Jeremías 13:1-27
13 Jehová Diosajj akham sitänwa: “Linot lurat mä cinturón alasinim, cinturamaruw uk uchasïta, ukampis janiw uk umar jakʼayätati” sasa.
2 Ukhamasti nayajj Jehová Diosan arunakaparjamaw mä cinturón alasta, cinturajaruw uchasirakta.
3 Ukatsti payïr kutinwa Jehová Diosajj nayar parlarakitu, akham sasa:
4 “Jumajj alaskta, uchatäkarakta uka cinturón katusajja, Éufrates jawirar saram, ukanwa mä jachʼa qarqan* kʼakʼatapar imantarakïta” sasa.
5 Ukhamasti nayajj kunjamtï Jehová Diosajj siskitäna ukarjamaw Éufrates jawir jakʼar sarasin imantanta.
6 Ukampis walja urunakatjja, Jehová Diosajj akham sitänwa: “Éufrates jawirar saram, kawkïr cinturontï ukar imantaniñamatak mayksma uk aptanjjam” sasa.
7 Ukatwa nayajj Éufrates jawirar sarasajja, kawki cheqarutï imantkayäta uka cheqat cinturón apsunjjayäta. Ukampis cinturonan jan walëjjätap uñjayäta, janirakiw kunatakis sirvjjänti.
8 Ukatjja Jehová Diosajj akham sasaw nayar yatiyitäna:
9 “Naya Jehová Diosajj akham sistwa: ‘Judá markan jachʼa jachʼa tukutapasa Jerusalén markan wal jachʼanchasitapasa, aka cinturonar uñtasitaw tukuni.+
10 Arunakaj jan istʼañ muniri aka jan wali jaqenakajja,+ khitinakatï jan istʼasis chuymapamp apayasipjje,+ yaqha diosanakar arkapjje, servipjje, altʼasipjjaraki ukanakajja, jan kunatak serviri aka cinturonar uñtasitäpjjaniwa’.
11 ‘Kunjamtï mä cinturonajj mä jaqen cinturapar kattʼkejja, ukhamarakiw taqpach Israel markasa Judá markasa nayar katuntatäpjjäna’, sistwa naya Jehová Diosajja, ‘ukhamat markajäñapataki,+ nayan uñtʼatäñajataki,+ jachʼañchatäñajataki, wali sumäñapataki. Ukampis jupanakajj janiw istʼasipkänti’.+
12 ”Ukatsti akham sasaw jupanakar yatiyañamaraki: ‘Israelan Jehová Diosapajj akham siwa: “Taqe jachʼa wakullanakaw vinomp phoqantasiñapa” sasa’. Jupanakasti akham sapjjarakïtamwa: ‘¿Janit nanakajj taqe jachʼa wakullanakajj vinomp phoqantatäñap yatipktjja?’ sasa.
13 Jupanakarojj akham sarakim: ‘Jehová Diosajj akham siwa: “Nayaw aka oraqen taqe jakirinakarojj vinomp phoqantaskta,+ David reyin tronopan qontʼasipki ukanakaru, sacerdotenakaru, profetanakaru ukhamarak Jerusalén markan taqe jakirinakaru, jupanakan umjasipjjañapkama.
14 Jupanakkam tukjasiyäjja, awkinakarus yoqanakarus mä igualak uñjäjja”, sistwa naya Jehová Diosajja.+ “Janiw jupanakat khuyaptʼaskäti ni sinttʼaskarakïsa, janiw jupanakar tukjañatakejj kunas jarkʼkitaniti” sasa’.+
15 Istʼapjjam, wali amuyump istʼapjjam.
Jan jumanakajj jachʼa jachʼa tukupjjamti, Jehová Diosaw parlaski.
16 Jumanakan Jehová Diosamar jachʼañchapjjam,janïr jupajj chʼamak apankipana,janïra jumanakan kayunakamajj qollunakan chʼamakthapki ukhajj lanktʼaskipana.
Jumanakajj qhanwa suyapjjäta,ukampis jupajj chʼamak apanini,uksti wali chʼamakaruw tukuyarakini.+
17 Jumanakatï jan istʼasiñ munapkätajja,jachʼa jachʼa tukupjjatam laykojj jamasan jachäjja.
Nayajj wal jachäjja, nayranakajas jacha mayakïniwa,+Jehová Diosan tamapar+ preso katuntat apapjjatap layku.
18 Reyimpiru mamapampirojj+ akham sasin yatiyam: ‘Mä jiskʼachat lugaran qontʼasipjjam.
Kuna laykutejj suma coronanakamajj pʼeqenakamat jalaqtaniwa’ sasa.
19 Aynach toqenkir* markanakan punkunakapajj llawintatawa,* janirakiw khiti llawiriris utjkiti.
Taqpach Judá markarojj yaqha markaruw preso apasjjapjje, taqeniruw preso apasjjapjje.+
20 Uñtam, alay toqet* jutasipki ukanakar uñjam.+
¿Kawkinkis jumar churaskäna uka tamajja, wali suma ovejanakamajja?+
21 ¿Kamsätas castigomajj purinkani ukhajja,qalltatpach wali suma amigonakamarjam uñjkayäta uka amigonakamat jutkani ukhajja?+
¿Janit jumajj kunjamtï mä warmejj ususiñatak tʼaqeski ukham tʼaqeskarakïta?+
22 Kunapachatï jumajj ‘¿kunatsa taqe akanakajj pasitu?’+ sasin chuymaman säta ukhajja,wal pantjasitam laykuw faldamajj chʼiyaqat uñjasi,+juman kayu talonanakamajj wal usuyasiraki.
23 ¿Mä cusita* jaqejj jañchi lipʼichip cambiasispati? ¿Jan ukajj mä leopardo animalach manchanakap cambiasispa?+
Ukhamäspa ukhajja, jumanakajj jan walinak lurañatak yatichsutpachasa,kunatï walïki uk lurapjjarakismawa.
24 Ukatwa nayajj wasarankir thayan apat pajar uñtasit jupanakar willitatäjja.+
25 Ukaw jumarojj pasätam. Uka parte jumarojj chursma”, sistwa naya Jehová Diosajja,“kuna laykutejj nayatwa jumajj armasistajja,+ kunanakatï kʼarïki ukaruw confiyaraktajja.+
26 Ukatwa nayajj faldam ajanum patjjakam aptäma,taqenin uñjkataw jumar phenqʼachäma.+
27 Adulterio juchanak luratamasa,+ mä caballor uñtasit katusiñ munasin wararitamasa,prostitutjam mä phenqʼa sarnaqatamas uñjatarakïniwa.
Jiskʼa qollunakansa pampa oraqenakansa,nayajj ajjtaskañ sarnaqatam uñjta.+
¡Ay kunakïkäta, Jerusalén marka!
¿Kunapachkamas jumajj qʼañüskakïta?”.+
Notanaka
^ Variante: “jaqhen”.
^ Jan ukajja, “muyuntatawa”.
^ Jan ukajja, “Sur toqenkir”.
^ Jan ukajja, “norte toqet”.
^ Jan ukajja, “Mä etíope”.
