Cila mwaka tulapulinta no kupeela abantu amaBaibolo ne mpapulo ishilanda pali Baibolo ishingi nga nshi. Twalikwata amaofeshi mu fyalo ifingi ayo fwe bene twakuula. Inte sha kwa Yehova mu filonganino ifyalekanalekana balikwata Amayanda ya Bufumu ayasuma umo balonganina. Ni kwi tufumya indalama isho tubomfya kuli ifi fyonse twalandapo?

Abantu mu kuitemenwa e basangwilako indalama tubomfya mu mulimo wesu. (2 Abena Korinti 9:7) Mu 1879, ilyo ino magazini yafumine umuku wa bubili, yatile: “Twaishiba ukuti YEHOVA e wafwilisha umulimo wa kupulinta magazini ya ‘Zion’s Watch Tower,’ [ifi e fyo ino magazini baleyita kale] kanshi tatwakatale atulombelesha nangu ukupaapaata abantu ukuti batupeeleko indalama.” Ukutula ilya nshita, tatwatala atulombeleshapo nangu ukupaapaata abantu ukuti baletupeelako indalama.

Tulatuma indalama ku maofeshi ya Nte sha kwa Yehova nelyo ukubika mu kabokoshi akaba mu Mayanda ya Bufumu. Tatupoka ica pe kumi, tatupishamo imbale sha mutuulo, e lyo tatulipilisha abantu pa fyo tubasambilisha na pa mpapulo tubapeela. Tabatufolesha indalama nga tulebomba umulimo wa kushimikila imbila nsuma, nga tulesambilisha abantu mu cilonganino nelyo nga tulekuula ififulo fya kulonganinamo. Na kuba, Yesu atile: “Mwapeelwe fye ubupe, na imwe mulepeela fye.” (Mateo 10:8) Ababomfi ababombela pa maofeshi yakalamba na pa maofeshi yanono, ukubikako fye na baba mwi Bumba Litungulula ilya Nte sha kwa Yehova, tabafola.

“Indalama isho Inte sha kwa Yehova babomfya mu mulimo babomba, ni shilya basangula mu kuitemenwa. Cila muntu alaitemenwa ukusangwilako indalama isho alefwaya ne miku iyo umwine alefwaya ‘ukusangwilako.’”—European Court of Human Rights, 2011

Indalama tusangula, tulashibomfya ku kwafwilisha abaponenwa no tuyofi. Abena Kristu abaliko mu nshita ya batumwa nabo bene baleafwilisha abaleba na mafya. (Abena Roma 15:26) Na ifwe bene tulafwilisha abaponenwa no tuyofi ilyo tubakuulila amayanda, ififulo fya kulonganinamo, ukubapeelako ifya kulya, ifya kufwala e lyo no kwafwilisha abalwele.