Jeremías 11:1-23
11 Jehová Diosajj akham sasaw Jeremiasarojj säna:
2 “¡Markankirinaka! ¡Aka pacton arunakap istʼapjjam!
”Judá markankir chachanakampiru Jerusalén markan jakirinakampir parlam,*
3 jupanakarojj akham sarakim: ‘Israelan Jehová Diosapajj akham siwa: “Aka pacton arunakap jan istʼir jaqejj maldisitawa,+
4 nayaw uka arunak nayra awkinakamarojj Egipto oraqet irpsunkayäta uka urojj jupanakar churayäta,+ cheqas hierro umatatayañ hornot irpsunkayäta+ uka uruw jupanakarojj akham sasin churayäta: ‘Nayan arunakaj istʼapjjam, taqe kunanaktï jumanakar mayipksma ukanak lurapjjam, jumanakasti nayan markajäpjjätawa, nayasti jumanakan Diosamarakïyäwa,+
5 ukhamat nayajj nayra awkinakamar juramento lurkayäta uk phoqañajataki, kawkjantï leches miskʼis+ wal utjki uka oraqe churañataki’ sasa. Uka oraqenwa jumanakajj jichhürkam jakasipktajja”’”.
Nayasti akham sasaw jaysarakiyäta: “Amén,* Jehová Dios Tata” sasa.
6 Ukatsti Jehová Diosajj akham sitänwa: “Judá oraqenkir markanakansa Jerusalén markan callenakapansa, jumajj akham sasin taqe aka arunak yatiyam: ‘Aka pacton arunakap istʼapjjam, phoqapjjarakim.
7 Kuna laykutejj nayra awkinakamar Egipto oraqet apsunkayäta uka urut jichhürkamajja, nayajj “aruj istʼapjjam”+ sasaw jupanakarojj kutin kutin ewjjtʼayäta.*
8 Ukampis jupanakajj janiw istʼañ munapkänti, janirakiw ni atencionampis istʼapkänti, antisas taqeniw jan istʼasis jan wali chuymapar arkañ amtapjjäna.+ Jupanakajj janiw kuntï lurapjjañapatak maykayäta uk phoqapkänti, ukatwa aka pacton arunakap jupanak contra apaniyäta’ sasa”.
9 Ukatsti Jehová Diosajj akham sitänwa: “Judá markankir chachanakampi Jerusalén markan jakirinakampejj jupanakkamaw naya contra saytʼañatak arustʼasisipki.
10 Jupanakajj kunjamtï nayra tiempon nayra awkinakapajj pantjasipkäna uka pachparuw kuttʼapjje, nayra awkinakapajj janiw arunakaj istʼañ munapkänti.+ Jupanakajj ukhamarakiw yaqha diosanakar arkapjje, servipjjaraki.+ Israel markankirinakasa Judá markankirinakasa nayra awkinakapamp lurkayäta uka pacto pʼakintapjje.+
11 Ukatwa naya Jehová Diosajj akham sista: ‘Nayajj mä jan waltʼäwi jumanakjjar apasinkta,+ janiw ukat escapañ puedipkätati. Yanaptʼayasiñatak ruwtʼasipjjetani ukhajj janiw jupanakar istʼkäti.+
12 Ukatsti Judá oraqenkir markanakasa Jerusalén markan jakirinakasa sacrificionak loqtapki* uka diosanakaruw sarapjjani, ukatsti yanaptʼayasiñatakiw ruwtʼasipjjani,+ ukampis kunapachatï jan waltʼäwejj jupanakjjar jutkani ukhajja, uka diosanakajj janipuniw kunjamatsa jupanakar salvapkaniti.
13 Kuna laykutejj Judá marka, juman diosanakamajj markanakamar uñtat waljapunëjjewa. Jumajj altaranakwa lurastajja, uka altaranakjjaruw phenqʼaskay* Baal diosarojj sacrificionak loqttajja.+ Uka altaranakajj Jerusalenan callenakapar uñtasit waljapuniwa’.
