Jeremías 50:1-46
50 Caldeonakan oraqepäki uka Babilonia markatjja, Jehová Diosajj aka arunakwa Jeremías profeta taypejj arsüna:+
2 “Aksti markanak taypin arsupjjam, yatiyapjjam.
Mä señal* saytʼayapjjam, yatiyapjjam.
¡Jan kuns imtʼapjjamti!
Akham sapjjam: ‘Babilonia markajj katuntatawa.+
Bel diosajj phenqʼachatawa.+
Merodac diosajj wali sustjatawa.
Idolonakapajj phenqʼachatäpjjewa.
Ajjtaskañ idolonakapajj* wali sustjatäpjjewa’ sasa.
3 Kuna laykutejj mä markaw alay toqet* jupa contrajj juti.+
Wali ajjsarkañaruw oraqep tukuyi.
Janirakiw khitis ukan jakjjeti.
Jaqenakas animalanakas escapjjapjjewa,sarjjapjjewa”.
4 “Uka urunakansa uka tiemponsa”, siw Jehová Diosajja, “Israel markasa Judá markasa juntukiw jutapjjani.+ Jachtʼasisaw sarnaqapjjani,+ juntukiw Jehová Diosapar thaqapjjarakini.+
5 Sionar sarki uka thakit jisktʼasipjjani, uka toqer uñtataw akham sapjjani:+ ‘Jutapjjam, Jehová Diosampejj jan armkaña jan tukuskir mä pacton mayachasipjjañäni’+ sasa.
6 Markajajj chhaqat ovej tamäjjewa.+ Pachpa awatirinakapaw jupanakar chhaqarayi.+ Qollunakar anakisajja, qollunakana jiskʼa qollunakanwa uks aks sarnaqayapjje, samarañ lugaranakapats armtʼasjjapjjewa.
7 Kunapachatï enemigonakapajj jupanakar katjapjjäna ukhajja, manqʼantapjjänwa.+ Enemigonakapajj akham sapjjarakïnwa: ‘Janiw nanakajj juchanïpkti, jupanakaw Jehová Dios contrajj juchachasipjje, khititejj justicia utjayki, nayra awkinakapan suytʼäwipäkaraki uka Jehová Dios contra’ sasa”.
8 “Babilonia markat escapjjapjjam,Caldeonakan oraqepat mistjjapjjam,+taman nayraqatap sariri orqo cabranakjamäpjjam, orqo ovejanakjamäpjjam.
9 Nayajj Babilonia marka contra tantachtʼasaw khitaskarakta,alay toqenkir* oraqet jutiri mayachtʼat jachʼa markanaka.+
Guerran nuwasiñatak formtʼasitaw jupa contrajj jutapjjani.
Uka lugaratpachwa jupar katuntapjjani.
Flechanakapajj guerran nuwasirinakan flechanakapjamawa,uka flechanakasti jan sinttʼasisaw awkinakarojj jan wawanakani jayti,+jupanakasti janiw flechtʼasajj pantjapkiti.
10 Caldea oraqejj saqueyjataw uñjasini.+
Taqe khitinakatï jupar saqueyjapkani ukanakajj chuymas chuymäpjjaniwa”,+ siw Jehová Diosajja.
11 “Jumanakajj wali kusisitäpjjayätawa,+ fiestachapjjarakiyätawa,nayan herenciaj saqueyjapkayäta ukapachajja.+
Mä ternerar uñtasitaw paston thoqnaqapjjayätajja,guerran nuwasir caballonakar uñtasitaw wararipjjayätajja.
12 Jumanakan taykamajj phenqʼachataw uñjasi.+
Jumanakar ususirejj chuyma pʼakintataw uñjasi.
Jupajj taqe markanakat sipans wali jiskʼakiwa,jan umani wasar oraqewa, mä chʼusa lugarawa.+
13 Jehová Diosan wal colerasitap laykojj janiw khitis ukan jakkaniti.+
Uka markajj chʼusakëjjaniwa, janiw khitis ukan jakkaniti.+
Taqe khititï Babilonia marka paskani ukajj wali ajjsarasaw uñchʼukini,taqe jan waltʼäwinakap uñjasasti khuyusipjjarakiniwa.+
14 Babilonia marka contrajj guerran nuwasiñatak formtʼasis taqe toqet jutapjjam,taqe jumanaka, flechtʼañ arco dobltʼirinaka.
Jupar flechtʼapjjam, jan flechanakam imasipjjamti,+Jehová Dios contra juchachasitap layku.+
15 Jupa contrajj taqe toqet guerran nuwasiñatak artʼasipjjam.
Jupajj katuntayasjjewa.
Columnanakapajj tinkurjjapjjewa, murallanakapasti allthapitawa,+Jehová Diosaw vengasi.+
Jupat vengasipjjam.
