1, 2. Sairisay an pira sa mga amigo ni Jehova?

SIISAY an gusto mong magin amigo? Siyempre idtong tawo na gusto mo an personalidad. Sarong tawong makakasundo mo saka makakasundo ka man. Sarong tawo na mabuot saka may mga ugali na hinahangaan mo.

² May mga tawong nagin amigo kan Diyos na Jehova. Saro diyan si Abraham. (Isaias 41:8; Santiago 2:23) Amigo man ni Jehova si David. Sinabi niya na si David ‘sarong lalaking inuuyunan kan saiyang puso.’ (Gibo 13:22) Iyo man an propetang si Daniel, na ‘namutan na gayo’ ni Jehova.—Daniel 9:23.

3. Taano ta nagin amigo ni Jehova si Abraham, David, asin Daniel?

³ Paano nagin amigo ni Jehova si Abraham, David, asin Daniel? Sinabi ni Jehova ki Abraham: ‘Nagkuyog ka sa sako.’ (Genesis 22:18) Nagigin amigo ni Jehova an sarong tawo kun mapakumbaba ining nagsusunod sa saiya. Dawa bilog na nasyon puwedeng magin amigo niya. Sinabi ni Jehova sa nasyon nin Israel: ‘Danguga nindo an sakuyang tingog, asin magigin Diyos ako sa saindo, asin kamo magigin banwaan ko.’ (Jeremias 7:23) Kaya kun gusto mo talagang magin amigo ni Jehova, kaipuhan mo man na sunudon siya.

4, 5. Paano pinoprotektaran ni Jehova an saiyang mga amigo?

⁴ Sinasabi kan Bibliya na naghahanap si Jehova nin mga paagi “tanganing ipahiling an saiyang kusog alang-alang sa mga bilog an debosyon kan puso para sa saiya.” (2 Cronica 16:9, NW) Sa Salmo 32:8, nangangako si Jehova sa saiyang mga amigo: “Tatawan taka nin pakasabot asin tutukduan  taka manungod sa dalan na dapat lakawan mo. Tatawan taka nin sadol mantang nakahiling ako sa saimo.” (NW)

⁵ Sarong makapangyarihan na kaiwal an habo na magin amigo kita nin Diyos. Pero gusto kitang protektaran ni Jehova. (Basahon an Salmo 55:22.) Bilang mga amigo ni Jehova, pinaglilingkudan ta siya nin bilog na puso. Gusto ta siyang sunudon dawa sa dipisil na mga sitwasyon. Nagtitiwala man kita ki Jehova arog kan salmista kan sabihon niya mapadapit ki Jehova: “Huling yaon siya sa sakuyang tuo, dai ako matatanyog nuarin man.” (Salmo 16:8, NW; 63:8) Ano an ginigibo ni Satanas tanganing dai kita magin amigo nin Diyos?

6. Ano an akusasyon ni Satanas sa mga tawo?

⁶ Nanudan niyato sa Kapitulo 11 na kinuwestiyon ni Satanas si Jehova saka inakusaran Siya na putikon asin bakong makatanusan ta dai Niya tinugutan si Adan asin Eva na magdesisyon para sa saindang sadiri kun ano an tama asin kun ano an sala. Itinutukdo sa sato kan libro sa Bibliya na Job na inaakusaran ni Satanas pati an mga tawong gustong magin amigo an Diyos. Sinasabi ni Satanas na naglilingkod sinda sa Diyos huli sana sa makukua nindang pakinabang hali Saiya, bakong huli ta namumutan ninda Siya. Sinabi pa ngani ni Satanas na kaya niyang patalikudon sa Diyos an siisay man. Hilingon ta kun ano an manunudan ta ki Job asin kun paano siya prinotektaran ni Jehova.

7, 8. (a) Ano an paghiling ni Jehova ki Job? (b) Ano an sinabi ni Satanas manungod ki Job?

