Jeremías 25:1-38
25 Kunapachatï Josías chachan Jehoiaquim+ sat yoqapajj Judá markan pusi maranak reyit apnaqaskäna, Babilonia markan Nabucodonosor* reyipas mä mara apnaqaskarakïna ukhajja, Diosajj aka arunakwa taqpach Judá markat Jeremiasar yatiyäna.
2 Taqpach Judá markatsa Jerusalenan taqe jakirinakatsa,* Jeremías profetajj akham sänwa:
3 “Amón chachan Josías+ sat yoqapajj Judá markan 13 maranak apnaqaskäna ukhat jichhürkamajja, 23 maranakaw Jehová Diosajj nayar parlitu, nayajj kutin kutiniw jumanakar parlapjjsmajja,* ukampis jumanakajj janiw istʼapkistati.+
4 Jehová Diosajj taqe profeta servirinakaparuw jumanakan ukar khitanïna, jupanakarojj kutin kutiniw khitanïna,* ukampis janiw jupanakar istʼapkayätati, janiw ni atencionampis istʼapkayätati.+
5 Jupanakajj akham sapjjänwa: ‘Mirä amp suma, jumanakat sapa maynejj jan wali thakinakamatsa jan wali luratanakamatsa kuttʼanjjapjjam,+ ukhamatwa Jehová Diosajj jumanakampiru nayra awkinakamampir churapkayätam uka oraqen walja tiempo jakasipkakïta.
6 Jan jumanakajj yaqha diosanakan qhepap sarapjjamti, jan servipjjamti, jan jupanakatakejj altʼasipjjamti, ukhamat amparanakamamp lurat idolonakamp jupar jan colerayapjjañamataki. Jumanakatï ukham lurapjjätajja, mä jan waltʼäwi jumanakjjar apanëjja’ sasa.
7 ”‘Ukampis jumanakajj janiw nayar istʼapkistati’, siw Jehová Diosajja. ‘Antisas jumanak pachpa jan waltʼäwir purtʼasipjjañamatakiw amparanakaman luratanakamamp colerayapjjestajja’.+
8 ”Ukhamasti ejercitonakan Jehová Diosapajj akham siwa: ‘“Niyakejjay arunakaj jan istʼapkstajja,
9 nayajj alay toqenkir* taqe familianakaruw jawsthapiskta”,+ sistwa naya Jehová Diosajja, “nayar serviri Babilonia markan Nabucodonosor* sat reyiparuw jawsayaskarakta,+ nayaw jupanakarojj aka oraq contra,+ aka oraqen jakirinak contra, aka jakʼankir markanak contra apanëjja.+ Jupanakarojj tukjäwa, wali ajjsarkañaruw tukuyäjja, jupanakat khuyusipjjaniwa, wiñayatak laqayar tukuyatäpjjarakiniwa.
10 Jupanakan kusisiñat arnaqasitanaksa, wali kusisiñat arnaqasitanaksa, casarasir waynan arupsa, casarasir tawaqon arupsa,+ qhona qalan istʼasitapsa, lamparan qhanapsa chhaqtayäwa.+
11 Ukatsti taqe aka oraqejj laqayar tukuyatäniwa, wali ajjsarkañar tukuyatarakïniwa, aka markanakasti Babilonia markan reyiparuw 70 maranak servipjjani”’.+
12 ”‘Ukampis kunapachatï 70 maranakajj phoqasjjani+ ukhajja, nayajj Babilonia markan reyipampin markapampin pantjasipjjatapat cuenta mayëjja’,*+ sistwa naya Jehová Diosajja, ‘caldeonakan oraqeparojj wiñayatakiw mä chʼusa oraqer tukuyäjja.+
13 Nayajj kunanaktï uka oraq contrajj arskta taqe uka arunakajwa uka oraq contra apanëjja, taqe uka arunakajj aka libron qellqatawa, Jeremiasaw taqe markanak contrajj uka profecía arunak arsurakïna.
14 Kuna laykutejj walja markanakampi munañan reyinakampiw+ jumanakarojj esclavor tukuyapjjätam,+ nayaw uka markanakarojj luratanakaparjama ukhamarak pachpa amparanakapamp luratanakaparjam kuttʼayäjja’”.+
15 Israelan Diosapäki uka Jehová Diosajj akham sitänwa: “Amparajankki uka colerasiñ vino copa katoqeta, uksti khitksma taqe uka markanakar umtʼayanim.
16 Jupanakasti umtʼasajj liwi liwiw sarnaqapjjani, jupanak taypir mä espada apayataj laykojj loqhenakar uñtataw tukupjjani”+ sasa.
17 Ukatwa nayajj Jehová Diosan amparapankkäna uka copa katoqayäta, ukatsti Jehová Diosajj khitkitäna taqe uka markanakaruw umtʼayarakiyäta:+
18 nayraqatajj Jerusalén markampiru Judá oraqen markanakapampiru,+ reyinakaparu, principenakaparu, ukhamat tukjatäpjjañapataki, wali ajjsarkañar tukuyatäpjjañapataki, jupanakat khuyusipjjañapataki, maldisitäpjjañapataki,+ kunjamtï jichhürun paski ukhama;
19 ukjjarusti Egipto markan faraón reyiparu, servirinakaparu, principenakaparu, taqpach markaparu,+
20 Egipto markan jakapkäna taqe uka extranjeronakaru; Uz oraqenkir taqe reyinakaru; filisteonakan+ oraqepankir taqe uka reyinakaru; Asquelón,+ Gaza, Ecrón markanakaru ukhamarak Asdod markat jiltʼirinakaru;
21 edomitanakaru,+ moabitanakaru,+ ammonitanakaru;+
22 Tiro markan taqe reyinakaparu, Sidón+ markan taqe reyinakaparu, lamar qotankir islanakan reyinakaparu;
23 Dedán,+ Temá, Buz lugaranakaru ukhamarak khitinakatï para ladot ñikʼutanakap khuchurasipki ukanakaru;+
24 arabenakan+ taqe reyinakaparu, wasara oraqenkir kunayman taqe markanakan jakir reyinakaparu;
25 Zimrí lugaran taqe reyinakaparu, Elam+ toqenkir taqe reyinakaparu, Media+ sat toqenkir taqe reyinakaparu;
26 ukjjarusti jakʼankapki jayankapki taqe uka alay toqenkir* reyinakaru, maynit mayniru, oraqenkir taqe mayni reinonakamppacharu;* Sesac*+ markan reyipajj jupanakjjaruw umtʼarakini.
