Tangkiu tumas long ol volontia we oli kam long ol defren ples long Yunaeted Stet. Had wok blong olgeta i mekem se tu bigfala konstraksen projek blong ol Witnes blong Jehova oli stap gohed gud.

Wallkill, New York: Hemia stamba ples blong printim ol buk blong ol Witnes blong Jehova long Yunaeted Stet, mo bitim 1,600 Witnes oli laef long ples ya. Blong mekem Wallkill i kam bigwan moa, ol man blong konstraksen we plante long olgeta oli volontia, oli stap wokem wan bigfala ofis bilding we i gat tri stori blong hem, wan ples blong paking, mo wan bilding blong tri stori we i gat ol rum blong slip insaed. Long 2012, ol volontia oli finisim wan bilding blong kipim ol tul mo masin long hem, mo wan bigfala rum blong kakae we 200 man oli save sidaon long hem.

Long plante kantri olsem Brasil, Jemani, mo Meksiko, ol Witnes blong Jehova oli gat ofis we i lukaot long wok long ol kantri ya, mo oli singaot ofis ya se “branj ofis.” Long Yunaeted Stet, ol Witnes oli gat wan senta blong edukesen long Patterson, New York, mo ol ofis long Brooklyn, New York. Taem wok i finis long Wallkill, bambae hem i bigwan moa i bitim ol narafala branj ofis blong ol Witnes blong Jehova long wol.

Warwick, New York: Ol bilding ya bambae oli kam niufala wol hedkwota blong ol Witnes blong Jehova. Oli karemaot finis ol emti haos long graon ya. Ol Witnes oli pemaot wan graon 10 kilometa afsaed long Tuxedo, New York, blong putum ol masin mo ol narafala samting we bambae oli yusum blong bildim hedkwota. Ol ofis blong lokol gavman oli agri long laswan ripot long saed blong samting we projek ya bambae i mekem long envaeronmen. Taem ol ofis ya oli agri long plan blong ol bilding ya, ol Witnes bambae oli askem ol pemit blong wok. Go kasem taem we oli finisim konstraksen ya, wol hedkwota bambae i stap long Brooklyn, New York.