Go long ol haf insaed long hem

Go long lis blong ol haf

?Yu Yu Save?

?Yu Yu Save?

?Wanem wok blong wan kapten blong ol soldia blong Rom?

Pija blong Marcus Favonius Facilis we i wan kapten blong soldia blong Rom

Grik haf blong Baebol i tokbaot sam long ol kapten blong ol soldia blong Rom. Soldia we i lukaot long Jisas taem hem i ded, hem i wan kapten blong soldia blong Rom. Konilias we hem i faswan hiten man blong kam Kristin, hem tu i wan kapten blong soldia blong Rom. Mo soldia we i lukaot long Pol taem oli wipim hem, mo tu Julias we i tekem Pol i go long Rom, tufala tu i kapten blong soldia blong Rom.—Mak 15:39; Ol Wok 10:1; 22:25; 27:1.

Plante taem wan kapten blong soldia, i gat wok ya blong lukaot long samwe 50 mo 100 soldia. Wok blong hem, i blong trenem mo stretem ol man blong hem, jekem ol klos mo ol tul blong olgeta, mo givim oda long taem we oli rere blong go faet.

Wok ya blong kam wan kapten blong ol soldia, hem i wan wok we i hae moa long ol narafala wok we wan soldia i save mekem. Olgeta we oli mekem wok ya, oli bin stap olsem wan soldia blong plante yia finis, mo oli mas naf blong kam wan gudfala lida. Olgeta nao oli mas givim trening long ol soldia, blong mekem se ol soldia oli save mekemgud wok blong olgeta. Wan buk i talem se: “Ol kapten blong ol soldia, plante taem oli gat moa save mo oli save gud ol samting.”

?Olsem wanem ol glas blong lukluk fes long taem bifo oli defren long ol glas blong tede?

Glas blong lukluk fes blong ol man ijip bifo

Ol glas blong lukluk fes long taem bifo oli defren long hemia blong tede. Plante taem oli wokem ol glas ya long bras, mo tu maet oli wokem olgeta long silva, mo gol mo oli saenem gud. Faswan taem we Baebol i tokbaot ol glas blong lukluk fes, hemia long taem we oli wokem haos tapolen blong Jehova. Hem i faswan ples we ol man Isrel oli kam long hem blong mekem wosip. Ol woman Isrel oli givim ol glas we oli gat, blong wokem besin we oli wokem long bras, mo ples blong besin ya. (Eksodas 38:8) I luk olsem se, oli bonem ol glas ya blong mekem ol bras oli ronaot, mo oli yusum bras ya blong wokem besin ya.

Tede, long Isrel mo sam ples raonabaot long hem, ol man blong digim graon oli faenem ol glas blong lukluk fes, wetem ol jen mo ol iaring mo sam samting we ol woman long taem bifo oli yusum blong flasem olgeta. Plante taem, ol glas ya oli raon, mo oli flasemgud handel blong olgeta long wud, aean no tut blong elefen we oltaem oli wokem olsem pija blong wan woman. Long fored blong ol glas ya, oli saenem gud, mo long baksaed blong hem oli no mekem i saen.

Ol glas ya blong bifo, oli no klia gud olsem ol glas we yumi stap yusum tede. Aposol Pol i soemaot samting ya, taem hem i talem se: “Naoia yumi save luk fasin blong God, olsem we yumi stap luk long wan glas we i no klia gud.”—1 Korin 13:12.