Ibuuku lya Kubalilapo Ilya Imilandu 10:1-14
-
Shauli na bana bakwe abaume bafwa (1-14)
10 Nomba abaPelishiti balelwa na bena Israele. Kabili abena Israele bafulumwike abaPelishiti. Lyena abaPelishiti baipaile abena Israele abengi pa Lupili lwa Gilboa.+
2 AbaPelishiti balipaleme sana kuli Shauli na bana bakwe, kabili baipeye Yonatani, Abinadabu na Malkishua,+ abana ba kwa Shauli abaume.
3 Inkondo yakoseele Shauli, kabili ilyo abalepoosa imifwi bamusangile, balimucenene.+
4 Lyena Shauli aebele uwalesenda ifyanso fyakwe ati: “Somona ulupanga lobe undase, lupule no kupula pa kuti aba bantu abashasembululwa beisampulinkanya ulupanga no kunjipaya bunkalwe bunkalwe.”+ Lelo uwalemusendela ifyanso talefwaya ukumulasa pantu ali no mwenso nga nshi. E ico Shauli abuulile ulupanga aisonta e lyo awilako.+
5 Ilyo uwalesendela Shauli ifyanso amwene ukuti afwa, na o abuulile ulupanga lwakwe aisonta e lyo awilako, e fyo na o afwile.
6 E fyo Shauli na bana bakwe abaume batatu bafwile, kabili bonse aba mu ng’anda yakwe abo ali nabo bafwilile pamo.+
7 Ilyo abena Israele abaleikala mu mupokapoka* baishibe ukuti abashilika abena Israele balifulumwike, no kuti Shauli na bana bakwe abaume balifwile, batendeke ukufulumuka mu misumba. Lyena abaPelishiti balishile, batampa no kwikalamo.
8 Ubushiku bwakonkelepo ilyo abaPelishiti baishile mu kusenda ifintu fya bantu abo baipeye, basangile Shauli na bana bakwe abaume nabafwa pa Lupili lwa Gilboa.+
9 E ico balimufulile ifya kufwala fya nkondo, bamuputulako umutwe, e lyo batuma aba kuyabila imbila mu calo conse ica baPelishiti pa kuti beshibishe aba mu mayanda ya tulubi+ twabo na bantu.
10 Lyena babikile ifya kufwala fyakwe ifya nkondo mu ng’anda* ya kalesa kabo, kabili umutwe wakwe baupoopeele pa cibumba ca ng’anda ya kwa Dagone.+
11 Ilyo abena Yabeshe+ mu Gileadi baumfwile ifyo abaPelishiti bacitile icitumbi ca kwa Shauli,+
12 abashilika bonse balimine bayasenda icitumbi ca kwa Shauli ne fitumbi fya bana bakwe abaume. Bafiletele ku Yabeshe kabili bashiikile amafupa yabo mwi samba lya cimuti icikalamba mu Yabeshe,+ kabili balifungile pa nshiku 7.
13 E fyo Shauli afwile pantu tali ne cishinka kuli Yehova pa mulandu wa kuti takonkele ifyo Yehova amwebele+ kabili aileipusha uwaleumfwana ne mipashi ifyo alingile ukucita,+
14 mu cifulo ca kwipusha Yehova. E ico alimwipeye, apeela na Davidi umwana wa kwa Yese ubufumu.+
