Amose 2:1-16
2 “Yehova atila,‘“Pa milandu* itatu na pa milandu 4 iyo abena Moabu+ bacitile, nshakaalule ubupingushi bwandi,Pantu baocele amafupa ya mfumu ya bena Edomu ica kuti yaba imito.
2 E ico nkatuma umulilo mu Moabu,Na o ukoca amayanda ya malinga ayakosa aya mu Keriyote;+Abena Moabu bakafwa ilyo kukaba icimfulunganya,Ilyo abashilika bakalapanga icongo ca nkondo, kabili ilyo intandala ikalalila.+
3 Nkafumyapo kateka* waboKabili nkamwipaila pamo na bacilolo bakwe bonse,”+ e fyo Yehova alanda.’
4 Yehova atila,‘Pa milandu* itatu na pa milandu 4 iyo abaYuda bacitile,+ nshakaalule ubupingushi bwandiPantu balekaana ukukonka amafunde ya kwa Yehova,Kabili balekaana ukukonka ifipope fyakwe;+Balulumba fye pantu balekonka ifya bufi ifyo ifikolwe fyabo fyalekonka.+
5 E ico nkatuma umulilo mu Yuda,Kabili ukoca amayanda ya malinga ayakosa aya mu Yerusalemu.’+
6 Yehova alanda ukuti,‘Pa milandu* itatu na pa milandu 4 iyo abena Israele bacitile+ nshakaalule ubupingushi bwandi,Pantu baleshitisha abantu abalungama mu ndalama sha silfere,Kabili abapiina balebakabulamo ne ndyato.+
7 Balanyantilila abapiina,*+Kabili balacilika inshila ya bafuuka.+
Umwana na wishi balaala no mukashana umo wine,Kabili bakowesha ishina lyandi ilya mushilo.
8 Balanshika ifya kufwala ifyo bapoka ku bapiina ababakwatila inkongole*+ mupepi ne fiipailo fyonse+ no kulambalalapo;Kabili umwangashi uo banwena mu ng’anda* ya balesa babo untu bashitile mu ndalama isho balipilishe abapiina.’
9 ‘Nine nalofeshe abena Amore abali abalwani babo,+Abalepele nge fimuti ifitali icine cine* kabili abakosele nge fimuti ifyakosa nga nshi;*Nalofeshe ne fisabo fyabo ku muulu ne mishila yabo panshi.+
10 Nalimufumishe mu calo ca Egupti,+Kabili nalengele mwaenda mu matololo pa myaka 40,+Pa kuti mupoke icalo ca bena Amore.
11 Nalilengele abana benu bamo baba bakasesema+Kabili nalilengele abalumendo benu bamo baba abaNasiri.+
Bushe te fyo cali, mwe bena Israele?’ e fyo Yehova alanda.
12 ‘Lelo mwalenwesha abaNasiri umwangashi,+Kabili mwaebele bakasesema amuti: “Mwilasesema.”+
13 Nkamushonawila uko kwine muli,Nga filya iceleta ilyaisulamo imyanshi* ya ngano lishonaula ifili apo lilepita.
14 Umuntu uubutukisha takakwate ukwa kufulumukila,+Uwa maka takakwate amaka ya kuipokolola,Kabili umuntu uwaishiba sana ukulwa takaipusushe.*
15 Uulwa ukubomfya ubuta takapusuke,Uubutukisha takafulumuke,Kabili uunina pali bakabalwe takafulumuke no kuipususha.*
16 No mwaume uwashipa sana pa baishiba sana ukulwaAkafulumuka ubwamba pali bulya bushiku,’+ e fyo Yehova alanda.”
Amafutunoti
^ Nelyo “pa fyo bapondweke.”
^ Mu ciHebere, “kapingula.”
^ Nelyo “pa fyo bapondweke.”
^ Nelyo “pa fyo bapondweke.”
^ Nelyo “balenyantilila abapiina mu lukungu.”
^ Nelyo “itempele.”
^ Nelyo “icikatilo.”
^ Mu ciHebere, “imikedari.”
^ Mu ciHebere, “imioke.”
^ Nelyo “imipo.”
^ Nelyo “takapusushe umweo wakwe.
^ Nelyo “ukupususha umweo wakwe.”
