Go long ol haf insaed long hem

?Baebol i Talem Wanem Long Saed Blong Krismas?

?Baebol i Talem Wanem Long Saed Blong Krismas?

Ansa we Baebol i givim

Baebol i no talem stret dei we Jisas i bon long hem, mo i no talem tu se yumi mas selebretem betde blong hem. Buk ya Cyclopedia we McClintock mo Strong tufala i raetem, i talem se: “God i no talem se ol man oli mas mekem lafet blong Krismas, mo lafet ya i no kamaot long Niutesteman.”

Sipos yumi lukluk gud long histri blong lafet ya, bambae yumi luk se hem i kamaot long wan kastom blong ol hiten man. Baebol i soemaot se sipos yumi traem blong wosipim God long fasin we hem i no glad long hem, yumi stap mekem hem i kros.—Eksodas 32:5-7.

Histri Blong Krismas

  1. Mekem betde blong Jisas: “Ol fas Kristin oli no selebretem dei we [Jisas] i bon long hem, from we oli tingbaot lafet ya se hem i wan kastom blong ol hiten man.”—The World Book Encyclopedia.

  2. 25 Disemba: I no gat wan pruf we i soemaot se Jisas i bon long dei ya. I luk olsem se ol lida blong jos oli jusum dei ya blong mekem i laenap wetem lafet we ol hiten man oli stap mekem, no blong makem dei blong yia we i longfala moa long ol narafala dei.

  3. Givim presen, mekem bigfala kakae, mekem lafet: Wan buk (The Encyclopedia Americana) i talem se: “Long medel blong manis Disemba, ol man Rom oli mekem wan lafet we nem blong hem Saturnalia. Lafet ya nao i stamba blong plante kastom we ol man oli harem gud blong mekem long Krismas. Plante samting we ol hiten man oli bin mekem long Saturnalia, olsem givim presen long narafala mo bonem ol kandel, ol man oli mekem tu long lafet blong Krismas.” Buk ya Encyclopædia Britannica i talem se long taem blong Saturnalia, “evri man oli no moa wok mo evri bisnes i stop.”

  4. Ol laet blong Krismas: Folem buk ya The Encyclopedia of Religion, taem ol man Yurop oli mekem lafet blong makem dei blong yia we i longfala moa long ol narafala dei, oli flasem haos blong olgeta “wetem ol laet mo ol defdefren lif mo tri.” Oli mekem olsem tu blong blokem ol devel.

  5. Lif blong miselto, mo lif blong holi (grin lif we frut blong hem i red): “Ol pris blong wan jos long Briten bifo, oli talem se lif blong miselto i gat majik long hem. Mo oli wosipim grin lif blong holi, blong mekem se san i kambak.”—The Encyclopedia Americana.

  6. Krismas tri: “Ol hiten man long Yurop, oli stap wosipim ol tri, mo oli gohed blong mekem olsem afta we oli joenem ol skul we oli talem se oli Kristin.” Wan samting we i mekem se kastom ya blong wosipim ol tri i gohed, hemia taem oli “putum wan krismas tri insaed long haos no klosap long doa blong olgeta, long taem blong spel long medel blong koltaem.”—Encyclopædia Britannica.