Jeremías 43:1-13
43 Kunanaktï jupanakan Jehová Diosapajj taqe jaqenakar sañapatak Jeremiasar siskäna, ukatsti Jeremiasajj Jehová Diosapan taqe uka arunakap taqpach jaqenakar yatiyañ tukuyjjäna ukhajja,
2 Hosaya chachan Azarías yoqapasa, Caréah chachan Johanán+ yoqapasa, jachʼa jachʼa tukuri taqe chachanakasa Jeremiasarojj akham sapjjänwa: “¡Kuntï siskta ukajj kʼariwa! Nanakan Jehová Diosajajj janiw jumarojj ‘jan Egipto oraqer jakir sarapjjamti’ sañamatakejj nanakan ukar khitanktamti.
3 Antisas Nerías chachan Baruc+ yoqapakiw ukham parlayasktamjja, ukhamat caldeonakar katuyatäpjjañajataki, jiwayatäpjjañajataki jan ukajj Babiloniar preso apatäpjjañajataki”+ sasa.
4 Caréah chachan Johanán yoqapasa, ejercitonakan taqe jilïrinakapasa, taqe jaqenakasa, kuntï Jehová Diosajj Judá oraqen quedasipjjañapatak siskäna uka arunakar janiw istʼasipkänti.
5 Antisaw Caréah chachan Johanán yoqapasa, ejerciton taqe jilïrinakapasa, kawkïr judionakatï anatatatäpkäna ukatsti Judá markan mayamp jakañatak taqe uka markanakat kuttʼanipkäna uka jiltʼir judionakar munkir jan munkir Egiptor apapjjäna.+
6 Jupanakajj chachanakaru, warminakaru, wawanakaru, reyin phuchanakaparu, khitinakarutï guardianakan Nebuzaradán+ sat jilïripajj Safán+ chachan allchhipäki Ahicam+ chachan yoqapäkaraki uka Guedalías+ chachar jaytkäna taqe ukanakaru, Jeremías profetaru ukhamarak Nerías chachan Baruc yoqaparuw apapjjäna.
7 Jupanakajj Jehová Diosan arupar jan istʼasisaw Egipto oraqer sarapjjäna, Tahpanhés+ markakamaw puripjjarakïna.
8 Ukatsti Jehová Diosajj Tahpanhés markanwa Jeremiasar parläna, akham sasa:
9 “Tahpanhés markan faraonan palaciopar mantañäki uka oraqenkir ladrillonakjjarojja, jachʼa qalanak uchasajj cementompi imjjatam, uksti judío chachanakan uñjkataw luräta.
10 Ukatsti jupanakarojj akham sätawa: ‘Israelan Diosapäki uka ejercitonakan Jehová Diosapajj akham siwa: “Nayan servirijäki Babilonia markan reyipäkaraki uka Nabucodonosor* reyiruw jawsayanëjja,+ ukatsti nayajj imjjatkta uka qalanak patjjaruw tronop usköjja, uka patjjaruw jupajj carpap saytʼayani.+
11 Jupajj jutasaw Egipto oraq tukjani.+ Yaqhepajj mä jiwayir usumpiw jiwani. Yaqhepajj preso katuntat apatäniwa. Yaqhepasti espadampi jiwayatäniwa.+
12 Egipto markan diosanakapan templonakaparojj* ninampiw wiykatäjja,+ jupasti phichantasajj katuntat preso apasjjani. Kunjamtï uywa awatirejj isip facilak uchaskejja, ukhamarakiw jupajj Egipto oraqe katuntani, atipjarakiniwa.*
13 Egipto oraqenkir Bet-Semes* columnanak jiskʼa jiskʼa tukjani, Egipton diosanakapan templonakapsa* phichantarakiniwa” sasa’”.
Notanaka
^ Hebreo arunjja, “Nabucodorosor”. Uka sutejj qellqañanwa mayjtʼi.
^ Hebreo arunjja, “utanakaparojj”.
^ Hebreo arunjja, “jupajj sumakiw sarjjani”. Jan ukajja, “jupajj jan kamachtʼatarakïniwa”.
^ Jan ukajja, “Intin Utapa (Templopa)”. Ukajja, Heliópolis markawa.
^ Hebreo arunjja, “utanakapsa”.