⁷ Siisay si Job? Saro siyang marahay na tawo na nabuhay mga 3,600 na taon na an nakaagi. Sinabi ni Jehova na kan panahon na idto, mayong tawo sa daga na arog ki Job. Dakula an paggalang ni Job sa Diyos, saka anggot siya sa maraot na gibo. (Job 1:8) Iyo, si Job tunay na amigo ni Jehova.

⁸ Gustong paluwason ni Satanas na naglilingkod sana si Job sa Diyos huli sa makasadiring motibo. Sinabi niya ki  Jehova: “Bakong nagbugtak ka nin nagpoprotektar na kudal sa palibot niya asin kan saiyang pamilya saka kan gabos na pagsadiri niya? Binebendisyunan mo an gabos na ginigibo niya, asin pinapadakul mo an saiyang mga ataman na hayop. Pero, para mapaiba naman, unata an saimong kamot asin halion mo an gabos na yaon sa saiya, asin siguradong susumpaon ka niya nin hampangan.”—Job 1:10, 11, NW.

9. Ano an itinugot ni Jehova na gibuhon ni Satanas?

⁹ Inakusaran ni Satanas si Job na naglilingkod lang ini ki Jehova dahil sa makukua kaining pakinabang. Sinabi man ni Satanas na kaya niyang papunduhon si Job sa paglilingkod ki Jehova. Dai uyon si Jehova ki Satanas, pero tinugutan Niya si Satanas na purbaran si Job para mahiling kun baga talagang amigo kaini si Jehova huli sa pagkamuot kaini sa Saiya.

10. Paano inatake ni Satanas si Job, asin ano an nagin reaksiyon ni Job?

¹⁰ Inot, hinarabon asin ginaradan ni Satanas an gabos na ataman na hayop ni Job. Dangan ginadan ni Satanas an haros gabos na suruguon ni Job. Nawara an gabos na pagsadiri niya. Sa huring pag-atake, ginadan ni Satanas an sampulong aki ni Job paagi sa sarong bagyo. Pero padagos na nagin maimbod si Job ki Jehova. “Sa ibong kan gabos na ini, dai si Job nagkasala ni sinahutan man niya an Diyos nin paggibo nin ano man na sala.”—Job 1:12-19, 22, NW.

11. (a) Ano pa an ginibo ni Satanas ki Job? (b) Ano an nagin reaksiyon ni Job?

¹¹ Dai pa nagpundo si Satanas. Inangat niya an Diyos: “Kulgan mo an saiyang tulang saka laman, asin siguradong susumpaon ka niya nin hampangan.” Kaya pinasakitan ni Satanas si Job nin sarong makulugon na hilang. (Job 2:5, 7, NW) Pero padagos pa man giraray na nagin maimbod si Job ki Jehova. Sinabi niya: “Sagkod na ako magadan, dai ko isusuko an sakong integridad!”—Job 27:5, NW.

12. Paano pinatunayan ni Job na putikon si Satanas?

 ¹² Mayong aram si Job sa mga akusasyon ni Satanas o kun taano ta grabe an saiyang pagsakit. Paghuna niya hali ki Jehova an mga kasakitan na inaagihan niya. (Job 6:4; 16:11-14) Pero dawa arog kaiyan, padagos na nagin maimbod si Job ki Jehova. Kaya mayo na talagang duda. Si Job bakong makasadiri. Amigo siya nin Diyos ta namumutan niya an Diyos. Puro sana kaputikan an mga akusasyon ni Satanas!

13. Ano an resulta kan kaimbudan ni Job?

¹³ Dawa ngani daing aram si Job sa mga nangyayari sa langit, maimbod siya sa Diyos asin pinatunayan niyang marauton si Satanas. Maimbod na amigo si Job kaya biniyayaan siya ni Jehova.—Job 42:12-17.

14, 15. Ano an akusasyon ni Satanas sa gabos na tawo?

