Job 31:1-40
31 “Nakipagtipan ako sa sakong mga mata.+
Kaya paano ko magigibong maghiling na may malisya sa sarong daraga?*+
2 Kun gigibuhon ko iyan, ano an magigin kahirasan ko hali sa Diyos sa itaas,Ano an magigin mana ko hali sa Makakamhan sa Gabos na nasa kaitaasan?
3 Bako daw na kapahamakan an naghahalat sa mga paragibo nin maraotAsin trahedya sa mga naggigibo nin nakakakulog?+
4 Dai niya daw nahihiling an sakong mga dalan+Asin binibilang an gabos kong lakad?
5 Naglakaw na lamang daw ako sa dalan nin kaputikan?*
Naghidali daw an sakong bitis para mandaya?+
6 Timbangon man lugod ako nin Diyos sa tamang timbangan;+Paagi kaiyan, mahihiling niya an sakuyang integridad.+
7 Kun an sakuyang mga lakad nagsuway sa dalan+O an sakuyang puso nagsunod sa sakong mga mata+O an sakuyang mga kamot nadigtaan,
8 Kakanon man lugod nin ibang tawo an isasabwag ko,+Asin garabuton man lugod an itinanom ko.*
9 Kun an puso ko naakit sa ibang babayi+Asin nag-abang ako+ sa may pintuan kan sakong kapwa,
10 An sakuyang agom maggiling lugod nin tipasi para sa ibang lalaki,Asin durugan lugod siya nin ibang mga lalaki.*+
11 Huli ta makasusupog na paggawi iyan,Sarong pagkakasala na maninigo sa pagpadusa kan mga hukom.+
12 Garo iyan kalayo na mantutumtom asin manglalaglag,*+Asin uubuson kaiyan pati an mga gamot kan* gabos kong ani.
13 Kun dai ko pinahilingan nin hustisya an sakuyang mga suruguon na lalaki asin babayiKan igwa sinda nin reklamo* laban sa sako,
14 Anong magigibo ko kun kumprontaron ako nin* Diyos?
Anong maiisimbag ko sa oras na pagpanimbagon niya ako?+
15 Bakong an Saro na naggibo sako sa laog kan tulak iyo man an naggibo sa sainda?+
Bakong an Sarong iyan iyo man an naggibo samo bago kami mamundag?*+
16 Kun ipinanguri ko sa mga pobre an minamawot ninda+O pinamundo* an mga mata kan babaying balo;+
17 Kun solo kong kinakan an sakuyang kakanon
Asin dai tinawan kaiyan an mga ilo;+
18 (Huli ta puon sa pagkahoben ko, kaiba-iba ko na an ilo* asin nagdakula siya na garo ako an saiyang ama,Asin puon sa pagkaaki* ko, tinatabangan ko na an babaying balo.*)
19 Kun may nahiling akong daing bado asin magagadan na sa lipotO sarong pobre na mayo nin maitamong;+
20 Kun dai ko siya tinawan nin telang lana* kan sakong karneroPara makapaimbong siya asin magpasalamat siya* sako;+
21 Kun hinumaan ko kan sakong nakagugom na kamot an ilo+Kan kaipuhan niya an tabang ko sa trangkahan kan siyudad;*+
22 Kun siring, matangkas lugod sa sakuyang abaga an takyag ko,Asin an sakong takyag mabari lugod sa may siko.*
23 Huli ta grabe an takot ko sa kapahamakan na hali sa Diyos,Asin dai ako makatindog sa atubangan kan saiyang kamurawayan.
24 Kun sa bulawan ako nagtiwala,O sinabi ko sa purong bulawan, ‘Ika an sakuyang mapapanarigan!’+
25 Kun an kaugmahan ko nasa sakuyang kadakul na kayamanan+Dahil nagkaigwa ako nin dakul na pagsadiri;+
26 Kun kan mahiling ko an aldaw* na nagkikinangO an bulan na naghihiro sa saiyang kagayunan;+
27 Asin an puso ko pasekretong naakit,Asin hinadukan kan sakong nguso an sakong kamot bilang pagsamba sa sainda;+
28 Kun siring, pagkakasala iyan na maninigo sa pagpadusa kan mga hukom,Huli ta pagtalikod iyan sa tunay na Diyos sa kaitaasan.
29 Naggaya-gaya na lamang daw ako sa pagkalaglag kan sakong kaiwal+O nag-ugma dahil igwang maraot na nangyari saiya?
30 Dai ko lamang tinugutan na magkasala an nguso koPaagi sa pagsumpa na magadan na siya.*+
31 Bakong sinabi kan mga lalaki na nasa tolda ko,‘Siisay an makakahanap nin tawo na dai nabasog kan saiyang kakanon?’*+
32 Mayo nin estranghero* na kinaipuhan na magpalihis nin banggi sa luwas;+Binukasan ko an sakuyang pinto sa mga parabaklay.
33 Tinahuban ko lamang daw an mga paglapas ko, arog kan ginigibo kan ibang mga tawo,+Paagi sa pagtago kan pagkakasala ko sa bulsa kan sakong bado?
34 Natatakot daw ako sa reaksiyon kan mga tawo,O natatakot daw ako na hamakon kan ibang mga pamilya,Na dahil kaiyan nagsisilensiyo na sana ako asin natatakot na magluwas?
35 Kun igwa lang kuta nin madangog sako!+
Pipirmahan ko kan sakong pangaran an mga sinabi ko.*
Simbagon man lugod ako kan Makakamhan sa Gabos!+
Kun isinurat lang kuta sa sarong dokumento kan nag-aakusar sa sako an saiyang mga akusasyon!
36 Papasanon ko iyan,Asin ibubugkos ko iyan sa palibot kan sakong payo na garo korona.
37 Ipapahiling ko sa saiya an lambang lakad ko;Kampante akong madulok sa saiya kapareho nin sarong prinsipe.
38 Kun nag-agrangay laban sa sako an sadiri kong dagaAsin iribang naghibi an mga kali-kali kaiyan;
39 Kun kinakan ko an bunga kaiyan na daing bayad,+O kun nawaran nin paglaom an mga kagsadiri* kaiyan dahil sa sako;+
40 Mga matunok na tanom man lugod an magtubo para sa sako imbes na trigoAsin mabatang mga duot imbes na sebada.”
Digdi natapos an mga tataramon ni Job.
Mga Nota
^ O “birhen.”
^ O posibleng “kaiba kan mga putikon na tawo?”
^ O “Asin haralion man lugod an mga gikan ko.”
^ Sa literal, “magluhod lugod sa ibabaw niya an ibang mga lalaki.”
^ Sa literal, “mangkakakan (mansisiba) sagkod sa kalaglagan.”
^ O “Asin gagabuton kaiyan an.”
^ O “kaso.”
^ Sa literal, “tumindog an.”
^ Sa literal, “sa matris.”
^ O “pinaluya.”
^ Sa literal, “puon sa matris kan ina.”
^ Sa literal, “siya.”
^ Sa literal, “siya.”
^ Sa Ingles, wool.
^ Sa literal, “an habayan niya.”
^ O posibleng “Kan mahiling kong may kasurog ako sa trangkahan kan siyudad.”
^ O “hali sa pagsukmulan kaiyan; hali sa tulang kan itaas na takyag.”
^ Sa literal, “liwanag.”
^ O “an saiyang kalag.”
^ Sa literal, “karne.”
^ O “dayuhan na residente.”
^ O “Uni an sakong pirma.”
^ O “an kalag kan mga kagsadiri.”
