Obadia 1:1-21
1 Icimonwa ca kwa Obadia:
Shikulu Mulopwe Yehova atila pali Edomu:+ “Natumfwa imbila ukufuma kuli Yehova, kabili kuli ne nkombe iituminwe mu nko, iileti, ‘Imeni, iseni tumwimine mu bulwi.’”+
2 “Mona! Nalikucefya mu nko.+ Walisuulwa icine cine.+
3 Ukuituntumba kwa mu mutima obe e kwakubepaika,+ we wikala mu cilibwe ica kuubamo,+ we wikala pa muulu mu mpili, kabili we utila mu mutima obe, ‘Nani akantentemushisha pe sonde?’
4 Nga wayaikala apatali kwati ni kapumpe, nelyo nga wabika icisansala cobe mu ntanda, ukufuma uko kwine e ko nkakutentemushisha,”+ e fyasosa Yehova.
5 “Abapuupu nga e bakwishile, abapokolola ifyuma nga e bakwingilile ubushiku, bushe nga bakupeseshe pi ukukwibila?+ Bushe nga tabaibile fye apo balefwaila? Nelyo abasaba imyangashi nga e bakwingilile, bushe nga tabashileko fye iya kutolelesha?+
6 Yangu ifyo aba kwa Esau basangwa!+ Ifyo ifyuma fyakwe ifyafiswa fyasokololwa!
7 Bakutamfisha ku mupaka. Abantu abo wapangana na bo icipangano bonse bakubepa.+ Abantu waba na bo umutende bakucimfya.+ Abalya na iwe bakateya isumbu mwi samba lyobe kwati tawakwata amano.+
8 Bushe tacakabe ifyo fine muli ubo bushiku?” e fyasosa Yehova.
“Kabili nkalofya aba mano muli Edomu,+ na beluka aba mu calo ca mpili ica kwa Esau.
9 Kabili impalume shobe shikatutuma,+ we Temani,+ pantu umo umo akepaiwa+ mu calo ca mpili ica kwa Esau.+
10 Pa mulandu wa kuba no bunkalwe kuli munonko Yakobo,+ insoni shikakufimba,+ kabili ukaloba umuyayaya.+
11 Mu bushiku waiminine akatalamukila, mu bushiku ilyo bambi bambi basendele abashilika bakwe muli bunkole+ na lintu abena fyalo baingile pa mpongolo yakwe+ no kupendwila pali Yerusalemu,+ na iwe wali nga bena.
12 “Awe nga tawatambile mu bushiku bwa kwa munonko,+ mu bushiku bwa kucula kwakwe; kabili nga tawasekelele pa bana ba kwa Yuda mu bushiku baleipaiwa;+ kabili nga tawakushishe akanwa mu bushiku bali no bulanda.
13 Nga tawaishile mu mpongolo ya bantu bandi mu bushiku bwa bucushi bwabo.+ Nga tawatambile ukucula kwa kwa Yuda mu bushiku bwakwe ubwa bucushi; kabili nga tawatambike ukuboko kobe pa cuma cakwe mu bushiku bwakwe ubwa bucushi.+
14 Awe nga tawaiminine pa mampatu ya nshila, ku kwipaya imbutushi shakwe;+ kabili nga tawabweseeshe abapuswike ku balwani babo mu bushiku bwa kucula kwabo.+
15 Pantu ubushiku bwa kwa Yehova ubwa kukanda inko shonse nabupalama.+ Ifyo wacitile, e fikacitwa na kuli iwe.+ Imicitile yobe ikabwelela pa mutwe obe.+
16 Pantu ifyo imwe mwanwena pa lupili lwandi ulwa mushilo, e fyo ne nko shonse shikalanwa lyonse.+ Awe shikanwa no kukubaula kabili shikaba kwati nalimo tashaliko.
17 “Na mu Lupili lwa Sione mukabamo abakapusuka,+ kabili lukaba ulwa mushilo;+ na ba mu ng’anda ya kwa Yakobo bakaibuulila ifintu ififwile ukuba ifyabo.+
18 Kabili aba mu ng’anda ya kwa Yakobo bakaba ngo mulilo,+ na ba mu ng’anda ya kwa Yosefe bakaba ngo lubingu, na ba mu ng’anda ya kwa Esau bakaba nge cani;+ kabili bakabasonteka no kubonaula. Na mu ng’anda ya kwa Esau tamwakabe uwa kupusuka;+ pantu Yehova umwine e walanda.
19 Kabili bakabuula Negebu ukuba icalo cabo, ne calo ca mpili ica kwa Esau,+ na Shefela, e lyo ne calo ca baPelishiti.+ Kabili bakabuula icalo ca kwa Efraimu+ ukuba icalo cabo ne mpanga ya Samaria;+ na Benjamini akabuula Gileadi ukuba impanga yakwe.+
20 Kumfwa bankole aba lupungu ulu,+ abana ba kwa Israele, e bakakwata ico abena Kanaani+ bakwete ukufika ku Sarefati.+ Kabili bankole ba ku Yerusalemu, abali mu Sefaradi, bakabuula imisumba ya mu Negebu na yo ikaba yabo.+
21 “Kabili aba kupususha+ bakanina Ulupili lwa Sione,+ ku kupingula icalo ca mpili ica kwa Esau;+ no bufumu bukaba bwa kwa Yehova.”+