Kuntï jupajj lurkäna uka kikparak jupar lurapjjam.+
16 Jathanak phawirirojj Babiloniat chhaqtayapjjam,cosecha apthapiris chhaqtayatäpan.+
Jan sinttʼasir espada kawsajj sapa mayniw pachpa markanakapar kuttʼjjani,sapa mayniw pachpa oraqenakapar escapjjani.+
17 ”Israel markankirinakajj anatatat ovejanakawa.+ Leonanakaw jupanakarojj aywitatayapjje.+ Nayraqatasti Asiria markan reyipaw jupanakar manqʼantäna,+ ukjjarusti Babilonia markan Nabucodonosor* reyipaw chʼakhanakap tʼururjjarakïna.+
18 Ukhamasti Israelan Diosapäki uka ejercitonakan Jehová Diosapajj akham siwa: ‘Kunjamtï Asiria markan reyipar castigktjja,+ ukhamarakiw Babilonia markan reyiparus oraqeparus castigäjja.
19 Israelarojj wasitat pastonakapar kuttʼayanëjja,+ Carmelo qolluna ukhamarak Basán+ toqenwa pasto manqʼasini. Efraín+ ukhamarak Galaad+ qollunakanwa sistʼasini’”.
20 “Uka urunakansa uka tiemponsa”, siw Jehová Diosajja,“Israelan pantjasitanakapajj thaqatäniwa,ukampis janiw kunas utjkaniti,Judá markan juchanakapas janiw katutäkaniti,kuna laykutejj khitinakarutï nayajj jiltʼaykta ukanakarojj perdonäwa”.+
21 “Merataim oraq contra Pecod+ toqen jakirinak contra makatam.
Jupanakajj jiwarayatäpjjpan, qʼala tukjatäpjjpan”, siw Jehová Diosajja.
“Kuntï jumar ordenksma uk taqpach luram.
22 Guerran nuwasiñatak suynataw markan istʼasi,ukajj mä jachʼa jan waltʼäwiwa.
23 ¡Kunjamaraki oraqpachan markanakap tukjiri combojj jaljtisti, pʼakjasisti!+
¡Kunjamarak Babilonia markajj markanakatak wali ajjsarkañar tukusti!+
24 Babilonia marka, mä trampa jumatak ucharapsma, ukampiw jumajj katjayastajja,ukampis janiw uk amuyaskayätati.
Jumajj katjata katuntataw uñjastajja,+Jehová Dios contra saytʼasitam layku.
25 Jehová Diosajj armamentonakap imañ lugarap llawiri,+wal colerasitap uñachtʼayañatakiw uka armanak apsu.
Kuna laykutejj Taqe Kunjjar Munañani Tatitüki uka ejercitonakan Jehová Diosapajj mä lurañaniwcaldeonakan oraqepanjja.
26 Wali jaya cheqanakatpach jupa contra jutapjjam.+
Jupan manqʼa imañ utanakap llawirapjjam.+
Juparojj grano montonanakjam montontʼapjjam.
Qʼal jupar tukjapjjam,+jan khitis ukan jiltʼpanti.
27 Taqpach torillonakaparojj jiwarayapjjam,+mataderor saraqapjjpan.
¡Ay jupanakat kunakïkani, jupanakar cuenta mayiñ urojj purinjjewa,jupanakar castigañ tiempopa!
28 Escapirinakan arunakapaw istʼasi,Babilonia oraqet escapirinakan arunakapa,ukhamat Jehová Diosan vengasitap Sionan yatiyañataki,jupajj templop laykuw vengasi.+
29 Arco flechtʼirinakar Babilonia contra jawsthapipjjam,flechtʼañ arco taqe dobltʼirinakaru.+
Carpanak aka markar muyuntat saytʼayapjjam. Jan khitirus escapayapjjamti.
Juparojj kuntï lurki ukarjam kuttʼayapjjam.+
Kuntï jupajj lurki uka pachparak jupar lurapjjam.+
Kuna laykutejj Jehová Dios contraw jachʼa jachʼa tuku,Israelan Santo Diosap contra.+
30 Ukatwa wayna chachanakapajj plazanakapan jiwat jaqortapjjani,+uka urunwa taqpach soldadonakapajj jiwarayatäpjjani”,* siw Jehová Diosajja.
31 “Jachʼa jachʼa tukuri Babilonia marka,+ nayajj juma conträtwa”,+ siw Taqe Kunjjar Munañani Tatitüki uka ejercitonakan Jehová Diosapajja,“kuna laykutejj jumar cuenta maykäma uka urojj purininiwa, jumar castigkäma uka tiempo.
32 Ay kutkatasiri, jumajj lanktʼasïtawa, jaqosirakïtawa,janiw khitis jumarojj waytkätamti.+
Juman apnaqat markanakarojj ninampiw aqkatayäjja.
Juma jakʼankirinak qʼal nakhantarakini”.