14 ”Ukhamasti jumajj* jan aka markatakejj oración luramti. Jan jupanakatakejj ruwtʼasimti, jan jupanakatak oración luramti,+ jan waltʼäwin uñjasipjjatap layku artʼasinipjjetani ukhajj janiw nayajj istʼkäti.
15 ¿Nayan munat markajajj kuna derechonis utajankañatakejja,waljanin jan walinak lurapjjatapatjja?
Jumjjar* jan waltʼäwejj jutkani ukhajja, ¿sagrado aychanakampit* jumar jarkʼaqapjjätam?
¿Ukapachajj kusisïtati?
16 Naya Jehová Diosajj jachʼa olivo qoqa* sasaw nayrajj sutichasiyäsmajja,suma achunak achoqer qoqa sasina.
Nayajj wali jachʼat suynasaw jumarojj ninamp naktaysmajja,ukatsti jupanakajj ramanakam pʼakirapjjaraktam.
17 ”Jumar ayrusiri* naya ejercitonakan Jehová Diosapajja,+ jumjjar mä jan waltʼäwi jutañapatakiw arsurakta, Judá markankirinakampi Israel markankirinakamp jan walinak lurapjjatap layku, jupanakajj Baal diosar sacrificionak loqtasaw nayar colerayapjjetu”.+
18 Jehová Diosaw nayan yatiñajatak yatiyitäna.
Diosajay, uka tiemponwa kuntï jupanakajj lurasipkäna uk uñjayistajja.
19 Nayasti kharinukuñatak apatäki uka manso orqo ovejar uñtasitäyätwa.
Janiw nayajj akham sasin naya contra arustʼasisipkatap yatkayätti:+
“Uka qoqarojj* achunakapamppach tukjañäni,jakirinakan oraqepat khuchunukuñäni,ukhamat sutipajj jan mayampis amtatäjjañapataki” sasa.
20 Ukampis ejercitonakan Jehová Diosapajj cheqaparjamaw juzgui,jupasti amuyunaksa* chuymsa uñantiwa.+
Diosajay, jupanakjjar vengaskäta uk uñjayita,kuna laykutejj jumaruw nayajj quejaj yatiysma.
21 Ukhamasti Anatot+ markankir chachanakarojj akham siw Jehová Diosajja, khitinakatejj jumar jiwayañ thaqasipki, khitinakatejj “jan jumajj Jehová Diosan sutipjjar profecianak arsumti,+ jan ukasti amparanakajamp jiwayataw uñjasïta” sasin sapki ukanakaru,
22 ejercitonakan Jehová Diosapajj akham siwa: “Nayaw jupanakarojj cuenta mayëjja. Waynanakajj espadamp jiwayataw uñjasipjjani,+ yoqanakapasa phuchanakapas manqʼatjamaw jiwarapjjarakini.+
23 Janiw jupanakat ni maynis jiltʼkaniti, kuna laykutejj jupanakar cuenta maykä uka maranjja, Anatot+ markankir chachanakjjarojj mä jan waltʼäwi apayanëjja” sasa.
Notanaka
^ Amuyatajja, Jeremiasaruw parlaskäna.
^ Jan ukajja, “Ukhamäpan”.
^ Hebreo arunjja, “sapürus alwatpach sartas ewjjtʼayäta”.
^ Jan ukajja, “sacrificionak jewqʼeyapki”.
^ Jan ukajja, “phenqʼachir”.
^ “Jumajj” sasinjja, Jeremiasat parlaski.
^ “Jumjjar” sasinjja, Judá markat parlaski.
^ Ukajja, templon loqtat sacrificionakat parlaski.
^ Jan ukajja, “árbol”.
^ Variante: “mallkiri”.
^ Jan ukajja, “arbolarojj”.
^ Hebreo arunjja, “riñonanaksa”.
