Jeremías 49:1-39
49 Jehová Diosajj akham siw ammonitanakatakejja:+
“¿Janit Israelajj yoqanakanïki?
¿Janit jupajj herencia katoqerinïki?
¿Kunatsa Malcam+ diosajj Gad oraqe katuntasi?+
¿Kunatsa adoririnakapajj* Israelan markanakapan jakapjje?” sasa.
2 “‘Ukhamasti urunakajj jakʼachasisinkiwa’, siw Jehová Diosajja,‘ukapachaw nayajj ammonitanakan+ Rabá+ markap contrajj guerran nuwasiñatak mä señal* istʼasiyäjja.
Uka markajj chʼusa laqayar tukuyatäniwa,uka marka jakʼankir markanakaparojj ninampiw wiykatapjjani’.
‘Israel markasti, khitinakatï oraq aparapki ukanakatwa oraqe apararakini’,+ siw Jehová Diosajja.
3 ‘¡Hesbón marka, Hai markan tukjatäjjatap laykojj jacham!
Rabá markan jiskʼa markanakapa, arnaqasipjjam.
Llakisiñ isi* uchasipjjam.
Qala uyunak* taypin uks aksa jachtʼasis sarnaqapjjam,kuna laykutejj Malcam diosajj yaqha markar apatäniwa,sacerdotenakapampi principenakapamp chika.+
4 ¿Kunatsa vallenakat jachʼañchasta,suma oraqenakamatsa jachʼañchasta, apanukusir phucha?
Jumajj wali valoraninakamaruw confiyastajja,akham saraktawa: “¿Khitis naya contrajj jutani?” sasa’”.
5 “‘Kunatï wali sustjaskañäki uk jumjjarojj apanëjja’, siw Taqe Kunjjar Munañani Tatitüki uka ejercitonakan Jehová Diosapajja,‘juma jakʼankapki taqe ukanakatwa jutani.
Jumanakajj taqe cheqar anatatatäpjjätawa,escapapkani ukanakarojj janiw khitis tantachthapkaniti’”.
6 “‘Ukampis qhepatjja katuntatäpki uka ammonitanakaruw tantachtʼäjja’, siw Jehová Diosajja”.
7 Ejercitonakan Jehová Diosapajj akham siw edomitanakatakejja:
“¿Janit Temán+ markan yatiñajj utj-jje?
¿Janit amuytʼasirinakan suma ewjjtʼanakapajj utj-jje?
¿Janit jupanakan yatiñapajj sirvjje?
8 ¡Kutjtapjjam, escapjjapjjam!
¡Dedán+ markan jakirinaka, sarjjasin manqha lugaranakan imantasipjjam!
Nayasti mä jan waltʼäwi Esaú chachjjarojj apanëjja,jupar castigañ tiempojj nayatak purinkani ukapachana.
9 Uvas cosechirinakatejj juman ukar jutapjjaspa ukhajja,¿janit apthapisiñatakejj mä qhawqha uvasanak jiltʼayapkaspa?
Arumatï lunthatanakajj jutapjjaspa ukhajja,qhawqtï tukjañ munapkaspa ukhakwa tukjapjjaspa.+
10 Ukampis Esaú chacharojj jan kunan jaytäjja.
Nayajj imantasiñ lugaranakap uñstayäjja,ukhamat jupajj jan imantasiñapataki.
Wawanakapasa, jilanakapasa, jupa jakʼan jakirinakasa taqeniw tukjatäpjjani,+jupajj janiw utj-jjaniti.+
11 Jan awkin wajcha wawanakamarojj* nayar jaytita,nayaw jupanakar jakayaskäjja,viuda warminakamas nayaruw confiyapjjetani”.
12 Jehová Diosajj akham siwa: “Colerasiñ copat umtʼañatak jan juchañchatäpki ukanakatï umtʼapjjañapächejja, ¿janit jumajj jan castigat uñjaskäta? Jumajj umtʼañamawa, castigatäñamarakiwa”+ sasa.