33 Ejercitonakan Jehová Diosapajj akham siwa:
“Israel markankir jaqenakasa Judá markankir jaqenakas tʼaqesiyatäpjjewa,jupanakar katuntat apapki taqe ukanakan katuntatäpjjewa.+
Janiw jupanakar antutañ munapkiti.+
34 Ukampirus jupanakan naya Salviripajj* chʼamanïtwa.+
Nayajj ejercitonakan Jehová Diosapa satätwa.+
Cheqpachapuniw nayajj markajar cheqaparjam uñjayäjja,+ukhamat jupanakan markapar sumankañ churañataki,+Babilonia markan jakirinakarojj wal ajjsarayañataki”.+
35 “Mä espadaw caldeonak contrajj jutani”, siw Jehová Diosajja,“Babilonia markan jakirinak contra, principenakap contra, yatiñani jaqenakap contra.+
36 Chʼusa arunak parlirinak* contrajj mä espadaw jutani, jupanakajj jan amuytʼasirinakjamaw kuns lurapjjani.
Guerran nuwasiri chachanakap contrajj mä espadaw jutani, jupanakajj wal ajjsarapjjani.+
37 Mä espadaw caballonakap contrasa, guerran nuwasiñatak carronakap contrasa,jupa taypin utjki uka kunayman taqe markanakankir jaqenak contras jutani,jupanakasti ajjsarir warminakar uñtasitäpjjaniwa.+
Mä espadaw jupan wali valoraninakap contrajj jutani, ukanakasti saqueyjatäniwa.+
38 Ay umanakapat kunakïkani, uka umanakasti wañsjjaniwa,+idolonakamp phoqantat markätap layku,+wali ajjsarkañ visionanakap laykojj loqhenakjamaw sarnaqapjje.
39 Ukatwa wasarankir animalanakajj awullir animalanakamp chik ukan jakapjjani,avestruz sat animalanakaw ukan jakapjjani.+
Janipuniw jaqenakajj ukan jakjjapjjaniti,wiñayatakiw jaqenakajj ukan jan utjkaniti”.+
40 “Kunjamtï Diosajj Sodoma, Gomorra+ markanaksa uka markanak jakʼankir markanaks+ tukjkänjja ukhamarakïniwa”, siw Jehová Diosajja, “janiw khitis uka markan jakjjaniti, janirakiw khiti jaqes ukan utjnoqkaniti.+
41 ¡Uñtapjjam! Mä markaw alay toqet* jutani,mä jachʼa markampi jachʼa reyinakampiw jutapjjani,+oraqen wali jaya cheqanakapatpacha.+
42 Jupanakajj flechtʼañ arconakampi lanzanakampi armantatäpjjewa.+
Jupanakajj jan sinttʼasirïpjjewa, janiw khuyaptʼayasipkaniti.+
Suynatapajj lamar qotan suynatapjamaw+caballonakapat sarasajja.
Babilonian jakirinaka, jumanak contraw jupanakajj mä sapa chachjam jutapjjani, guerran nuwasiñatak formtʼasita.+
43 Babilonian reyipajj jupanakjjat mä yatiyäwi istʼi,+amparanakapajj janiw chʼamanëjjeti.+
Wal llakisiñaw jupar katunti,ususir mä warmejj usuyaski ukhamaw usuyasi.
44 ”Jordán jawira jakʼankir walja alinak taypit mistunki uka leonar uñtasitaw maynejj Edom markan jan tukuskir pastonakap contra makatani, ukampis nayajj jankʼakiw jupanakarojj* oraqepat escapayäjja. Nayaw jupatakejj nayan ajllita mä pʼeqtʼir uttʼayäjja.+ ¿Khitis nayjamajja? ¿Khitis naya contra saytʼaspa? ¿Khiti awatirisa nayan amtaj contra saytʼaspa?+
45 Ukhamasti jaqenaka, kuntï Jehová Diosajj Babilonia marka contra amtki+ caldeonakan oraqep contra amtki uk istʼapjjam:
jupanak kawsajj janiw pastonakajj utj-jjaniti,+tamankir jiskʼa ovejanakarojj qatatisaw apasjjapjjani.
46 Babilonia markar katuntatäki uka suynatampiw oraqejj khatatini,wali jachʼat mä arnaqasitaw markanak taypin istʼasini”.+
Notanaka
^ Jan ukajja, “Mä poste señaljam”.
^ “Ajjtaskañ idolonaka” sañatakejj hebreo arun “animalanakan jamapat” parlañatak aytaski uka arumpejj niya kikpakiwa, uka arojj jiskʼachañatakiw apnaqasi.
^ Jan ukajja, “norte toqet”.
^ Jan ukajja, “norte toqenkir”.
^ Hebreo arunjja, “Nabucodorosor”. Uka sutejj qellqañanwa mayjtʼi.
^ Hebreo arunjja, “amuktʼayatäpjjani”.
^ Hebreo arunjja, “Mayamp Aliripajj”.
^ Jan ukajja, “Falso profetanak”.
^ Jan ukajja, “norte toqet”.
^ “Jupanakarojj” sasinjja, inas Babilonia markan jakirinakat parlaskchi.