¹⁴ May importante kang mga manunudan sa nangyari ki Job. Inaakusaran man kita ngunyan ni Satanas na naglilingkod daa kita ki Jehova huli sa makukua tang pakinabang sa Saiya. Sa Job 2:4, sinabi ni Satanas: “Itatao nin tawo an gabos na yaon sa saiya para sa saiyang buhay.” (NW) Kaya inaakusaran ni Satanas na makasadiri an gabos na tawo, bako lang si Job. Dakul na taon pagkagadan ni Job, iniinsulto pa man giraray ni Satanas si Jehova asin inaakusaran an saiyang mga lingkod. Halimbawa, sa Talinhaga 27:11, mababasa ta: ‘Magin madunong ka, aki ko, asin paugmaha an sakong puso, tanganing masimbag ko siya na nagduduhagi [o, nang-iinsulto] sa sako.’

¹⁵ Puwede mong pilion na sunudon si Jehova asin magin Saiyang maimbod na amigo saka patunayan na putikon si Satanas. Dawa pa dakulang pagbabago sa buhay an kaipuhan mong gibuhon para magin amigo nin Diyos, iyan man an pinakamarahay na desisyon na magigibo mo! Seryosong bagay iyan. Sinasabi ni Satanas na dai ka magigin maimbod  sa Diyos pag may mga problema ka na. Dinadaya niya kita para dai ta sunudon an Diyos. Paano?

16. (a) Ano an mga paagi ni Satanas para papunduhon an mga tawo na maglingkod ki Jehova? (b) Ano an puwedeng gibuhon ni Satanas tanganing papunduhon ka sa paglilingkod ki Jehova?

¹⁶ Iba-iba an mga paagi ni Satanas para rauton an pakikiamigo niyato sa Diyos. Nang-aatake siya “siring sa nag-uungal na leon, na naghahanap nin masisiba.” (1 Pedro 5:8) Dai ka magngalas kun purbaran kang papunduhon kan mga amigo mo, kapamilya, o iba pa sa pag-adal nin Bibliya asin sa paggibo kan tama. Pag nangyari iyan, tibaad isipon mong inaatake ka na. * (Juan 15:19, 20) Nagsasagin-sagin man si Satanas na “anghel nin liwanag.” Kaya puwedeng dayaon niya kita para dai ta sunudon si Jehova. (2 Corinto 11:14) May saro pang paagi si Satanas para papunduhon kita sa paglilingkod ki Jehova. Gusto niyang isipon ta na dai kita nuarin man magigin angay na maglingkod sa Diyos.—Talinhaga 24:10.

17. Taano ta sinusunod ta si Jehova?

¹⁷ Pag sinusunod niyato si Jehova, pinapatunayan tang putikon si Satanas. Ano an makakatabang sa sato na magin masinunod? Sinasabi kan Bibliya: ‘Mamutan mo si Jehova na saimong Diyos sa bilog mong puso asin sa bilog mong kalag asin sa bilog mong kapangyarihan,’ o kusog. (Deuteronomio 6:5) Sinusunod ta si Jehova huling namumutan ta siya. Mantang mas lalo tang namumutan si Jehova, mas lalo ta man na gugustuhon na gibuhon an gabos na ipinapagibo niya. Si apostol Juan nagsurat: “Ini an kahulugan kan pagkamuot sa  Diyos, an utubon niyato an saiyang mga tugon; alagad ta an saiyang mga tugon bakong magabat.”—1 Juan 5:3.

18, 19. (a) Ano an nagkapirang bagay na sinasabi sa sato ni Jehova na sala? (b) Taano ta nakakasigurado kita na dai ipapagibo sa sato ni Jehova an sarong bagay na dai ta man kaya?

¹⁸ Ano an nagkapirang bagay na sinasabi sa sato ni Jehova na sala? Mahihiling ta an pira sa mga iyan sa kahon na “ Ikaanggot an Ikinakaanggot ni Jehova.” Sa primero, tibaad isipon mo na an pira sa mga iyan bako man na gayong maraot. Pero pag binasa mo an mga teksto sa Bibliya asin inisip-isip an mga iyan, masasabutan mo kun taano ta marahay na sunudon an mga pagbuot ni Jehova. Tibaad mahiling mo man na kaipuhan mong gumibo nin mga pagbabago. Puwede ining magin masakit kun minsan, pero pag ginibo mo iyan, magigin matuninong an isip mo saka magigin maugma ka ta aram mong nagin maimbod kang amigo nin Diyos. (Isaias 48:17, 18) Taano ta sigurado kitang magigibo ta iyan?

