang usa ka Kristohanon makasabot sa kabubut-on sa Diyos bahin niining butanga pinaagi sa paghugpong ug pagpamalandong sa mga prinsipyo sa Bibliya maylabot sa pagsugal. Samtang imong basahon ang mga teksto sa pagpadayon sa atong paghisgot, mahimong suknaon nimo ang imong kaugalingon: ‘Ang pagsugal ba kaharmonya niini nga teksto? Sumala sa Bibliya, uyon ba kini sa kabubut-on sa Diyos?’

Ang Lit-ag sa Suwerte

Kay ang pagsugal naglangkit man sa pagpusta ingong pamasin lamang, dakog papel ang pagtuo sa suwerte—usa ka misteryosong puwersa nga magkontrolar kono sa wala masayring mga panghitabo—ilabina kon may pustang salapi. Pananglitan, pilion ang buwenas nga mga numero sa tiket sa loteriya, may pipila ka pulong  nga dili angayng litokon sa mga matuotuohon nga magdulag mah-jongg, ug tayhopan ang dice sa dili pa iitsa. Ngano? Ang mga sugarol sagad nagtuo nga kini lagmit pangpasuwerte.

Wala ra ba gayoy daotan sa pagsalig sa suwerte? Mao kanay gibati sa pipila ka tawo sa karaang Israel. Sila nagtuo nga ang suwerte makapatunhay kanila. Giunsa kini paglantaw ni Jehova nga Diyos? Pinaagi sa iyang manalagnang si Isaias, ang Diyos nag-ingon kanila: “Kamo mao kadtong namiya kang Jehova, kadtong nakalimot sa akong balaang bukid, kadtong nag-andam ug usa ka lamesa alang sa diyos sa Suwerte ug kadtong nagpuno ug sinagolan nga bino alang sa diyos sa Kapalaran.” (Isaias 65:11) Alang sa Diyos, ang pagtuo sa suwerte maoy usa ka matang sa idolatriya ug supak sa tinuod nga pagsimba. Kini maoy pagsalig sa hinanduraw nga puwersa inay sa matuod nga Diyos. Wala gayod mausab ang panglantaw sa Diyos bahin niini.

Kon Giunsa sa Pagdaog

Ang mga sugarol nga mopusta diha sa Internet, sa mga dula, sa kasino, o kaha mopalit ug tiket sa loteriya, sagad wala magtagad kon diin gikan ang ilang madaog. Ang pagsugal lahi ra sa legal nga transaksiyon o pagpalit kay ang usa nga nagsugal buot man makadaog ug salapi nga gikan sa mga napildi. * “Sa kada tawo nga mamilyonaryo tungod sa pagdaog sa loteriya,” nag-ingon ang Centre of Addiction and Mental Health sa Canada, “dunay minilyon nga uban pa nga nawad-an sa ilang salapi!” Unsang mga prinsipyo sa Bibliya ang makatabang sa usa ka Kristohanon aron masabtan ang panglantaw sa Diyos bahin niini?

Ang kataposan sa Napulo ka Sugo nga gihatag ngadto sa Israel nag-ingon: “Dili ka magtinguha sa asawa sa imong isigkatawo, ni sa iyang ulipong lalaki ni sa iyang ulipong babaye ni sa iyang baka ni sa iyang asno ni sa bisan unsa nga iya sa imong isigkatawo.” (Exodo 20:17) Ang pagtinguha sa mga butang sa isigkatawo—sa iyang kabtangan, bahandi, ug salapi—maoy usa ka seryosong sala, nga gitala lakip sa pagtinguha sa iyang asawa. Kasiglohan sa ulahi, gisubli ni apostol Pablo kining sugoa ngadto sa mga  Kristohanon: “Dili ka maibog nga hinakog.” (Roma 7:7) Ikaingon bang sad-an sa hakog nga pangibog kon ang usa ka Kristohanon nagtinguhang makadaog sa gipusta sa laing tawo?

“Moadmitir man sila [ang kadaghanang mga sugarol] o dili,” matod sa kolumnistang si J. Phillip Vogel, “sa dili pa sila magsugal gipangandoy na nilang makadaog ug dako bisan pag gamay ra ang ilang ipusta.” Sila nangandoy nga makahantok o kalit lang nga madato. Dayag nga sukwahi kini sa tambag sa Bibliya nga ang usa ka Kristohanon kinahanglang ‘maghago, nga magbuhat pinaagi sa iyang mga kamot sa maayong buluhaton, aron siya adunay ikahatag sa nanginahanglan.’ (Efeso 4:28) Ug espesipikong gipahayag ni apostol Pablo: “Kon adunay dili buot magtrabaho, ayaw usab siya pakan-a.” Siya midugang: “Sila magakaon sa pagkaon nga ilang gihagoan.” (2 Tesalonica 3:10, 12) Apan ikaingon ba nga ang pagsugal legal nga trabaho?

