Jeremías 41:1-18
41 Paqallqöri phajjsinjja, Netanías chachan yoqapäkäna, Elisamá chachan allchhipäkäna, reyin familiapat jutirïkäna reyin palaciopan trabajirinakat jilïrïkarakïna uka Ismael+ chachaw tunka chachanakamp chikajj Ahicam chachan Guedalías yoqapan ukar Mizpá markar jutapjjäna.+ Mizpá markan juntuk manqʼasipkäna ukañkamajja,
2 Netanías chachan Ismael yoqapasa jupamp chikäpkäna uka tunka chachanakas sartasaw Safán chachan allchhipäkäna uka Ahicam chachan Guedalías yoqaparojj espadampi jiwayapjjäna. Ukhamaw jupajj khitirutï Babilonian reyipajj markjjar uttʼaykäna ukarojj jiwayäna.
3 Guedalías chachamp chikäpkäna taqe uka judionakamppacharuw Ismael chachajj Mizpá markan jiwarayäna, ukankir caldeo soldadonakarus jiwarayarakïnwa.
4 Guedalías chachajj jiwayatäkäna uka qhepürojja, janïr khitis yatkipanwa,
5 Siquem,+ Siló,+ Samaria+ markanakat 80 chachanakajj jutapjjäna. Sunkhanakapas afeitasita, isinakapas chʼiyanoqasita, jañchinakapas kharinoqasita,+ amparanakaparojj grano ofrendanakampi janqʼo inciensompi apanipjjäna,+ ukhamat Jehová Diosan utapar apañataki.
6 Ukatjja Netanías chachan Ismael yoqapaw Mizpá markat mistusajj jupanakan ukar jachtʼasis saräna. Jupanakan ukar purïna ukhajja, akham sasaw jupanakar säna: “Ahicam chachan Guedalías yoqapar uñjir jutapjjam” sasa.
7 Ukampis kunapachatï jupanakajj markar mantapjjäna ukhajja, Netanías chachan Ismael yoqapampi jaqenakapampejj jupanakaruw jiwarayapjjäna, estanqueruw jaqontapjjarakïna.
8 Ukampirus uka chachanakat tunkaniw Ismael chachar akham sapjjäna: “Jan nanakar jiwayapjjestati, nanakanjja trigompi, aceitempi, miskʼimpi imantatanakaw campon utjapjjetu” sasa. Ukatwa jupajj jilanakapamp chikajj jupanakar jan jiwaykänti.
9 Ismael chachajj jiwaraykäna uka chachanakan jiwat cuerponakapjja mä jachʼa estanqueruw jaqontäna, Asá reyiw Israel markan Baasá reyipampi nuwaskäna ukhajj uka estanque luräna.+ Uka estanqueruw Netanías chachan Ismael yoqapajj jiwarayat chachanakan cuerponakapamp phoqantäna.
10 Ismael chachajj Mizpá markan jiltʼapkäna taqe uka jaqenakaruw katuntäna,+ reyin phuchanakaparusa Mizpá markan jiltʼir taqe jaqenakarus aparakïnwa, Nebuzaradán sat guardianakan jilïripaw uka jiltʼirinakar uñjañapatakejj Ahicam chachan Guedalías+ sat yoqapar uttʼayäna. Netanías chachan Ismael yoqapaw jupanakarojj preso katuntäna, ammonitanakan+ oraqep toqer paskatañatakiw sarjjapjjarakïna.
11 Kunapachatï Caréah chachan Johanán+ yoqapasa ejercitonakan taqpach jilïrinakapas Netanías chachan Ismael yoqapajj sinti jan walinak luratap yatipjjäna ukhajja,
12 jupanakajj taqpach chachanakampiw Netanías chachan Ismael yoqap contra nuwasir sarapjjäna, juparusti Gabaón markanwa jachʼa estanque* jakʼan katupjjäna.
13 Kunapachatï Caréah chachan Johanán yoqaparojj ejerciton taqpach jilïrinakapamp chik uñjapjjäna ukhajja, Ismael chachampi chikäpkäna uka jaqenakajj walpun kusisipjjäna.
14 Ukatsti Ismael chachajj Mizpá+ markat preso katuntat apankäna taqe uka jaqenakajja, kutjtasaw Caréah chachan Johanán yoqapamp chik sarjjapjjäna.
15 Ukampis Netanías chachan Ismael yoqapampi jupan kimsaqallqo jaqenakapampejj Johanán chachat escapjjapjjänwa, ammonitanakan oraqeparuw sarjjapjjarakïna.
16 Caréah chachan Johanán yoqapampi jupamp chikäpkäna uka ejerciton taqpach jilïrinakapampejja, Mizpá markan jiltʼapkän uka jaqenakaruw apasjjapjjäna. Jupanakarojj kunapachatï Netanías chachan Ismael yoqapajj Ahicam chachan Guedalías+ yoqapar jiwaykäna uka qhepatwa Ismael chachat salvapjjäna. Jupanakasti Gabaón markatwa chachanakarusa, soldadonakarusa, warminakarusa, wawanakarusa, palacion trabajir jilïrinakarus kuttʼayanipjjäna.
17 Ukhamasti jupanakajj sarasaw Belén+ marka jakʼankkäna uka Kimham sat alojasiñ lugaran quedasipjjäna. Jupanakasti viajisajj Egipto markar puriñwa amtapjjäna,+
18 kuna laykutejj caldeonakaruw ajjsarapjjäna. Jupanakajj Netanías chachan Ismael yoqapajj Ahicam chachan Guedalías yoqapar jiwaykäna ukhatwa caldeonakar ajjsarapjjäna, Babilonia markan reyipaw Guedalías chacharojj markar apnaqañapatak uttʼayäna.+
Notanaka
^ Hebreo arunjja, “jachʼa umanak”.
