Sefania 1:1-18
1 Aya e mashiwi Yehova aebele Sefania* umwana wa kwa Kushi umwana wa kwa Gedalia umwana wa kwa Amaria umwana wa kwa Hisekia, mu nshiku sha kwa Yoshia+ umwana wa kwa Amoni+ imfumu ya Yuda:
2 Yehova atila,+ “Nkalofya conse icaba pa mushili.”
3 Yehova atila, “Nkalofya abantunse ne nama.
Nkalofya ifyuni fya mu lwelele ne sabi lya muli bemba,+Ne fya kuipununako*+ pamo na bacita ifyabipa;Kabili nkalofya abantu bonse pe sonde.
4 “Nkakanda YudaNa bonse abekala mu Yerusalemu,Kabili nkonaula ifya kwa Baali+ fyonse ifyashala pali cino cifulo,Kabili nkalofya ishina lya bashimapepo ba tulesa twa bena fyalo pamo na bashimapepo ba bufi,+
5 Na bakontamina ifya mu muulu+ pa mitenge,Na bakontama kabili abalaya ukuti bakaba ne cishinka kuli Yehova+Uku ninshi balelaya na Malkamu+ ukuti bakaba ne cishinka kuli ena;
6 Na baleka ukukonka Yehova+E lyo nabaleka ukufwaya Yehova nelyo abashifwaya ukuti alebatungulula.”+
7 Beni tondolo pa cinso ca kwa Shikulu Mulopwe Yehova, pantu ubushiku bwa kwa Yehova nabupalama.+
Yehova napekanya ilambo; nasangulula abo aita.
8 “Pa bushiku bwe lambo lyandi, ine ne Yehova nkakanda bacilolo,Abana ba mfumu,+ na bonse abafwala ifya kufwala fya ku fyalo fimbi.
9 Pali bulya bushiku, nkakanda bonse abanina pa cisebele,*Abalenga mu mayanda ya bashikulwibo mwaba ubunkalwe no bucenjeshi.
10 Pali bulya bushiku,” e fyo Yehova alanda,“Kukaba icongo ca bantu abakalalila pa Mpongolo ye Sabi,+Kukaba abakalaloosha ku citungu icipya ica musumba,+Ne ciunda icikalamba ica tupili utukabongoloka.
11 Loosheni, mwe bekala mu Makteshe,*Pantu bashimakwebo bonse nababalofya;*Bonse abapima silfere nababalofya.
12 Pali ilya nshita, nkafwailisha mu Yerusalemu ne nyali,Pa kuti nkasange no kukanda abantu abailekelesha,* abalanda mu mitima yabo abati,‘Yehova takacite icisuma kabili takacite icibi.’+
13 Bakabapokolola ifyuma fyabo kabili amayanda yabo yakashala ifibolya.+
Bakakuula amayanda, lelo tabakekalemo;Kabili bakalima amabala ya myangashi, lelo tabakanweko umwangashi.+
14 Ubushiku ubukalamba ubwa kwa Yehova nabupalama!+
Nabupalama, kabili buli no kufika nomba line!*+
Iciunda ca bushiku bwa kwa Yehova cikaba ca kutiinya.+
Muli bulya bushiku umwaume uwaishibisha ukulwa akapunda.+
15 Bulya bushiku, bukaba bushiku bwa bukali bwa kwa Lesa,+Bukaba bushiku bwa bulanda kabili ubwa kucula sana,+Bukaba bushiku bwa cimwela icikalamba kabili ubwa konaula,Pali ubu bushiku kukaba imfifi kabili kukafiita,+Kukaba amakumbi kabili kukafiita fititi,+
16 Pali bulya bushiku intandala shikalila,+Kabili abashilika bakawelesha ilyo bakasansa imisumba ya malinga ayakosa ne mpungu ishitali isha pa makoona.+
17 Nkaletela abantunse amacushi,Kabili bakalaenda nge mpofu,+Pantu ni Yehova e o babembukila.+
Umulopa wabo ukalaitilwa ngo lukungu,Ne minofu* yabo nga mafi ya nama.+
18 Silfere yabo na golde yabo tafyakabapusushe mu bushiku bwa bukali ubwa kwa Yehova;+Pa mulandu wa bukali bwakwe ubupya ngo mulilo isonde lyonse likonaulwa,+Pantu akalofya abantu pano isonde, kabili bakaloba fye bonse.”+
Amafutunoti
^ Ilyalola mu kuti “Yehova Nafisa (Nasunga).”
^ Nalimo ifi, fintu balebomfya nelyo ifyo balecita ifyakumine ukupepa utulubi.
^ Kuti lyapilibula no kuti, “icisebele ca cipuna ca mfumu.”
^ Nalimo ici cali ciputulwa ca mu Yerusalemu icali mupepi ne Mpongolo ye Sabi.
^ Mu ciHebere, “nababatalalika.”
^ Mu ciHebere, “ababa nge fisekwa fya mwangashi uwatikama ifishala panshi ya cipe.”
^ Nelyo “buleangufyanya nga nshi.”
^ Mu ciHebere, “amala.”