13 “Nayan sutij-jjaruw mä juramento lurta”, siw Jehová Diosajja, “Bozrá markajj wali ajjsarkañaruw tukuni,+ jiskʼachatarakïniwa, tukjatäniwa, maldisitäniwa, taqe markanakapajj wiñayatak laqayar tukuyatäniwa”.+
14 Nayajj mä yatiyäwi Jehová Diosat katoqta,mayniruw markanakar akham sañapatak khitasiraki:
“Tantachtʼasipjjam, uka marka contra jutapjjam,nuwasiñatak wakichtʼasipjjam”+ sasa.
15 “Markanak taypinjja jan yäqat markaruw nayajj tukuysma,jaqenak taypinsa uñisita.+
16 Yaqhanakar ajjsaraykta ukaw jumar engañtamjja,chuymaman jachʼa jachʼa tukutapaw engañtamjja,jachʼa qarqan* imantasiñ cheqanakan jakiri,qollu patan jakiri.
Pakanakjamas wali alto cheqanakan tapachaskchïtajja,nayaw jumarojj uka cheqat saraqayanïma”, siw Jehová Diosajja.
17 “Edom markajj wali ajjsarkañaruw tukuñapa.+ Taqe khititï uka cheq paskani ukajj wali ajjsarasaw uñchʼukini, taqe jan walinakap uñjasajj khuyusipjjaniwa.
18 Kunjamtï Sodoma, Gomorra markanakasa uka markanak jakʼankir markanakas tukjatäpkänjja ukhamarakïniwa”,+ siw Jehová Diosajja, “janiw khitis uka markan jakjjaniti, janirakiw khiti jaqes ukan utjnoqkaniti.+
19 ”Jordán jawira jakʼankir walja alinak taypit mistunki uka leonar uñtasitaw maynejj Edom markan jan tukuskir pastonakap contra makatani,+ ukampis nayajj jankʼakiw jupanakarojj* oraqepat escapayäjja. Nayaw jupatakejj nayan ajllita mä pʼeqtʼir uttʼayäjja. ¿Khitis nayjamajja? ¿Khitis naya contra saytʼaspa? ¿Khiti awatirisa nayan amtaj contra saytʼaspa?+
20 Ukhamasti jaqenaka, kuntï Jehová Diosajj Edom marka contra amtki Temán+ markan jakirinak contra amtki uk istʼapjjam:
jupanak kawsajj janiw pastonakajj utj-jjaniti,+tamankir jiskʼa ovejanakarojj qatatisaw apasjjapjjani.
21 Jupanakan tinkutapan suynatapampejja oraqejj khatatiwa.
¡Arnaqasitanakaw istʼasi!
Suynatajj Mar Rojo+ qotakamaw istʼasi.
22 Jupajja kunjamtï mä pakajj altor jalkatasin mä animalar katjañatak ratuk jaljjatkejja,+ukhamarakiw Bozrá marka contrajj chheqanakap ayatatasini.+
Uka urunsti, Edom markankir guerran nuwasiri chachanakan chuymanakapajjaususiskir mä warmin chuymapjamäniwa”.
23 Damasco+ markatak mä yatiyäwi:
“Hamat+ markasa Arpad markasa phenqʼachatäpjjewa,jan wali yatiyäwinak istʼasajja.
Jupanakajj wal ajjsarayasipjje.
Jaqenakajj wal suynir lamar qotar uñtatäpjjewa.
24 Damasco markajj wal ajjsarayasjje.
Escapañatakiw kutjti, ukampis wal ajjsarayasiñaw jupar katunti.
Llakisiñampi usuyasiñampiw juparojj katunti,ususir mä warmir uñtasita.
25 ¿Kunjamsa jachʼañchat markajj jan apanukut uñjasi,kusisiñamp phoqtʼatäki uka markasti?
26 Wayna chachanakapajj plazanakapanwa jiwarat jaqortapjjani,taqpach soldadonakaw uka urojj jiwapjjani”, siw ejercitonakan Jehová Diosapajja.
27 “Damascon murallaparuw ninamp wiykatäjja,uka ninasti Ben-Hadad chachan jachʼa torrenakap nakhantani”.+
28 Babilonian Nabucodonosor* reyipajj katuntkäna uka Quedar+ markatakisa Hazor toqenkir reinonakapatakisa,* Jehová Diosajj akham siwa:
“Sarapjjam, Quedar markar makatapjjam,inti jalsu toqen jakirinakar tukjapjjam.
