Ukulingana ne fyo Marko Ailembele 12:1-44

TINIKENI

Icilangililo ca babomfi ba mwi bala abaleipaya abasha (1-12)
Lesa na Kaisare (13-17)
Baipusha Yesu icipusho pa kubuushiwa (18-27)
Amafunde yabili ayakalamba pali yonse (28-34)
Bushe Kristu mwana wa kwa Davidi? (35-37a)
Yesu asoka bakalemba (37b-40)
Utundalama tubili utwa kwa mukamfwilwa umupiina (41-44)

12 Lyena atendeke ukubasambilishisha mu filangililo ati: “Umuntu alilimine ibala lya myangashi+ ashingulushako ne linga, e lyo aimba umwa kukamina imyangashi. Lyena akuulilemo ulupungu,+ aseekeshe ne bala lyakwe ku balimi e lyo aya ku calo ca kutali.+ ² Ilyo inshita ya kusombola ifisabo yafikile, atumine umusha ku balimi pa kuti ayemusendelako ifisabo fya mwi bala lya myangashi. ³ Lelo balimwikete, bamupuma e lyo bamuleka abwelelamo minwe nkutwa. ⁴ Atumine umusha na umbi ku balimi, na o balimumine ku mutwe kabili balimusaalwile.+ ⁵ Atumineko umusha na umbi, uyu ena balimwipeye. Alitumineko na bambi abengi, bamo pali aba balibapumine bambi balibepeye. ⁶ Ashele fye no muntu umo, umwana wakwe umwaume uo atemenwe+ nga nshi. Pa kulekelesha e o atumineko, pantu aleti: ‘Ifi mwana wandi bakamucindika.’ ⁷ Lelo balya balimi balilanshenye abati, ‘Uyu e mpyani.+ Natumwipaye pa kuti ibala libe lyesu.’ ⁸ E ico balimusendele, bamwipaya, bamupoosa na kunse ye bala lya myangashi.+ ⁹ Cinshi umwine we bala lya myangashi akesacita aba balimi? Akesabepaya akapeele ne bala lya myangashi kuli bambi.+ ¹⁰ Bushe tamwabelenga? Ilembo litila: ‘Ilibwe ilyo bakakuula bakeene, e lyaishileba pa muulu pa koona.*+ ¹¹ Ili libwe lyafuma kuli Yehova* kabili tulimona ukuti cipesha mano.’”+ ¹² Ilyo bailwike ukuti e bo alelandapo muli ci cilangililo, balefwaya ukumwikata, lelo baletiina ibumba. E ico balifuminepo baya.+ ¹³ Lyena bamutumiine abaFarise bamo na ba mu kabungwe ka kwa Herode, pa kuti bamwikatile mu milandile yakwe.+ ¹⁴ Ilyo bafikile, bamwebele abati: “Mwe Kasambilisha, twalishiba ukuti mulanda icishinka, tamutiina umuntu nangu umo, pantu tamulolesha pa fyo abantu bamoneka, lelo musambilisha inshila ya kwa Lesa mu cine. Bushe amafunde yalisuminisha* ukusonkela umusonko kuli Kaisare nelyo iyo? ¹⁵ Bushe tufwile ukulasonkela nelyo tatufwile ukulasonkela?” Nomba apo alishibe ubumbimunda bwabo, abebele ati: “Mulandu nshi mulenjesesha? Ndeteleni indalama imo iya denari* imonepo.” ¹⁶ Nabo balimuleteele, e lyo abepusha ati: “Bushe uyu umutwe ne fi balembapo fya kwa nani?” Nabo bamwaswike abati: “Fya kwa Kaisare.” ¹⁷ E lyo Yesu abeba ati: “Kanshi ifya kwa Kaisare mulepeela Kaisare,+ e lyo ifya kwa Lesa mulepeela Lesa.”+ E ico balipapile pa fyo abaswike. ¹⁸ Nomba abaSaduke abalanda ati abafwa tabakabuushiwe+ baishile kuli Yesu, e lyo bamwipusha abati:+ ¹⁹ “Mwe Kasambilisha, Mose atulembeele ati, umuntu nga afwa asha umukashi ukwabula ukufyalamo umwana, munyina+ afwile ukuupa umukashi wakwe pa kuti engamufyalila abana. ²⁰ Kwali aba bwananyina 7. Uwakubalilapo alyupile e lyo afwa ukwabula ukukwatapo umwana. ²¹ No walenga bubili na o wine alimuupile, lelo tafyelemo umwana. Ifi fine e fyo cali na ku walenga butatu. ²² Bonse 7 bafwile fye ukwabula ukufyalamo umwana. Na mukulekelesha uyu mwanakashi na o wine alifwile. ²³ Ilyo abafwa bakabuushiwa, bushe akaba mukashi wa kwa nani? Pantu bonse 7 balimuupilepo.” ²⁴ Na o Yesu abebele ati: “Mwaliluba pantu tamwaishiba Amalembo na maka ya kwa Lesa.