Jeremías 27:1-22
27 Kunapachatï Judá markan Josías reyin Jehoiaquim sat yoqapajj reyit apnaqañ qalltaskäna ukhajja, Jehová Diosaw Jeremiasar parläna.
2 Ukatsti Jeremiasajj akham sänwa: “Jehová Diosajj akham situwa: ‘Lazonakampi yukunakampi lurasim, ukanaksti kunkamar uchasirakim.
3 Ukatsti Judá markan Sedequías reyipan ukar Jerusalenar jutapki uka chachanakampiw ukanak Edom+ markan reyipar apayañama, Moab+ markan reyiparusa, ammonitanakan+ reyiparusa, Tiro+ markan reyiparusa, Sidón+ markan reyiparusa apayañamarakiwa.
4 Jupanakan reyinakapatakejj aka arunak säta:
”’“Kuntï reyinakamar sapjjañamäki ukjja, Israelan Diosapäki uka ejercitonakan Jehová Diosapajj akham siwa:
5 ‘Nayaw aka oraqsa, jaqenaksa, aka oraqenkir animalanaks jachʼa chʼamajampi chʼamani amparajampi lurta, khitirutï nayajj churañ munkta ukaruw taqe ukanak churarakta.+
6 Jichhasti taqe aka markanakjja, Babilonia markankki uka nayar serviri Nabucodonosor+ reyin amparaparuw katuyjjta, jupar servipjjañapatakejj salvaje animalanakamppach jupar katuyarakta.
7 Taqe markanakaw juparusa, yoqaparusa, allchhiparus pachpa markapajj tukuskani ukapachkam servipjjani,+ ukapachasti walja markanakampi munañani reyinakampiw juparojj esclavopar tukuyapjjani’.+
8 ”’”‘Kawkïr markatï jan ukajj reinotï* Babilonia markan Nabucodonosor reyipar jan serviñ munkani, janirak Babilonia markan yukupampi kunkapar uchayasiñ munkani ukajja, espadampi,+ manqʼat pistʼañampi, usumpiw* uka markar castigäjja, jupan amparapampi qʼal tukjaykä ukapachkama’, siw Jehová Diosajja.
9 ”’”‘Ukhamasti “janiw Babilonian reyiparojj servipkätati” sapktam uka profetanakamarusa, yatirinakamarusa, samkasirinakamarusa, magianak luririnakamarusa, layqanakamarus jan istʼapjjamti.
10 Jupanakajj kʼari profecianak parlasipktam, jumanakatï jupanakar istʼapjjätajja, oraqenakamat jayar apatäpjjätawa. Nayasti jumanakarojj anatatapjjämawa, jiwarapjjarakïtawa.
11 ”’”’Ukampis Babilonia markan reyipan yukupampi kunkapar uchayaskani, jupar servirakini uka markarojja, pachpa markaparuw jaytäjja, ukan yapuchasiñapataki, ukan jakañapataki’, siw Jehová Diosajja”’”.
12 Judá markan Sedequías+ reyiparojj uka pachparak sista, akham sasa: “Babilonia markan reyipan yukupamp kunkanakamar uchayasipjjam, jupampiru markapampir servipjjarakim, ukhamatwa jumanakajj jakasipkakïta.+
13 ¿Kunatsa jumasa markamasa espadampi,+ manqʼat pistʼañampi,+ usumpi*+ jiwapjjañamäspa, kunjamtï Jehová Diosajj Babilonia markan reyipar jan sirvkani uka markat arskäna ukhama?
14 ‘Jumanakajj janiw Babilonia markan reyipar servipkätati’+ sapktam uka profetanakan arunakap jan istʼapjjamti, jupanakajj kʼari profecianak parlasipktamjja.+
15 ”‘Janiw nayajj jupanakar khitankti’, siw Jehová Diosajja, ‘jupanakajj kʼari profecianak sutij-jjar parlasipki, jumanakatï jupanakar istʼapjjätajja, nayajj anatatapjjämawa, jumanakajj jiwarapjjarakïtawa, jumanakasa jumanakar profecía arunak parlasipktam ukanakasa’”.+
16 Sacerdotenakarusa taqpach markarus nayajj akham sayätwa: “Jehová Diosajj akham siwa: ‘“¡Kunanakatï Jehová Diosan utapan serviñatak wakiski ukanak niyaw Babiloniat kuttʼayanjjapjjani!”+ sapktam uka profetanakan arunakap jan istʼapjjamti, jupanakajj kʼari profecianak parlasipktam.+
17 Jan jupanakar istʼapjjamti. Babilonia markan reyipar servipjjam, jakasipkarakïtawa.+ ¿Kunatsa aka markajj qʼala tukjatäñapa?
18 Ukampis jupanakatï profetanakäpjjchi, Jehová Diosan arunakap katoqapjjarakchi ukhajja, mirä amp suma, ejercitonakan Jehová Diosapar ruwtʼasipjjpan, ukhamat Jehová Diosan utapan serviñatak kunanakatï wakiski uka jiltʼirinaksa, Judá markan reyipan utapampin* Jerusalén markampin jiltʼki ukanaksa, jan Babiloniar apasipjjañapataki’ sasa.
19 ”Kuna laykutejj columnanakatsa,+ Lamar Qota sat uma estanquetsa,*+ carritonakatsa,+ kunanakatï templon serviñatak wakiski ukanakat markan jiltʼki ukanakatsa, akham siw ejercitonakan Jehová Diosapajja,
20 ukanaksti kunapachatï Nabucodonosor reyejj Jehoiaquim chachan yoqapäki Judá markan reyipäkarakïna uka Jeconías reyir preso katuntat apkäna ukhajj janiw apaskänti, juparojj Judá markampin Jerusalén markampin wali importante jaqenakapamp chikaw Jerusalén markat Babilonia markar apäna.+
21 Cheqas kunanakatï Jehová Diosan utapan serviñatak wakiski uka jiltʼanakatsa, Judá markan reyipan utapampin* Jerusalén markampin jiltʼki ukanakatsa, akham siw Israelan Diosapäki uka ejercitonakan Jehová Diosapajja:
22 ‘“Ukanakajj Babilonia markar apatäniwa,+ kunapachatï ukanakar* uñtankä ukapachkamaw ukankapjjani. Ukatsti nayajj ukanak kuttʼayanjjäwa, aka lugararuw mayamp uchjjarakëjja”,+ siw Jehová Diosajja’”.
Notanaka
^ Jan ukajja, “gobiernotï”.
^ Hebreo arunjja, “pestempiw”.
^ Hebreo arunjja, “pestempi”.
^ Jan ukajja, “palaciopampin”.
^ Ukajja, templon utjki uka cobret lurat Lamar Qota sat uma estanquet parlaski.
^ Jan ukajja, “palaciopampin”.
^ Ukajja, “jupanakar” sasaw jaqokipasirakispa.
