Ba Mabel aba ku Argentina, bali fye bwino kabili balebomba ne ncito ya kundapa abakwata amafya ku mafupa ne micincili. Lelo mu 2007 batendeke ukunaka sana e lyo no mutwe watendeke ukukalipa sana cila bushiku. Batile: “Nalimonene na badokota balekanalekana kabili nalinwine imiti yalekanalekana, lelo nshapolele.” Ba Mabel basukile babakopa kuli bongobongo uko basangile cimumena. Batile: “Calimponeshe pa musao! Nshasumiine ukuti nalikwete cimumena kuli bongobongo pa nshita yonse iyi.

“Na lyo line, nshaishibe ifyo ubulwele bwandi bwakulile mpaka fye ilyo bandepwile. Lintu nabuukile, nasangile ndi mu muputule basungila abalwele sana, kabili nshaleima. Naikalile fye ukulolesha mu mutenge. Ilyo tabalandepula, nalikosele kabili naleicitila ne fintu fyonse. Lelo ilyo bandepwile, nalefilwa ukucita icili conse. Ilyo nali mu muputule basungilamo abalwele sana naleumfwa icongo icalefuma ku tusolobelo babomfya mu cipatala, indibu shilila kuli motoka nga baleleta umulwele sana, e lyo na bantu abaleteta. Nalemona kwati nkalacula fye no kukalipwa lyonse.

“Ino nshita, ndomfwako bwino panono. Kuti nayendela ne mwine kabili limo ndaya na ku fifulo fimo neka. Lelo nshimona bwino e lyo kabili nshenda bwino sana.”

IFINGAMWAFWA UKUSHIPIKISHA

Mwilatontonkanya sana pa bwafya mukwete. Pa Amapinda 17:22, Baibolo itila: “Umutima wa nsansa muti uusuma, lelo umutima uwa bulanda umya ifupa.” Ba Mabel batile: “Ilyo natendeke ukumfwako bwino, nalekwata amafya ayo abo naleundapa balekwatako. Nga ndetukusha umubili pa kuti imicincili ikose, umubili walekalipa kabili limo nalefwaya no kuleka. Nali-ipatikishe ukuleka ukutontonkanya pa fyo nalecula, apo nalishibe ukuti ukutukusha umubili kwali no kungafwa sana.”

Muletontonkanya pe subilo mwakwata pa kuti muleshipikisha. Ba Mabel batile: “Nalisambilile muli Baibolo ico kubela amasanso. Lelo nalishibe no kuti ubushiku bonse ubwapita bulatupalamika ku nshita ilyo ukukalipwa kukapwa.” *

Muleibukisha ukuti Yehova alamubikako amano. (1 Petro 5:7) Ba Mabel balebukisha ifyo ukutontonkanya pali aya mashiwi kwabafwile. Batile: “Ilyo bantwele ku kundepula, nalimwene ukuti amashiwi yaba pali Esaya 41:10 ya cine, ayatila: ‘Witiina, pantu ndi na iwe.’ Nshakwete sana umwenso pantu nalishibe ukuti Yehova Lesa alimbikileko amano.”

Bushe mwalishiba? Baibolo isambilisha ukuti inshita ikafika ilyo abantu bakaleka ukulwala.—Esaya 33:24; 35:5, 6.

^ para. 8 Nga mulefwaya ifyebo na fimbi, belengeni icipandwa 11 mu citabo citila Bushe Cinshi Baibolo Isambilisha?