Job 18:1-21
18 Nagsimbag si Bildad+ na Shuhita:
2 “Sagkod nuarin kamo magpaparataram nin arog kaiyan?
Magpahiling man daw kamo nin pakasabot tanganing makataram kami.
3 Ano ta mga hayop an hiling nindo samo,+Asin ano ta ibinibilang nindo kaming mga mangmang?*
4 Maski pa gutay-gutayon mo an saimong sadiri* dahil sa kaanggutan,Babayaan daw an dagaO hahalion daw an dakulang gapo sa kinamumugtakan kaiyan alang-alang saimo?
5 Iyo, mapapalsok an ilaw kan mga maraot,Asin an laad kan saiyang kalayo dai magliliwanag.+
6 Magigin madiklom nanggad an ilaw sa saiyang tolda,Asin an lamparang nakabitay sa saiyang tolda mapapalsok.
7 An haralakwat niyang lakad magigin haralipot,Asin mabagsak siya dahil sa sadiri niya mismong plano.*+
8 Huli ta dadarahon siya kan saiyang mga bitis pasiring sa sarong hikot,Asin matutungtungan niya iyan.
9 Malilitag siya sa buol;Dai siya makakadulag sa sarong siod.+
10 Sarong pisi an nakatago sa daga para siudon siya,Asin sarong litag an nakatáon* sa aagihan niya.
11 Tinatakot siya kan gabos na bagay na nasa palibot niya,+Asin linalapag siya kaiyan nin haranihan.
12 Nauubos an kusog niya,Asin masayasay* siya dahil sa kapahamakan.+
13 Nalalapa an saiyang kublit;Inuubos kan pinakanakakagadan na hilang* an saiyang mga kalamias.
14 Hinahali siya sa katiwasayan na itinatao kan saiyang tolda,+Asin pinapalakaw siya pasiring sa makatatakot na kagadanan.*
15 Mga estranghero* an maistar sa saiyang tolda;Wawarakan nin asupre an istaran niya.+
16 An saiyang mga gamot maaalang,Asin an saiyang mga sanga maluluyos.
17 Mawawara siya sa memorya kan mga tawo,Asin an pangaran niya dai na matatandaan kan mga tawo sa tinampo.*
18 Papalayason siya hali sa kaliwanagan pasiring sa kadiklumanAsin lalapagon parayo sa mabungang daga.
19 Dai siya magkakaigwa nin mga aki asin mga gikan sa tahaw kan saiyang banwaan,Asin mayo nin matatada sa pamilya niya sa lugar na saiyang pig-iistaran.*
20 Pag nag-abot na an aldaw niya, an mga tawo sa Sulnupan magkakabiriglaAsin an mga tawo sa Sirangan magkakatarakot.
21 Iyan an nangyayari sa mga tolda kan saro na paragibo nin maraotAsin sa lugar kan saro na dai nakakamidbid sa Diyos.”
Mga Nota
^ O posibleng “maati.”
^ O “kalag.”
^ O “konseho.”
^ O “nakataan; nakalaag.”
^ O “makiang-kiang.”
^ Sa literal, “kan panganay kan kagadanan.”
^ O “sa hadi na nagdadara nin grabeng takot.”
^ Sa literal, “Sarong bagay na bako niya.”
^ Sa literal, “dai siya magkakaigwa nin pangaran sa tinampo.”
^ O “sa lugar na temporaryo niyang pig-iistaran.”
