Ripot Long Wok Blong Kingdom

Wan Program Long Televisin i Pulum Hem Blong Presem God

APOSOL Pol i talem se “i gat sam man we oli stap talemaot Kraes from we oli jalus long mi, nao oli stap traem mekem trabol long mi. Be i gat plante man oli stap prij, we tingting blong olgeta i stret gud nomo.” (Filipae 1:15) Samtaem ol man we oli traem mekem trabol long ol Witnes blong Jeova oli no luksave se trabol ya i stap pulum ol man we oli gat gud hat oli kam long trutok.

Long Novemba 1998, nasnal televisin blong Franis i wokem wan program we i soem ol pija blong Betel long Louviers, hemia branj ofis blong ol Witnes blong Jeova long Franis. Nating se ol man oli gat defdefren tingting afta we oli luk program ya, be hem i karem sam gudfala frut we man i no bin tingbaot.

Anna-Paula i wan long olgeta man we oli bin wajem program ya. Hem i laef 60 kilometa longwe long Betel. Anna-Paula i wan mama we i divos mo i gat tu pikinini, mo hem i stap lukaotem wan wok. Taswe long nekis moning, hem i telefon long Betel blong traem faenem wok long ples ya. Anna-Paula i talem se: “Mi harem se ples ya i wan gudfala ples mo mi harem olsem se wok we ol man oli stap mekem long ples ya i wan wok we i givhan long narafala.” !Hem i sapraes bigwan taem hem i lanem se olgeta we oli stap wok long Betel oli no wok blong kasem mane be oli volontia nomo! Oli eksplenem long Anna-Paula wanem nao ol wok blong ol Witnes blong Jeova, mo biaen hem i agri se wan Witnes i kam visitim hem.

Lena, wan fultaem paenia long kongregesen blong ples ya, i kam visitim Anna-Paula. Tufala i storian longtaem, mo Anna-Paula i tekem buk ya Save Blong Lidim Yu Long Laef We i No Save Finis. * Bifo we Lena i kambak blong visitim hem, Anna-Paula i ridim buk ya fulwan, mo hem i gat plante kwestin blong askem long Lena. Anna-Paula i glad blong stadi Baebol. Hem i talem se: “Long tingting blong mi, hemia wan janis blong mi save Tok blong God. Mi neva holem wan Baebol long han blong mi bifo.”

Long Jenuware 1999, Anna-Paula i visitim Betel, mo wan wik biaen hem i go long faswan Kristin miting blong hem. Smoltaem nomo biaen, hem i stat stadi long Baebol wetem ol pikinini blong hem mo hem i stat prij long ol fren blong hem. Hem i talem se: “Mi no save kipim ol samting we mi stap lanem blong mi wan nomo. Mi wantem serem ol trutok blong Baebol wetem olgeta man, mo mi wantem leftemap tingting blong olgeta.” Anna-Paula i traehad blong stretem sam problem we hem i gat, mo biaen hem i stat go long ol miting oltaem. Hem i gohedgud long saed blong spirit mo hem i tekem baptaes long Mei 5, 2002.

Anna-Paula i givim wan gudfala eksampol mo hem i strong long wok blong prij, taswe mama blong hem tu i stat blong stadi long Baebol, mo hem i tekem baptaes. Anna-Paula i talem se: “Mi faenem i had blong eksplenem glad blong mi wetem ol toktok nomo. Mi tangkiu long Jeova evri dei from janis ya we hem i givim long mi blong mi save hem mo mi wok blong hem, mo from ol blesing we hem i givim long mi.”

[Futnot]

[Tok blong pija long pej 8]

Antap: Anna-Paula

Aninit: Branj ofis blong Franis