OLGETA we sora blong olgeta i fas, oli sakem ol han blong olgeta blong soem se oli glad taem mesej i kamaot se: “Bambae yufala i glad blong save se mifala i stap transletem sam buk blong Hibru haf blong Baebol [Oltesteman] i go long saen lanwis. !Mifala i wokem finis [video] rikoding blong Jenesis!”

Oli talemaot mesej ya long laswan tok blong ol bigfala asembli blong ol Witnes blong Jehova, we oli mekem long Saen Lanwis Blong Amerika (ASL).

Long 2005, ol Witnes blong Jehova oli stat blong transletem Baebol Long Niu Wol Translesen i go long ASL. Faswan buk we oli transletem, hemia Matiu. Long 2010, oli transletem finis ol 27 buk long haf blong Baebol we plante man oli singaotem se Niutesteman.

Mo tu, ol Witnes oli transletem sam haf blong Baebol i go long faef narafala saen lanwis.

?From wanem oli mekem bigfala wok ya? Ol Witnes oli tingbaot se evri buk we ol man oli raetem, i olsem se man i toktok, be olgeta we sora blong olgeta i fas oli neva harem ol toktok. Sipos oli transletem Baebol i go long saen lanwis we i stret, i klia, mo i isi blong ol man we sora blong olgeta i fas oli kasem save, bambae plante moa long olgeta oli gat janis blong save Baebol mo fren gud wetem God. ?Wanem tingting blong olgeta we sora blong olgeta i fas, long saed blong Baebol ya?

Wan yangfala man i talem se: “Sam yia i pas, buk blong Matiu i kamaot long saen lanwis. Long taem ya, mi harem se Jehova God i stap soemaot stret long mi se hem i lavem mi. Mo taem buk blong Jenesis i kamaot, ol filing ya oli kam strong moa. Hem i meksua se mi mi gat janis blong save hem.”

Wan woman i talemaot filing blong hem, i se: “!Saen lanwis ya i klia we i klia, mo i gat plante aksen long hem! Naoia mi mi lavem Baebol. Mi kasem save se Jehova i wantem we mi ridim ol vas wanwan, mo ol vas raonabaot long olgeta, blong mi save hem moa. Ol tok we i klia olsem, i tajem hat blong mi, mo i mekem se taem mi prea, mi mi naf blong talemaot ol dip filing blong mi long Jehova.”