Ukulingana ne fyo Marko Ailembele 9:1-50

TINIKENI

Yesu ayaluka (1-13)
Yesu aundapa umulumendo uwali ne cibanda (14-29)
- Fyonse kuti fyacitika nga ca kuti umuntu ali ne citetekelo (23)
Yesu asobela imfwa yakwe na kabili (30-32)
Abasambi bakansanina pa mukalamba pali bonse (33-37)
Onse uushitulwisha ninshi muntu wesu (38-41)
Ifilenga umuntu alufyanya (42-48)
“Muleba ngo mucele” (49, 50)

9 Kabili alabeba ati: “Ndemweba icine cine nati, bamo pa beminine pano tabakafwe nakalya mpaka bakamone Ubufumu bwa kwa Lesa bwatendeka ukuteka na maka.”+ ² Ilyo papitile inshiku 6, Yesu asendele Petro, Yakobo na Yohane no kunina nabo ulupili ulutali pa kuti babe fye beka. Kabili alyalwike ninshi balemonako;+ ³ ifya kufwala fyakwe ifya kunse fyalibengeshime kabili fyalibuutile ukucila ifyo onse uuwasha ifya kufwala pano isonde engafibuutisha. ⁴ Kabili bamwene Eliya na Mose balelanda na Yesu. ⁵ Lyena Petro aebele Yesu ati: “Mwe Kasambilisha, kuti cawama nga twaikala pano pene. E ico natupangepo insakwe shitatu, imo iyenu, imo iya kwa Mose e lyo na imbi iya kwa Eliya.” ⁶ Na kuba taishibe ifya kulanda, pantu abasambi bonse batatu balitiinine nga nshi. ⁷ Kabili kwaishile ikumbi lyabakupa, ne shiwi+ lyafumine mwi kumbi aliti: “Uyu e Mwana wandi uo natemwa.+ Muleumfwa ifyo alelanda.”+ ⁸ Ilyo line fye baloleshe konse konse nomba tabamweneko umuntu umbi, bamwene fye Yesu. ⁹ Ilyo baletentemuka ulupili, Yesu abakonkomeshe ukuti tabalingile ukwebako umuntu nangu umo ifyo bamwene,+ mpaka Umwana wa muntu akabuuke ku bafwa.+ ¹⁰ Balikonkele* ifyo Yesu abebele, lelo balilanshanye umo uku kubuuka ku bafwa uko alandilepo kwalolele. ¹¹ Kabili batendeke ukumwipusha abati: “Nomba cinshi bakalemba balandila abati Eliya+ afwile ukubalilapo ukwisa?”+ ¹² Na o abaswike ati: “Eliya e ulingile ukubalilapo ukwisa kabili nga aisa akalenga ifintu fyonse fikabe ifyo filingile ukuba;+ nomba cinshi amalembo ya mushilo yalandile ukuti Umwana wa muntu afwile ukucula nga nshi+ kabili bakamukaana?+ ¹³ Lelo ndemweba nati, na kuba ni kale Eliya+ aisa, kabili balimucitile ifyabipa ifyo balefwaya nga filya fine amalembo ya mushilo yalanda pali ena.”+ ¹⁴ Ilyo baile ku basambi bambi, bamwene ibumba ilikalamba nalibashinguluka ninshi bakalemba balekansana na basambi.+ ¹⁵ Lelo ilyo abali mwi bumba bamumwene fye, balipapile e lyo bamubutukila balamuposha. ¹⁶ E ico abepwishe ati: “Cinshi mulekansaninapo?” ¹⁷ Umo mwi bumba amwaswike ati: “Mwe Kasambilisha, ndetele umwana wandi umwaume kuli imwe pantu aba no mupashi uwalenga aba cibulu.+ ¹⁸ Lyonse ilyo wamwikata, ulamufuntula panshi, kabili alafumya ifulo ku kanwa, alasumanya ameno na maka yalapwa. Naceba abasambi benu ukuti baufumye, lelo bacifilwa.” ¹⁹ Na o abebele ati: “Kwena muli nkulo iyabula icitetekelo,+ bushe nkaba na imwe ukufika lilali? Bushe ni lilali nkaleka ukushipikisha pa fyo mucita? Muleteni kuno.”+ ²⁰ E ico bamutwele kuli Yesu, lelo ilyo umupashi wamumwene fye wafulenshe umwana, ilyo awile panshi atampile ukufulukuta uku ninshi alefumya ne fulo ku kanwa. ²¹ E lyo Yesu aipwishe wishi wa mwana ati: “Ni lilali umupashi watendeke ukumucusha?” Na o amwaswike ati: “Ukufuma fye ku bwaice, ²² kabili ilingi line ulamupoosa mu mulilo na mu menshi pa kuti umwipaye. Lelo nga mwingacitapo cimo, tumfwileni uluse no kutwafwa.” ²³ Yesu amwebele ati: “Mulandu nshi walandila auti, ‘Nga mwingacitapo cimo’! Fyonse kuti fyacitika nga ca kuti umuntu ali ne citetekelo.”