Long Meksiko mo Sentrol Amerika, i gat samwe long 290 transleta we oli laef long sikis defren kantri, mo oli transletem ol buk i go long bitim 60 lanwis. ?From wanem oli traehad olsem? Hemia from we taem man i kasem buk long wan lanwis we i isi blong kasem save, ol tok ya oli tajem hat blong hem.​—1 Korin 14:9.

Sam transleta we oli wok long branj ofis blong ol Witnes blong Jehova long taon blong Meksiko, oli muv i go long ol taon we ol man oli toktok lanwis blong olgeta. ?Hemia i givhan long olgeta olsem wanem? Hem i mekem se ol transleta oli save harem mo toktok long ol lanwis ya we oli stap transletem ol buk i go long hem, mo hemia i mekem se i isi long olgeta blong transletem ol buk long fasin we man i kasem save long hem.

?Wanem tingting blong ol transleta long jenis ya? Federico we i stap transletem ol buk i go long lanwis ya Guerrero Nahuatl, i talem se: “Long ol ten yia we mi stap long taon blong Meksiko, mi faenem wan famle nomo we i toktok lanwis blong mi. Be naoia, long taon we translesen ofis i stap long hem, !klosap evri man oli toktok lanwis ya!”

Karin we i stap transletem ol buk i go long lanwis ya Low German, i stap long Chihuahua, wan taon blong Meksiko. Hem i talem se: “Taem mi stap wetem ol Mennonite, samting ya i givhan gud long mi blong save gud lanwis. Mifala i laef mo wok long wan smol taon, mo taem mi lukluk i gotru long wido, mi luk ol man we oli save kasem gudfala samting from wok blong translesen we mifala i mekem long ples ya.”

Neyfi i laef long translesen ofis long Mérida, Meksiko. Hem i talem se: “Taem mifala i stap mekem Baebol stadi wetem ol man Maya, mifala i luksave ol toktok we ol man ya oli no kasem save long hem. Ale taem mifala i transletem ol buk, mifala i traem faenem wan narafala rod blong talem ol toktok ya.”

?Olsem wanem wok blong translesen i givhan long ol man? Traem tingbaot eksampol ya: Blong 40 yia finis, Elena i stap go long ol miting blong ol Witnes blong Jehova. Be oli mekem miting ya long lanwis Spanis, mo hem i no kasem save nating long samting we oli stap talem, from we hem i toktok lanwis Tlapanec. Hem i talem se: “Mi mi wantem nomo blong stap long ol miting.” Be taem Elena i stadi long wan buklet long lanwis Tlapanec, hem i lavem Jehova moa, mo hemia i pulum hem blong i givim laef blong hem i go long Jehova, mo long 2013, hem i tekem baptaes. Elena i talem se: “Mi mi talem tangkiu long Jehova from we hem i letem mi mi kasemsave gud long Baebol.”