Rabis Fasin—?I No Moa Gat Rod Blong Stopem?

Wan smol boe i intres long wan samting long graon, hem i pikimap samting ya—wan bom we ol ami oli bin berem aninit long graon—wantaem nomo bom ya i bosta mo i blaenem smol boe ya mo spolem bodi blong hem. Wan mama i lego bebi blong hem we i jes bon, hem i haedem smol bebi ya long doti we i stap long saed blong rod. Wan man i gobak long ples blong wok blong hem we oli bin sakemaot hem, mo hem i sutum evri man we hem i luk, afta i kilim hem wan i ded. Wan man we plante man raonabaot long hem oli tinghae long hem i mekem i nogud long saed blong seks wetem ol smol pikinini.

SORE tumas, oltaem nomo yumi harem ol nius blong ol rabis fasin olsem. Samting we i moa nogud hemia se antap long ol nius ya yumi harem sam narafala nius long saed blong ol teroris mo ol faet we i blong traem kilimaot wan ful laen blong man. Wan niuspepa blong 1995 i talem se: “Ating i stret nomo blong talem se, wan handred yia we i jes pas hem i ol yia blong Setan stret. I no gat wan narafala taem long histri blong man we ol man oli wantem no oli tingting kwiktaem nomo blong kilim plante milian man i ded from olkaen risen olsem kala blong skin, skul, no posisen blong narafala.”

Long sem taem, ol man i stap sakem doti long win, oli stap spolem wol ya, ol gudfala samting raonabaot long yumi we yumi stap yusum i stap godaon, mo klosap plante anamol mo tri oli lus. ?Olsem wanem? ?Bambae ol man oli save winim ol rabis samting ya mo mekem wol ya i kam wan sef ples we i gud bakegen? ?No traehad blong ol man i blong nating nomo, olsem we oli stap traem brumumaot solwota we i stap kam so? Wan tija blong yunivesiti we i raetem plante buk blong tokbaot rabis fasin we i kam antap, i talem se: “Mi harem se mi mas traehad blong mekem wan jenis long wol ya, blong mekem wol ya i kam moa gud. Be mi no save luk nating se wol ya i stap kam moa gud.” Maet yu yu gat filing olsem tu.

Wol ya i olsem wan sip we i stap ron i go long wan solwota we i stap kam moa raf mo evri dei i stap kam moa denja. Nating se ol man oli no wantem we sip i go olsem mo oli traem evri samting blong jenisim rod blong hem, be oli no naf. Sip ya i go stret long bigfala hariken, i no gat wan samting blong stopem hem.

I tru se ol trabol we i stap mekem wol ya i kam moa nogud i kamaot from we ol man oli no stretgud olgeta. (Rom 3:23) Be naoia rabis fasin i kavremap evri ples mo i luk olsem i kam bigwan tumas blong talem se i kamaot long man nomo. ?Olsem wanem? ?Wan rabis paoa we yumi no luk i save gat paoa long ol man? ?Sipos yes, wanem paoa ya, mo olsem wanem yumi save protektem yumi? Bambae nekis haf i ansarem ol kwestin ya.

[Foto Credit Line blong pija long pej 3]

© Heldur Netocny/Panos Pictures