Obadia 1:1-21
1 Icimonwa Obadia* amwene:
Ifi e fyo Shikulu Mulopwe Yehova alanda pali Edomu:+
“Natumfwa imbila iifumine kuli Yehova,Natuma inkombe ukuyaeba inko ati:
‘Imeni, tuipekanye tuyelwa nankwe.’”+
2 “Mona! Nalilenga inko shilekumona ukuti tawacindama;Walisuulwa icine cine;+
3 Ukuituntumba kwa mu mutima obe e kwakubepaika,+We wikala mu cilibwe ica kuubamo,We wikala mu mpili, kabili we utila mu mutima obe,‘Nani akantentemushisha panshi?’
4 Nangu wingekala apatali* kwati ni kapumpe,Nelyo wingabika icisansala cobe mu ntanda,Nkakutentemusha,” e fyo Yehova alanda.
5 “Abapuupu nga e bakwishiile, abapokolola ifyuma nga e bakwingilile ubushiku,Bushe nga tabaibile fye ifyo balefwaya?
Nelyo abasaba imyangashi nga e bakwingilile,
Bushe nga tabashilemo iya kutolelesha?+(Lelo iwe abalwani bobe bakakonaula umupwilapo!)*
6 Yangu ifyo aba kwa Esau babasanga!
Ifyo ifyuma fyabo ifyafiswa fyasokololwa!
7 Bakutamfisha ku mupaka.
Bonse abo wapangana nabo icipangano bakubepa.
Abantu abo umfwana nabo bakucimfya.
Abo ulya nabo bakakuteya isumbu,Lelo tawakeluke.
8 Muli bulya bushiku,” e fyo Yehova alanda,“Nkalofya aba mano muli Edomu,+Na beluka aba mu calo ca mpili ica kwa Esau.
9 Kabili abashilika bobe bakatutuma,+ we Temani,+Pantu umo umo akepaiwa mu calo ca mpili ica kwa Esau.+
10 Apo wali umunkalwe kuli munonko Yakobo,+Ukaseebana icine cine,+Kabili ukaloba umuyayaya.+
11 Pa bushiku waiminine akatalamukila,Pa bushiku abalwani* basendele abashilika bakwe pa kuti bayeba bankole,+Na lintu abalwani* baingile pa mpongolo yakwe no kupendwila+ pali Yerusalemu,Na iwe wali nga bena.
12 Nga tawa-angile pa bushiku munonko alecula;+Nga tawasekelele pa bushiku abantu ba kwa Yuda baleipaiwa,+Kabili nga tawalebapumya pa bushiku bali no bulanda.
13 Nga tawaishile mu mpongolo ya bantu bandi mu bushiku balecula.+Nga tawa-angile mu bushiku Yuda alecula;Kabili nga tawatapile icuma cakwe mu bushiku alecula.+
14 Nga tawaiminine pa mampatu ya nshila ku kwipaya abalefulumuka,+Kabili nga tawalebwesesha abalepusuka ku balwani babo mu bushiku balecula.+
15 Ubushiku bwa kwa Yehova ubwa kukanda inko shonse nabupalama.+
Ifyo wacitile, e fikacitwa na kuli iwe.+
Ifyo wacitile kuli bena, e fyo na iwe bambi bakakucita.
16 Pantu filya mwalenwena umwangashi pa lupili lwandi ulwa mushilo,E fyo ne nko shonse shikalanwa icipyu candi ngo mwangashi.+
Shikanwa no kukubaula icipyu candi,Kabili shikaba kwati tashatalile ashibako.
17 Lelo pa Lupili lwa Sione pakaba abakapusuka,+Kabili lukaba ulwa mushilo;+Na ba mu ng’anda ya kwa Yakobo bakapokolola ifintu fyabo.+
18 Aba mu ng’anda ya kwa Yakobo bakaba ngo mulilo,Aba mu ng’anda ya kwa Yosefe bakaba ngo lubingu,Na ba mu ng’anda ya kwa Esau bakaba nge cani;Bakaboca kabili bakaloba,Kabili mu ng’anda ya kwa Esau tamwakabe uukapusuka,+Pantu Yehova umwine nalanda.
19 Negebu ne citungu ca mpili ica kwa Esau fikaba fyabo,+Kabili icitungu ca Shefela ne calo ca baPelishiti na fyo fikaba fyabo.+
Impanga ya kwa Efraimu ne ya Samaria shikaba shabo,+Na Benjamini akabuula Gileadi ikabe impanga yakwe.
20 Bankole ba ulu ulupungu,*+Abana ba kwa Israele, e bakakwata icalo ca bena Kanaani ukufika ku Sarefati.+
Kabili bankole abena Yerusalemu, abali mu Sefaradi, bakabuula imisumba ya mu Negebu ikabe yabo.+
21 Kabili aba kupususha bakanina Ulupili lwa Sione,Ku kupingula icalo ca mpili ica kwa Esau,+Kabili Yehova akaba Imfumu.”+