27 “Jupanakarojj akham sañamawa: ‘Israelan Diosapäki uka ejercitonakan Jehová Diosapajj akham siwa: “Umtʼapjjam, umjasipjjam, waqʼaqepjjam,* jan saytʼirjam liwirtapjjam,+ jumanak taypir mä espada apayasinkataj layku” sasa’.
28 Jupanakatï amparamankki uka copat jan umtʼañ munapkanejja, jupanakarojj akham sarakim: ‘Ejercitonakan Jehová Diosapajj akham siwa: “¡Jumanakajj umtʼapjjañamawa!
29 Nayatï sutij apki uka markar jan waltʼäwinak nayraqat apayaniristjja,+ ¿janit jumanakar castigañajj wakisjjaspa?”+ sasa’.
”‘Janiw jumanakajj castigot salvasipkätati, kuna laykutejj nayaw aka oraqen taqe jakirinak contrajj mä espada apayasinkta’, sistwa naya ejercitonakan Jehová Diosapajja.
30 ”Jumasti taqe uka profecía arunakwa jupanakarojj arsuñama, akham sasa:
‘Jehová Diosajj wali altotpachaw mä leonar uñtat warartatani,sagrado utjäwipatpachwa arup istʼayasini.
Jupan jakañ lugarap contraw jachʼat warartatani.
Uvas chʼirwirinakar uñtataw jupajj wali kusisit arnaqasini,aka oraqen taqe jakirinak contraw jupajj mä atipjäwi cantani’.
31 ‘Oraq tukuyanakkamaw mä suynirejj istʼasini,Jehová Diosajj markanak contra mä quejanïtap layku.
Jupa pachpaw taqe jaqenakarojj juzgani.+
Jan wali jaqenakarojj espadamp jiwayatäpjjañapatakiw apjjaruyani’, siw Jehová Diosajja.
32 Ejercitonakan Jehová Diosapajj akham siwa:
‘Mä jan waltʼäwiw mä markat yaqha markar saratataski,+wali jaya oraqenakatpachaw mä jachʼa thayajj sartani.+
33 ”’Uka urun naya Jehová Diosamp jiwayatäpkani ukanakajj oraqen mä thiyapat mä thiyapkamaw* jaqortapjjani. Janiw khitis jupanakatjam llakiskaniti, janiw apthapitäpkaniti ni imtʼatäpkanisa. Jupanakajj oraq patjjan wanur uñtasitäpjjaniwa’.
34 ¡Awatirinaka, jumanakajj jachapjjam, jachʼat arnaqasipjjarakim!
¡Ovejanakan jilïrinakapa, jumanakajj oraqen suntʼipjjam,jumanakar kharinukuñ horasasa, jumanakan anatatatäñ horasas purinjjewa,ñeqʼet lurat wali valorani sañur uñtataw jaqoqtapjjäta!
35 Janiw awatirinakan kawkir escapañas utjkiti,ovejanakan jilïrinakapatakejj janirakiw kawkir escapañas utjkiti.
36 ¡Istʼapjjam! Awatirinakan arnaqasitanakapawa,ovejanakan jilïrinakapan jachatanakapawa,kuna laykutejj Jehová Diosaw jupanakan pastonakap qʼal tukjaski.
37 Suman jakasiñ lugaranakan janiw jakañajj utj-jjeti,Jehová Diosan colerasitapajj ninjam naktatap layku.
38 Jupajj wali colerat chʼaman mä leonar uñtataw utjäwip jaytjje,+kuna laykutejj jupanakan oraqenakapajj wali ajjsarkañar tukuyatawa,jupajj jan khuyaptʼayasis espada aptatap layku,jupan wali colerasitapajj ninjam naktatap layku”.
Notanaka
^ Hebreo arunjja, “Nabucodorosor”. Uka sutejj qellqañanwa mayjtʼi.
^ Jan ukajja, “Taqpach Judá markarusa Jerusalenan taqe jakirinakarusa”.
^ Hebreo arunjja, “nayajj alwatpach sartasaw parlapjjsmajja”.
^ Hebreo arunjja, “jupanakarojj alwatpach sartasaw khitanïna”.
^ Jan ukajja, “norte toqenkir”.
^ Hebreo arunjja, “Nabucodorosor”. Uka sutejj qellqañanwa mayjtʼi.
^ Jan ukajja, “castigäwa”.
^ Jan ukajja, “norte toqenkir”.
^ Jan ukajja, “gobiernonakamppacharu”.
^ Amuyatajja, uka sutejj Babel (Babilonia) markan yaqha sutipawa.
^ Jan ukajja, “vomitapjjam”.
^ Variante: “mä qawayapat mä qawayapkamaw”.
