Ripot Long Wok Blong Kingdom

Tekemaot Doti We Man i Sakem Long Nem Blong God

TOK blong God, Baebol, i talem se: “Naoia ol man we oli no bilif long God oli stap talem se yufala i man blong brekem loa. Ale, yufala i mas mekem fasin blong yufala i stret gud long fes blong olgeta, blong bambae oli luk ol gudfala wok blong yufala. Nao long Lasdei, taem God i kam blong jajem olgeta, bambae oli save leftemap nem blong God from ol gudfala wok ya blong yufala.” (1 Pita 2⁠:12) Yes, ol trufala Kristin oli traehad blong gat ol gudfala fasin oltaem from we oli no wantem se fasin blong olgeta i pulum ol man blong sakem doti long nem blong God.

Long Zambia i gat wan ples farawe long bus, we nem blong hem Senanga. Long ples ya, sam man oli bin stilim radio long haos blong wan skul tija. Ale, tija ya i talem se ol Witnes blong Jeova oli stilim radio blong hem, from we long taem ya i gat sam Witnes we oli bin prij klosap long haos blong hem. Hem i go long ol polis mo i ripotem se ol Witnes oli bin stilim radio blong hem. Blong pruvum se ol Witnes oli bin kam insaed long haos blong hem, hem i soem wan smol pepa we hem i faenem long floa. Be, ol polis oli no wantem bilivim tok blong hem. Oli talem se i moagud hem i go lukluk gud long bisnes ya bakegen.

Ol elda blong kongregesen blong ples ya, oli talem long ol Witnes we oli bin prij long eria blong tija ya, se i gud sipos oli go storebaot bisnes ya wetem tija. Sam long ol brata ya oli go mo oli storian wetem hem. Oli eksplenem long hem se oli no wantem we wan giaman toktok i pulum man blong sakem doti long nem blong Jeova. Nao ol brata ya oli talem se taem oli bin pas long haos blong tija ya, oli luk wan yangfala man i stap mo oli givim wan smol pepa long hem. Taem oli talem se yangfala ya i olsem wanem, tija ya i luksave hem wantaem. Yangfala man ya mo tija, tufala i blong sem jos. Tija ya i go storian wetem yangfala ya, be hem i talem se i no hem we i stilim radio ya. Ale, tija ya i tokbaot bisnes ya wetem papa mama blong yangfala ya, mo hem i gobak long haos. Wan aoa biaen, mama blong yangfala ya i karem radio ya i kambak.

Tija ya i harem nogud from giaman tok we hem i bin talem agensem ol Witnes, ale hem i go askem fogif long ol elda blong kongregesen. Ol elda oli akseptem sore blong hem, be oli askem hem blong talemaot olgeta samting ya long ol man blong bambae evriwan oli save se i no ol Witnes we oli bin stilim radio ya. Ale, tija ya i pasem wan mesej long skul blong talem stret samting we i hapen. Long rod ya, ol man oli no save sakem doti long nem blong Jeova. Ol Witnes blong Jeova oli fri blong gohed long wok blong prij long eria ya.

[Map/Foto blong pija long pej 19]

(Lukluk niuspepa)

AFRIKA

Zambia

[Credit Line]

Mountain High Maps® Copyright © 1997 Digital Wisdom, Inc.