Jeremías 8:1-22
8 “Uka tiemponsti”, sistwa naya Jehová Diosajja, “Judá markan reyinakapan chʼakhanakapasa, principenakapan chʼakhanakapasa, sacerdotenakan chʼakhanakapasa, profetanakan chʼakhanakapasa, Jerusalén markan jakirinakan chʼakhanakapasa sepulturanakapat apsutäniwa.
2 Ukanaksti intitaki, phajjsitaki, alajjpachankir taqe ejercitonakatakiw waratatapjjani, jupanakajj ukanakaruw munasipjjäna, servipjjäna, arkapjjäna, thaqapjjäna, altʼasipjjarakïna.+ Janiw uka chʼakhanakajj apthapitäpkaniti ni imtʼatäpkarakinisa. Ukanakajj oraq patjjan wanur uñtasitäpjjaniwa”.+
3 “Ukatjja taqe aka jan wali familiat jiltʼirinakar anatatkä uka lugaranakanjja, jakañ ajllisiñat sipansa jiwañ ajllisipjjani”, sistwa naya ejercitonakan Jehová Diosapajja.
4 “Jupanakarojj akham sañamawa: ‘Jehová Diosajj akham siwa:
“¿Janit jupanakajj tinkusajj mayamp saytʼasipkani?
Maynitï qhepar kuttʼaspajja, ¿janit maynejj qhepar kuttʼkarakispa?
5 ¿Kunatsa aka Jerusalén markajj nayat jitheqtañ munapuni?
Jupanakajj janiw kunatï engañöki uk apanukuñ munapkiti,janiw nayan ukar kuttʼaniñ munapkiti.+
6 Nayajj wali amuyumpiw istʼayäta, istʼaskakiyätwa, ukampis jupanakajj janiw kunatï cheqäki uk parlapkänti.
Janiw ni maynis jan wali luratapat arrepentiskänti, janirakiw ‘¿kuns lurtjja?’ sasin jisktʼasipkänti.+
Sapa mayniw kawki thaktï waljanejj sarapki uka thak sarasipki, guerran nuwasiñatak thoqsuwayki uka caballor uñtasita.
7 Cigüeña sat jamachʼis kunapachas yaqha cheqar sarjjani uk yatisiwa.*
Qhorukutusa, vencejo, tordo* sat jamachʼinakas kunapachas kuttʼanipjjañapa uks yatisipjjarakiwa.
Ukampis markajajj janiw kunapachas naya Jehová Diosajj jupanakar juzgä uk amuykiti”’.+
8 ‘¿Kunjamarak jumanakajj “nanakajj yatiñanïpjjtwa, Jehová Diosan leyipaw* utjapjjetu” sasin sapjjasmasti?
Cheqpachans escribanakajj* kʼarinak qellqañatakikiw qellqañ instrumento apnaqapjje.+
9 Yatiñan jaqenakajj phenqʼachataw uñjasipjje.+
Jupanakasti wali ajjsarayatäpjjewa, mä trampan katuntataw uñjasipjjani.
Jupanakajj Jehová Diosan arunakap apanukupjjewa,ukhamajj ¿kuna yatiñanïpjjarakispasti?
10 Ukatwa nayajj warminakaparojj yaqha chachanakar churäjja,oraqenakapsti yaqha dueñonakaruraki.+
Kuna laykutejj jiskʼat jachʼakamaw mayninakat kʼarimp kʼarimp beneficionak apsupjje,+profetat qalltasajj sacerdotenakamppachaw mayninakar engañjapjje.+
11 Jupanakajj akham sasakiw markajan phuchapan heridanakap qollañ munapjje:
“¡Sumankañaw utji! ¡Sumankañaw utji!” sasa.
Ukampis janiw sumankañajj utjkiti.+
12 ¿Ajjtaskañ luratanakapat markajajj phenqʼasiti?
¡Cheqas janiw jupanakajj kunats phenqʼasipkiti!
¡Janirakiw kunjamas phenqʼachatäñajj uks yatipkiti!+
Ukatwa jupanakajj tinkurinak taypinkapjjani.
Jupanakar castigkä ukapachajj lanktʼasipjjaniwa’,+ siw Jehová Diosajja.
13 ‘Kunapachatï jupanakar tantachthapkä ukhajja, jupanakarojj tukjäwa’, sistwa naya Jehová Diosajja.
‘Janiw uvas alin kuna uvasas jiltʼkaniti, janirakiw higos qoqan* kuna higos utjkaniti, hojanakas suwartjjarakiniwa.
Ukatjja kuntï jupanakar churkta uksa aptʼasipjjaniwa’”.
14 “¿Kunatsa jiwasajj akan qontʼatäsktan?
Tantachtʼasipjjañäni, ukatsti jachʼa perqanakamp muyuntat markanakar mantapjjañäni,+ ukanwa jiwarakiñäni.
Jehová Diosasajj jiwasanakar tukjistaniwa.
Jupasti venenon uma umayistani,+Jehová Dios contra jucha lurapjjatas layku.
15 Jiwasajj sumankañ suyasipkayätanjja, ¡ukampis janiw kuna sumas jutkiti!
Qollatäñ tiempo suyasipkayätanjja, ¡ukampis wali ajjsarañaw utji!+
16 Enemigon caballonakapan wali chʼamampi samsutapajj Dan markatpachaw istʼasi.
Guerran nuwasir caballonakapan warartatipanjja,oraqpachaw khatati.
Jupanakajj mantanisaw oraq tukjapjjani,markampiru ukan jakirinakampiru”.
17 “Kuna laykutejj asirunakwa* jumanak taypir khitanisipksma,jan khitimpis apnaqayasipki uka venenon asirunaka,ukanakaw cheqas jumanakar achutatapjjätam”, sistwa naya Jehová Diosajja.
18 Llakijajj janiw qollañjamäkiti,wali llakisiñaw chuymajan utji.
19 Yanaptʼayasiñatak arnaqasinir mä aruw wali jaya oraqetpach istʼasi,markajan phuchapan arupawa:
“¿Janit Jehová Diosajj Sionankki?
Jan ukajj ¿janit reyipajj ukankki?”.
“¿Kunatsa jupanakajj idolonakapampi jiskʼachapjjetu,jan kunatak serviri yaqha markankir diosanakapampi?”.
20 “Cosechajj tukusjjewa, juntʼupachas tukusjjewa,¡ukampis nanakajj janiw salvatäpkti!”.
21 Markajan phuchapan heridanakapampejj qʼala aynachtʼatapunïtwa.+
Nayajj wali llakitapunïtwa.
Nayarojj wal sustjasiñaw katuntitu.
22 ¿Janit Galaad toqen bálsamo aceitejj utjki?+
¿Janit uka cheqan qollirejj utjkpacha?+
¿Kunatsa markajan phuchapajj jichhakamas jan kʼumaraptki?+
Notanaka
^ Jan ukajja, “señalat tiemponakap yatisiwa”.
^ Ukajja, “grulla” sasaw jaqokipasirakispa.
^ Jan ukajja, “yatichäwipaw”.
^ Jan ukajja, “secretarionakajj”.
^ Jan ukajja, “arbolan”.
^ Jan ukajja, “katarinakwa”.