+ ²⁴ Apo pene wishi wa mwana abilikishe ati: “Nalikwata icitetekelo! Ngafweni ukukosha icitetekelo candi!”+ ²⁵ Nomba ilyo Yesu amwene ukuti ibumba lyalebutukila kuli bena, akalipiile umupashi wakowela, ati: “We mupashi uwalenga uyu mwana abe cibulu kabili nkomamatwi, fuma muli ena, kabili wikabwelelamo na kabili.”+ ²⁶ Umupashi walifumine pa numa ya kubilikisha no kufulansha umwana pa miku iingi. Kabili ali fye kwati nafwa ica kuti abantu abengi baletila: “Nafwa!” ²⁷ Lelo Yesu amwikete ku kuboko no kumwimya, na o alimine. ²⁸ Ilyo aingile mu ng’anda, abasambi bakwe bamwipwishe ku mbali abati: “Cinshi ifwe twacifililwa uku-ufumya?”+ ²⁹ Na o abaswike ati: “Umupashi wa musango uyu kuti mwaufumisha fye kwi pepo.” ³⁰ Ilyo bafumine kulya, bailepita mu Galili, lelo talefwaya ukuti umuntu nangu umo eshibe. ³¹ Pantu alesambilisha abasambi bakwe ati: “Umwana wa muntu bali no kumufutuka pa kuti abalwani bakwe bakamwikate no kumwipaya,+ lelo nangu bakamwipaye pa numa ya nshiku shitatu akabuushiwa.”+ ³² Lelo tabaumfwikishe ifyo alelandapo, kabili balitiinine ukumwipusha. ³³ Lyena bafikile mu Kapernahumu. Nomba ilyo ali mu ng’anda abepwishe ati: “Cinshi mwacilakansaninapo mu nshila?”+ ³⁴ Nabo baikele fye tondolo, pantu mu nshila balekansanina pa wali umukalamba pali bena ³⁵ E ico alikele aita na batumwa bakwe 12 e lyo abeba ati: “Umuntu nga alefwaya ukuba umukalamba, afwile ukuba uwacepesha pali bonse kabili afwile ukulabombela bonse.”+ ³⁶ Lyena abuulile umwana umunono, amwiminika pa ntanshi yabo, amwikata na pa mabeya e lyo aeba abatumwa bakwe ati: ³⁷ “Onse uwapokelela umo pa bana banono+ ngo yu pa mulandu we shina lyandi, ninshi na ine ampokelela; na onse uwampokelela, ninshi te ine neka apokelela, lelo apokelela no wantumine.”+ ³⁸ Yohane amwebele ati: “Mwe Kasambilisha, twalimwene umuntu aletamfisha ifibanda mwi shina lyenu kabili twalimuleseshe, pantu tatukonka.”+ ³⁹ Lelo Yesu atile: “Mwilamulesha, pantu takuli nangu umo uucitila ifipesha amano mwi shina lyandi kabili apo pene atampa ukulanda ifyabipa pali ine. ⁴⁰ Pantu onse uushitulwisha, ninshi muntu wesu.+ ⁴¹ Kabili onse uwamupeela kapu ya menshi aya kunwa pa mulandu wa kuti muli ba kwa Kristu,+ ndemweba icine cine nati, nangu cibe shani akalambulwa.+ ⁴² Lelo onse uwapunwisha umo pali aba abacepesha abakwata icitetekelo, kuti cawama bamukakila mu mukoshi icilibwe icafina ica kupelelako cilya impunda ipindulula no kumupoosa muli bemba.+ ⁴³ “Ukuboko kobe nga kulelenga ulelufyanya, kuputuleko. Pantu cawamapo wapusuka makunkutu ukucila bakupoosa na maboko yonse yabili mu Gehena,* umwaba umulilo uushishima.+ ⁴⁴ * —— ⁴⁵ Kabili ulukasa lobe nga lulelenga ulelufyanya, luputuleko. Pantu cawama wapusuka uwalemana ukucila bakupoosa na makasa yonse yabili mu Gehena.*+ ⁴⁶ * —— ⁴⁷ Kabili ilinso lyobe nga lilelenga ulelufyanya, lipoose.+ Pantu cawamapo waingila ne linso limo mu Bufumu bwa kwa Lesa, ukucila bakupoosa mu Gehena*+ na menso yonse yabili, ⁴⁸ umo imititi ishifwa kabili umo umulilo ushishima.+ ⁴⁹ “Pantu bonse balingile ukulungwamo umucele wa mulilo.+ ⁵⁰ Umucele usuma, lelo umucele nga wafumuka, cinshi mwingabikamo pa kuti ulowe na kabili?+ Na imwe bene muleba ngo mucele,+ kabili muleikala umutende na banenu.”+