Bisag ang pagsugal nagkinahanglag paningkamot, makabaton siyag salapi nga nadaog, dili hinagoan o bugti sa serbisyo nga iyang gihatag. Sa pagsugal, ang sugarol mopustag salapi nga walay kasegurohan ug naglaom nga suwertehon ra. Buot gayod niya nga makabatog butang nga dili maghago. Sa laing bahin, ang tinuod nga mga Kristohanon gitambagan sa pagpangitag salapi pinaagi sa pagkugi. “Wala nay laing mas maayo alang sa tawo kay sa mokaon siya ug moinom ug himoon niya ang iyang kalag nga makapahimulos ug maayo sa iyang kahago,” misulat ang maalamong si Haring Solomon. Unya siya midugang: “Kini gikan sa kamot sa matuod nga Diyos.” (Ecclesiastes 2:24) Oo, ang mga alagad sa Diyos dili mosalig sa hinandurawng mga butang o mangitag daling paagi nga makakuwarta kondili, sila modangop sa Diyos aron sila magmalipayon ug panalanginan.

“Usa ka Lit-ag” nga Pagalikayan

Bisag ang nagsugal mamasin lang ug unya makadaog, angay niyang palandongon dili lamang ang lumalabayng kalipay sa pagdaog kondili ang dumalayong epekto sa pagsugal. “Ang usa ka panulondon ginakuha pinaagig kadalo sa sinugdan,” miingon ang Proverbio 20:21, “apan ang kaugmaon niini dili panalanginan.” Daghang nakadaog sa loteriya ug ubang mga sugarol ang nakaamgo, uban ang pagmahay o kaguol, nga ang bahandi nga ilang nadag-an wala makahatag kanilag kalipay. Mas maayo gayod nga magpatalinghog sa tambag sa Bibliya nga dili magbutang sa atong paglaom sa “walay-kasegurohang bahandi, kondili sa Diyos, nga dagayang naghatag kanato sa tanang butang aron atong pagakalipayan.”—1 Timoteo 6:17.

Adunay mas daotang epekto ang pagsugal gawas sa pagkadaog ug pagkapildi. “Sila nga determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan,” nag-ingon ang Bibliya. (1 Timoteo 6:9) Ang usa ka lit-ag gituyo aron mabitik ang biktima. Daghang tawo, nga interesadong mopusta ug gamayng kantidad sa salapi o mosulay sa pagsugal sa pipila lang ka higayon, sa ulahi nagumon ug naulipon sa sugal. Kini nakadaot sa ilang mga karera, nakapasakit sa ilang mga minahal, ug nakagun-ob sa ilang pamilya.

Human mapalandong ang daghang teksto nga naghisgot maylabot sa pagsugal, imo bang nasabtan kon unsay kabubut-on sa Diyos niining butanga? Giawhag ni apostol Pablo ang iyang mga isigka-Kristohanon: “Hunong na sa pagpaumol sumala niining sistemaha sa mga butang, kondili mag-usab kamo pinaagi sa pagbag-o sa inyong hunahuna, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.” (Roma 12:2) Ang kabubut-on sa Diyos, dili ang panglantaw sa kadaghanan, ang angayng mogiya sa kinabuhi sa usa ka Kristohanon. Ingong “malipayong Diyos,” dili buot ni Jehova nga anihon nato ang mapait nga mga bunga sa pagsugal.—1 Timoteo 1:11.

[Footnote]

[Blurb sa panid 14]

Ang mga alagad sa Diyos mangitag salapi pinaagi sa pagkugi

[Kahon sa panid 13]

Ang Kahinam sa Pagdaog

Ang pagsugal ba usa ka bisyo nga daling makapagiyan? Human sa usa ka pagtuon sa mga reaksiyon sa mga sugarol nga nakadaog ug napildi, si Dr. Hans Breiter miingon nga ang “epekto sa utok maylabot sa salaping nadaog diha sa eksperimentong gihimo diin gisundog konohay ang aktuwal nga pagsugal susama rag epekto sa pagkagiyan sa cocaine.”

[Hulagway sa panid 13]

Kang kinsang salapi ang gilaomang madaog sa mga sugarol?