 ¹⁹ Dai nuarin man ipapagibo sa sato ni Jehova an ano man na dai ta kaya. (Deuteronomio 30:11-14) Bilang tunay na Amigo, mas bistado niya kita kisa sa pakabisto ta sa satong sadiri. Aram niya kun sain kita makusog asin kun sain kita maluya. (Salmo 103:14) Pinapakusog kita ni apostol Pablo: “An Diyos maimbod, asin dai niya tutugutan na mapaatubang kamo sa sugot na dai nindo makakaya, kundi kasabay kan sugot magibo man siya nin paagi tanganing makayanan nindo iyan.” (1 Corinto 10:13) Makakapagtiwala kita na pirmi kitang tatawan ni Jehova nin kusog na gibuhon an tama. Tatawan ka niya kan kusog, o “puwersa na urog kisa sa ordinaryo” tanganing tabangan ka na makayanan an masakit na mga sitwasyon. (2 Corinto 4:7) Pagkatapos na maeksperyensiyahan ni Pablo an tabang ni Jehova kan siya nasa masakit na mga sitwasyon, nasabi niya: “Kaya kong atubangon an gabos na bagay paagi sa saiya na nagtatao sa sako nin kusog.”—Filipos 4:13.

20. Anong mga kuwalidad an dapat mong ipahiling, asin taano?

²⁰ Kun gusto niyatong magin amigo ni Jehova, dapat tang ipundo an paggibo kan mga bagay na ibinibilang ni Jehova na sala. Pero may dapat pa kitang gibuhon. (Roma 12:9) Ikinakaugma kan mga amigo nin Diyos an paggibo kan mga bagay na ikinakaugma niya. Mababasa ta iyan sa Salmo 15:1-5. (Basahon.) Inaarog kan mga amigo ni Jehova an saiyang mga kuwalidad asin nagpapahiling sinda nin “pagkamuot, kagaya-gayahan, katuninungan, pakatios, kabuutan, karahayan, pagtubod, pagigin kalmado, [asin] pagpupugol sa sadiri.”—Galacia 5:22, 23.

21. Paano mo maipapahiling an mga kuwalidad na nakakapaugma ki Jehova?

²¹ Paano mo maipapahiling an magagayon na kuwalidad na iyan? Kaipuhan mong maaraman kun ano an mga bagay na nakakapaugma ki Jehova paagi sa regular na pagbasa asin pag-adal nin Bibliya. (Isaias 30:20, 21) Mantang ginigibo mo iyan, lalo mong mamumutan si Jehova, asin dahil diyan mas gugustuhon mong sunudon siya.

22. Ano an magigin resulta kun susunudon mo si Jehova?

²² An mga pagbabagong tibaad kaipuhan mong gibuhon sa saimong buhay puwedeng ikumparar sa paghuba nin maating bado asin pagsulot nin malinig. Sinasabi kan Bibliya na kaipuhan mong ‘hubaon an lumang personalidad’ asin ‘isulot an bagong personalidad.’ (Colosas 3:9, 10) Puwedeng bako iyan pasil, pero pag ginibo ta an mga pagbabagong iyan asin sinunod ta si Jehova, nangangako siya na tatawan niya kita nin “dakulang balos.” (Salmo 19:11) Iyo, pilion mong sunudon si Jehova asin patunayan na putikon si Satanas. Paglingkudan si Jehova, bakong dahil sa ano man na makukua mong balos o pakinabang, kundi huling namumutan mo talaga siya. Paagi kaiyan magigi kang tunay na amigo nin Diyos!