?I Gat Wan Man We i Wokem Samting Ya?

Honet i Waes Blong Bildim Haos

● Sam man oli talem se honet i nambawan long wok blong bildim haos. ?Olsem wanem? ?Tok ya i stret?

Tingbaot: Honet i bildim mo i fiksimap haos blong hem wetem wan spesel kaen pepa, we hem nomo i wokem. a Hem i pikimap ol smosmol lif blong ol tri mo ol pis blong roten wud olbaot. Maet hemia ol smosmol pis blong ol plang, ol pos blong fenis, ol pos blong telefon, mo ol narafala samting blong bildim haos. Nao hem i kakae wud ya, i miksim wetem spet blong hem, nao i kam olsem wan glu. Taem glu ya i drae, hem i kam olsem pepa. Hem i tintin be i strong. Sam spesel samting insaed long spet blong honet i mekem se pepa ya i save holem hot no i save sakemaot hot. Taswe bed blong honet i save stap wom long ol dei we i kolkol, mo i save kam kolkol long ol dei we i hot.

Honet i gohed blong kakae mo spet, kakae mo spet gogo, hem i bildim haos blong hem. Taem haos ya i finis, i gat plante smosmol hol long hem, we ol wol blong olgeta oli olsem ambrela blong blokem ren. Olgeta wanwan oli gat sikis saed blong olgeta, we i mekem se oli strong. Wan hol i fasgud long narafala hol, oli no westem wan smol ples long haos blong olgeta. Ol honet we oli bildim haos blong olgeta long ol ples we oli wetwet, oli putum moa spet blong blokem wota. Nating se i olsem, oli lukaot wan ples we i haed lelebet blong bildim haos blong olgeta, olsem aninit long lif. Nao oli wokem wan smol samting olsem wan stik blong hangem bed blong olgeta long hem, mo oli mekem bed ya i lukluk i godaon. !Ol honet oli mekem bigfala wok ya, be oli no putum wan doti nating long win, wota, mo graon, olsem ol faktri we oli wokem pepa!

Ol man blong mekem plan blong haos mo ol man blong stadi, oli sapraes tumas long wok blong honet. Taswe, oli wantem yusum ol save ya blong wokem ol samting blong bildim haos. Ol samting ya bambae oli strong be oli no hevi, i isi blong benem, mo oli no putum doti long win, wota, mo graon.

?Wanem tingting blong yu? Bren blong honet i smol we i smol, olsem tu pis sanbij nomo. ?Yu ting se hem wan nomo i naf blong wokem pepa mo mekem plan blong haos blong hem? ?No yu ting se i gat wan Man we i putum waes ya long bren blong hem?

[Futnot]