Ibuuku lya Kubalilapo Ilya Imilandu 22:1-19
22 Lyena Davidi alandile ati: “Iyi e ng’anda ya kwa Yehova Lesa wa cine, kabili ici e ciipailo ico abena Israele bakalatuulilapo amalambo ya koca.”+
2 E lyo Davidi atumine aba kulonganika abalebeshi+ abali mu calo ca bena Israele, kabili abapeele umulimo wa kuputula bwino bwino amabwe ya kukuulila ing’anda ya kwa Lesa wa cine.+
3 Kabili Davidi apekenye ifyela ifingi ifya kupangila imisomali ya ku fiibi fya mpongolo ne fya kwikatanishishako imbao. Alipekenye no mukuba uwingi nga nshi ica kuti balifililwe uku-upima,+
4 ne mbao sha mikedari+ isho bafililwe no kupenda, pantu abena Sidone+ na bena Turi+ baleteele Davidi imbao sha mikedari ishingi nga nshi.
5 Kabili Davidi alandile ati: “Solomone umwana wandi mwaice kabili taishiba ifingi,*+ kabili ing’anda iyo alingile ukukuulila Yehova ifwile ukuba iyacindama nga nshi+ pa kuti ikawame kabili ikalumbuke+ mu fyalo fyonse.+ Kanshi nalamupekanishisha ifya kukuulila.” E ico Davidi apekenye ifya kukuulila ing’anda ifingi nga nshi ilyo ashilafwa.
6 Kabili aitile Solomone umwana wakwe pa kuti amwebe ifya kukonka pa kukuulila Yehova Lesa wa kwa Israele ing’anda.
7 Davidi aebele Solomone umwana wakwe ati: “Ine nalefwaisha ukukuulila Yehova Lesa wandi ing’anda iya kulenga ishina lyakwe lyacindikwa.+
8 Lelo Yehova anjebele ati, ‘Walisumya umulopa uwingi nga nshi, kabili walilwa inkondo ishikalamba. Tawakakuule ing’anda iikalenga ishina lyandi likacindikwe+ pantu walisumya umulopa uwingi pe sonde pa cinso candi.
9 Mona! Ukafyala umwana umwaume+ uukaba umuntu wa mutende, kabili nkalenga akatuushe ku balwani bakwe bonse abakamushinguluka,+ pantu ishina lyakwe akaba ni Solomone.*+ Ilyo akalateka, nkalenga abena Israele bakaleikala umutende kabili mu mutelelwe.+
10 E ukakuula ing’anda iikalenga ishina lyandi likacindikwe.+ Akaba umwana wandi kabili nkaba wishi.+ Nkakosha ubufumu bwakwe pa bena Israele umuyayaya.’+
11 “Nomba mwana wandi, Yehova abe na iwe, pa kuti ukakuulile Yehova Lesa obe ing’anda, nga fintu alanda pali iwe.+
12 Yehova nakalenge ukabe uwa mano kabili akalenge ukaleiluka ifintu+ ilyo akakupeela amaka ya kuteka abena Israele pa kuti ukalekonka amafunde ya kwa Yehova Lesa obe.+
13 Nga wakulakonka ifyo Yehova akulakweba+ no bupingushi bwakwe ifyo apeele abena Israele ukupitila muli Mose,+ ifintu fikalakwendela bwino. Shipa kabili kosa. Witiina kabili witutuma.+
14 Mona! Naliculile sana pa kuti mpekanye ifya kukuulila ing’anda ya kwa Yehova. Nalipekanya amatalanti* ya golde 100,000, amatalanti ya silfere 1,000,000, kabili nalipekanya umukuba uwingi ne fyela ifingi+ ica kuti te kuti bafipime. Nalipekanya ne mbao na mabwe,+ lelo ukalundepo.
15 Naukwata ababomfi abengi aba kubomba imilimo, e kutila aba kuputula amabwe, abaishiba ifya kukuula na mabwe,+ bakabasa na bonse abaishibisha ukubomba imilimo.+
16 Naukwata golde, silfere, umukuba ne fyela ifingi sana ifya kuti no kupima te kuti tufipime.+ E ico ima utampe ukubomba kabili Yehova engaba na iwe.”+
17 Lyena Davidi aebele bacilolo bonse aba mu Israele ukuti baleafwa Solomone umwana wakwe. Abebele ati:
18 “Bushe Yehova Lesa wenu taaba na imwe, kabili bushe talenga mu calo cenu conse mwaba umutende? Pantu alingafwa pa kuti ncimfye abekala muli cino calo, kabili Yehova na bantu bakwe e bakwata amaka pali ici calo.
19 Nomba lyonse mulepepa Yehova Lesa wenu+ ne mitima yenu yonse ne myeo* yenu yonse, kabili tampeni ukukuulila Yehova Lesa wa cine icifulo ca mushilo,+ pa kuti mukalete icipao ca cipangano ica kwa Yehova ne fipe fya mushilo ifya kwa Lesa wa cine+ ku ng’anda iyo mukakuula iikalenga ishina lya kwa Yehova likacindikwe.”+
Amafutunoti
^ Nelyo “talakosa.”
^ Lyafuma kwi shiwi lya ciHebere ilipilibula ukuti “Umutende.”
^ Italanti lyalefina amakilogramu ukucilako panono pali 34. Moneni Ifyebo Fyalundwako pa B14.