+ ²⁵ Pantu abantu nga babuushiwa abaume taboopa, abanakashi nabo taboopwa, lelo baba nga bamalaika mu muulu.+ ²⁶ Nomba bushe tamwabelenga pa kubuuka ku bafwa mwi buuku lya kwa Mose, mu lyashi lya pa cimpusa ilyo Lesa amwebele ati: ‘Nine Lesa wa kwa Abrahamu, Lesa wa kwa Isaki kabili Lesa wa kwa Yakobo’?+ ²⁷ Ni Lesa wa ba mweo, te Lesa wa bafwa iyo. Mwaliluba sana.”+ ²⁸ Umo pali bakalemba alyumfwile ilyo balekansana kabili alyumfwile ukuti alibaswike bwino. E ico amwipwishe ati: “Lifunde nshi ilya kubalilapo pa mafunde yonse?”+ ²⁹ Yesu ayaswike ati: “Ilya kubalilapo* ni li, ‘Umfweni mwe bana ba kwa Israele, Yehova* Lesa wesu ni Yehova* umo, ³⁰ kabili mulingile ukutemwa Yehova* Lesa wenu no mutima wenu onse, no mweo* wenu onse, no kutontonkanya kwenu konse, na maka yenu yonse.’+ ³¹ Ilyalenga bubili ni li, ‘Uletemwa umunobe nge fyo waitemwa we mwine.’+ Takwaba ifunde limbi ilyacila aya.” ³² Na o kalemba amwebele ati: “Mwe Kasambilisha, mwalanda icine, ‘Aba fye Umo, kabili takwaba na umbi’;+ ³³ kabili ukutemwa Lesa no mutima onse, na mano* yonse, na maka yonse, no kutemwa umunobe nge fyo waitemwa we mwine, kwalicindama ukucila imituulo ya koca yonse na malambo.”+ ³⁴ Ilyo Yesu amwene ukuti alyaswike na mano, amwebele ati: “Tauli ukutali no Bufumu bwa kwa Lesa.” Lelo takwali nangu umo uwali na maka ya kumwipusha na fimbi.+ ³⁵ Lelo ilyo Yesu alesambilisha mwi tempele alandile ati: “Bushe cinshi bakalemba balandila ukuti Kristu mwana wa kwa Davidi?+ ³⁶ Ilyo Davidi apokelele umupashi+ wa mushilo, umwine alandile ati, ‘Yehova* aebele Shikulu ati: “Ikala ku kuboko kwandi ukwa ku kulyo mpaka nkabike abalwani bobe pe samba lya makasa yobe.”’+ ³⁷ Davidi umwine amwitile ati ‘Shikulu,’ nomba kuti aba shani umwana+ wakwe?” Kabili ibumba ilikalamba lyali ne nsansa ilyo lyalekutika ifyo alelanda. ³⁸ Kabili pa kusambilisha abebele ati: “Mulecenjela kuli bakalemba abafwaya ukwendauka ninshi nabafwala ifya kufwala fya mucinshi kabili abafwaya abantu balebaposha pa maliketi.+ ³⁹ Abafwaya ukwikala pa fipuna fya ku ntanshi* mu masunagoge no kwikala apacindamisha ilyo balelya umulaalilo.+ ⁴⁰ Balapoka bamukamfwilwa ifyo bakwata* kabili bapepa amapepo ayatali pa kuti abantu babamone.* Aba e bo bakakanda sana.” ⁴¹ Lyena Yesu aikele apalungatene ne cipao,+ alelolekesha ifyo abantu balebika indalama mu cipao kabili abakankaala abengi balebikamo indalama ishingi.+ ⁴² Nomba mukamfwilwa umupiina ailebikamo utundalama tubili, utunono sana.*+ ⁴³ E ico Yesu aitile abasambi no kubeba ati: “Ndemweba icine cine nati, indalama isho uyu mukamfwilwa abikilemo nashicila isho bonse ababikile indalama mu cipao+ babikilemo. ⁴⁴ Pantu bonse babikilemo indalama isho bacifumya pa shipulile pa sho bakwata, lelo ena nangu mupiina, nabikamo shonse isho acikwata isha kuliilamo.”+