29 Carpanakapasa, uywanakapasa,carpan telanakapasa, utjirinakapas aparatäpjjaniwa.
Camellonakapwa apasipjjani,akham sasaw jupanakar artʼapjjani: ‘¡Wal ajjsarayasiñaw taqe cheqan utji!’ sasa”.
30 “¡Escapjjapjjam, wali jayar sarjjapjjam!
Hazor markan jakirinaka, sarjjasin manqha lugaranakan jakapjjam”, siw Jehová Diosajja.
“Kuna laykutejj Babilonia markan Nabucodonosor* reyipajj kunjamsa jumanak contra saytʼaspa ukwa amti,kunjamsa jumanakar atipjaspa uk amuytʼaraki”.
31 “¡Sarapjjam, jan kuna llakinïki uka marka contra makatapjjam,jan ajjsarasaw jupajj jakasi!”, siw Jehová Diosajja.
“Janiw punkunakanïkisa, ni trancanakanïkisa. Jupanakajj wali jaya cheqanakan jakasipjjaraki.
32 Camellonakaparojj katuntasaw apasipjjani,walja uywanakapsa ukhamaraki.
Taqe toqeruw jupanakar anatatäjja,para ladot ñikʼutanakap khuchurasipki ukanakaru,+taqe toqenakatwa jan waltʼäwinak jupanakjjar apanëjja”, siw Jehová Diosajja.
33 “Hazor toqejj chacal sat animalanakan putuparuw* tukuni,wiñayatakiw mä chʼusa lugarar tukuni.
Janiw khitis uka markan jakjjaniti,janirakiw khiti jaqes ukan utjnoqkaniti”.
34 Kunapachatï Judá markan Sedequías+ reyipajj apnaqañ qalltaskäna ukhaw Jeremías profetajj Jehová Diosat aka arunak Elam+ markjjat katoqäna:
35 “Ejercitonakan Jehová Diosapajj akham siwa: ‘Nayajj Elam+ markan flechtʼañ arcop pʼakjäjja, ukankiw jupanakan chʼamapajja.
36 Nayajj Elam markjjarojj alajjpachan pusi toqenakapatpach pusi thayanak apanëjja, jupanakarusti uksa toqenakaruw anatatäjja. Taqe markanakaruw Elam markankirinakajj anatatatäpjjani’ sasa”.
37 “Elamitanakarojj enemigonakap nayraqatansa jupanakar jiwayañ munapki ukanak nayraqatansa qʼal tukjäjja. Jupanakjjarojj mä jan waltʼäwi apanëjja, nayan wal colerasiñaj apanëjja”, siw Jehová Diosajja. “Jupanakan qhepap mä espada khitanëjja, jupanakar qʼal chhaqtayañkama”.
38 “Elam+ markanwa tronoj uttʼayäjja, reyiparus principenakaparus tukjäwa”, siw Jehová Diosajja.
39 “Ukampis qhepa urunakanjja, khitinakatï Elam markat preso katuntat apatäpki ukanakarojj tantachthapjjäwa”, siw Jehová Diosajja.
Notanaka
^ Jan ukajja, “yupaychirinakapajj”.
^ Ukajja, “guerran nuwasiñatak arnaqasitan suynatap” sasaw jaqokipasirakispa.
^ “Llakisiñ isi” siski uk glosarion liytʼäta.
^ Jan ukajja, “Ovej uyunak”.
^ Variante: “iñu wawanakamarojj”.
^ Variante: “jaqhen”.
^ “Jupanakarojj” sasinjja, inas Edom markan jakirinakat parlaskchi.
^ Hebreo arunjja, “Nabucodorosor”. Uka sutejj qellqañanwa mayjtʼi.
^ Jan ukajja, “gobiernonakapatakisa”.
^ Hebreo arunjja, “Nabucodorosor”. Uka sutejj qellqañanwa mayjtʼi.
^ Variante: “utaparuw”.
