AMASUKO KU MEPUSHO YA MU BAIBOLO

Bushe kuti mwacita shani pa kuti mu cupo mube insansa?

Ifyo Baibolo itufunda pa kuti tube ne nsansa mu cupo filatwafwa sana pantu fyafuma ku watendeke icupo, Yehova Lesa. Baibolo ilatweba ifyo twingaba ne mibele isuma iingalenga twaba aba nsansa mu cupo kabili ilatusoka ukukanaba ne mibele iingonaula icupo cesu. Ilatusambilisha ne fyo twingalaumfwana bwino pa kuti tube aba nsansa sana mu cupo.—Belengeni Abena Kolose 3:8-10, 12-14.

Abalume na bakashi bafwile ukulapeelana umucinshi. Nga ca kutila bonse balekonka ifyo Lesa abeeba ukucita, kuti baba ne nsansa.—Belengeni Abena Kolose 3:18, 19.

Finshi fingalenga icupo ukukanapwa?

Abaupana te kuti balekane nga ca kuti nabatemwana. Lesa alatusambilisha ifyo twingaba no kutemwa. Lesa no Mwana wakwe Yesu, e bo twingasambililako ifyo ukutemwa kwa cine kwaba.—Belengeni 1 Yohane 4:7, 8, 19.

Abaupana te kuti balekane nga ca kutila balemona icupo ukuti ni Lesa e wa cibikako. Lesa abikileko icupo pa kuti umwaume no mwanakashi baletwalilila ukwikala pamo na pa kuti aba mu lupwa baleba abacingililwa. Lesa apangile umwaume no mwanakashi ukuti baletungililana, kanshi abaupana nga baleumfwana kuti batwalilila ukuba pamo. Na kabili abapangile mu cipasho cakwe pa kutila baleba no kutemwa nga fintu Lesa aba.—Belengeni Ukutendeka 1:27; 2:18, 24.

Nga mulefwaya ukwishibilapo na fimbi, belengeni icipandwa 14 muli ici citabo, icalembwa ne Nte sha kwa Yehova

Kuti mwakopolola ici citabo pa Intaneti pa www.jw.org

[Icikope pe bula 16]

Bushe abaupana bafwile ukulalashanya shani pa kuti babe ne nsansa mu cupo?