Jeremías 40:1-16
40 Kunapachatï guardianakan Nebuzaradán+ jilïripajj Ramá+ markat libre sarjjañapatak Jeremiasar khitjjäna uka qhepatwa Jehová Diosajj Jeremiasar parläna. Nebuzaradán chachaw Jeremiasarojj amparanakap cadenanakamp chinuntasajj uka markar apäna. Jeremiasasti khitinakatï Jerusalén markatsa Judá markatsa Babilonia markar apatäsipkäna taqe uka jaqenak taypinkänwa.
2 Ukatsti guardianakan jilïripajj Jeremiasar yaqha cheqar irpaqasaw akham säna: “Jehová Diosamaw aka lugar contrajj aka jan waltʼäw utjañapatak arsüna,
3 Jehová Diosajj kunjamtï siskäna ukhampunwa uka jan waltʼäwinak apani, jumanakajj Jehová Dios contraw juchachasipjjtajja, janirakiw arupsa istʼapktati. Ukatwa ukajj pasapjjtamjja.+
4 Amparamar chinuntatäki uka cadenanakat jichhüruw antutjjäma. Jumatakitï walïchejja, Babilonia markar nayamp sarjjañäni, nayaw jumar uñjaskäma. Ukampis jumatï Babiloniar nayamp jan sarañ munkstajja, janirak saramti. ¡Uñjam! Taqe aka oraqpachaw juma nayraqatankaski. Kawkirutï sarañ munkta ukar sarañ ajllisim”+ sasa.
5 Jeremiasajj janïr kuttʼkäna ukhajja, Nebuzaradán chachajj akham sasaw jupar säna: “Safán+ chachan allchhipäki, Ahicam+ chachan yoqapäkaraki uka Guedalías+ chachan ukar kuttʼjjam, juparuw Babilonian reyipajj Judá oraqen markanakapjjar uttʼayi, markankirinak taypin jupamp quedasim, jan ukajj kawkirutï sarañ munkta ukar sarjjam” sasa.
Ukatjja guardianakan jilïripajj mä jukʼa manqʼampi mä regalompi churasaw Jeremiasar khitjjäna.
6 Ukatwa Jeremiasajj Mizpá+ markankir Ahicam chachan Guedalías yoqapan ukar sarjjäna, Judá oraqen jiltʼkäna uka jaqenak taypinkaskarakïnwa.
7 Tiempompejja marka anqäjjankapkäna uka ejerciton taqpach jilïrinakapasa jaqenakapasa, Babilonian reyipajj Ahicam chachan Guedalías yoqaparu markjjar uttʼayatapwa istʼapjjäna, ukhamat Babiloniar jan apatäpkäna uka pobre jaqenakar apnaqañapataki, chachäpasa, warmïpasa, wawäpasa.+
8 Ukatwa jupanakajj Mizpá markar sarapjjäna, Guedalías chachan ukaru.+ Jupanakajj akanakänwa: Netanías chachan Ismael+ yoqapampi, Caréah chachan Johanán+ ukhamarak Jonatán sat yoqanakapampi, Tanhúmet chachan Seraya yoqapampi, Efái sat netofatita chachan yoqanakapampi, maacatita chachan Jezanías+ sat yoqapampi, jupanakan jaqenakapas ukhamaraki.
9 Safán chachan allchhipäki uka Ahicam chachan Guedalías yoqapajja, jupanakatakisa jaqenakapatakis mä juramento luräna, akham sasa: “Caldeonakar serviñ jan ajjsarapjjamti, jumanakajj pachpa oraqen jakapjjam, Babilonian reyipar servipjjarakim, ukham lurasajj walikïsipkätawa.+
10 Nayasti Mizpá markanwa quedasëjja, ukhamat jutapkani uka caldeonak nayraqatan jumanak lanti uñstañataki.* Ukampis jumanakajj vino apthapinipjjam, frutanaksa, aceitenaksa apthapinipjjarakim, ukanaksti wakullanakamar uchapjjam, ukatjja katupkta uka markanakan utjnoqapjjam”+ sasa.
11 Moab, Ammón, Edom markanakankapkäna taqe uka judionakasa taqe yaqha oraqenkirinakasa, Babilonian reyipajj Judá oraqen jiltʼapkäna ukanakar apnaqañapatakejj Safán chachan allchhipäki uka Ahicam chachan Guedalías yoqapar uttʼayatapwa istʼapjjäna.
12 Ukatwa kawkirutï anatatatäpkäna uka lugaranakat taqe judionakajj kuttʼanipjjäna. Ukatsti Judá oraqeruw jutapjjäna, Mizpá markanwa Guedalías chachampejj jikisipjjarakïna. Jupanakajj walja vinompi walja frutampi apthapipjjäna.
13 Caréah chachan Johanán yoqapasa marka anqäjjankir ejerciton taqe jilïrinakapasa Mizpá markaruw Guedalías chachan ukar sarapjjäna.
14 Jupanakajj akham sapjjänwa: “¿Janit jumajj yatkta? Ammonitanakan+ Baalís reyipajj Netanías chachan Ismael yoqaparuw jumar jiwayañatak khitani”+ sasa. Ukampis Ahicam chachan Guedalías yoqapajj janiw jupanakar creykänti.
15 Ukatsti Caréah chachan Johanán yoqapajja, Guedalías chacharojj Mizpá markanwa jamasat akham säna: “Netanías chachan Ismael yoqapar jiwayiriw sarañ munta, janiw khitis uk yatkaniti. ¿Kunatsa jupajj jumar jiwayañapäspa? ¿Kunatsa juman ukar tantachtʼasiñatak jutapki uka Judá markankir jaqenakajj aywitatayatäpjjaspa? ¿Kunatsa Judá markan jiltʼirinakajj chhaqtayatäpjjaspa?” sasa.
16 Ukampis Ahicam chachan Guedalías+ yoqapajja, akham sasaw Caréah chachan Johanán yoqaparojj säna: “Jan uk luramti, kuntï Ismael chachat siskta ukajj kʼariwa” sasa.
Notanaka
^ Hebreo arunjja, “saytʼañataki”.
