Ini nga artikulo naghihisgot hin mga pakiana nga bangin iginpakiana mo na, ngan iginpapakita hini kon diin ha Biblia mabibilngan an mga baton hito. Nalilipay an mga Saksi ni Jehova nga hisgotan ini nga mga baton ha imo.

1. Ano an kahulogan han bawtismo han mga Kristiano?

An bawtismo usa nga hangyo ha pagkaada maopay nga relasyon ha Dios. Salit an usa nga Kristiano sadang mabawtismohan, diri kon minasus-an pa la hiya, kondi kon aada na hiya ha husto nga edad nga mahibaro mahitungod ha Dios ngan magin disipulo ni Jesus. (Buhat 8:12; 1 Pedro 3:21) Nagigin mga sumurunod kita ni Jesus kon nahihibaro kita han iya mga sugo ngan ginbubuhat ito.—Basaha an Mateo 28:19, 20.

Ha panahon han mga apostol ni Jesus, damu an ginios dayon ngan nag-aram mahitungod ha Dios ngan kan Jesus. Pananglitan, han hinbaroan han usa nga lalaki nga an kamatayon ni Jesus amo an dalan ngadto ha kaluwasan, nagdesisyon dayon hiya nga magin disipulo. Yana, damu liwat nga sinsero nga mga tawo an nagdesisyon nga magin sumurunod ni Jesus.—Basaha an Buhat 8:26-31, 35-38.

2. Kay ano nga nagpabawtismo hi Jesus?

Mga 30 anyos hi Jesus han bawtismohan hiya ni Juan nga Parabaptis ha Salog Jordan. Iginpapakita han iya bawtismo an iya desisyon ha pagbuhat han kaburut-on han Dios para ha iya. (Hebreo 10:7) Kaupod hini an paghalad han iya kinabuhi para ha mga sala han katawohan. Bisan antes pa kumanhi ha tuna, hinigugma ngan ginsusunod na niya an iya Amay, hi Jehova.—Basaha an Markos 1:9-11; Juan 8:29; 17:5.

  3. Kay ano nga kinahanglan magpabawtismo an usa nga Kristiano?

Iba an aton sitwasyon kan Jesus tungod kay natawo kita nga makasasala. Pero tungod han iya kamatayon, puydi na kita magkaada maopay nga relasyon ha Dios. (Roma 5:10, 12; 12:1, 2) Ha pagkamatuod, puydi pa ngani kita magin membro han iya pamilya. (2 Korinto 6:18) Ha ano nga paagi? Ha personal nga pag-ampo, igindidedikar naton an aton kinabuhi kan Jehova nga nagsasaad nga bubuhaton an iya kaburut-on ha aton bug-os nga kinabuhi. Katapos, basi hibaroan han publiko an aton dedikasyon, nagpapabawtismo kita.—Basaha an Mateo 16:24; 1 Pedro 4:2.

4. Ano an imo sadang himoon basi mabawtismohan?

An mga Saksi ni Jehova nagdudumara hin pag-aram ha Biblia ha bisan hin-o nga naruruyag magin duok ha Dios. An imo pag-aram ha Biblia ngan pagtambong ha mga katirok magpaparig-on han imo gugma ngan pagtoo ha Dios. Mabulig liwat ito nga magkaada ka mag-opay nga kalidad ngan pamatasan. An gugma, pagtoo, ngan iba pa nga kalidad ni Jehova mabulig ha imo ha pagtuman han imo saad ha pag-alagad ha iya ha kadayonan.—Basaha an Juan 17:3; Hebreo 10:24, 25.

Para ha dugang nga impormasyon, kitaa an kapitulo 18 hini nga libro, Ano Gud ba an Igintututdo han Biblia? nga iginpublikar han mga Saksi ni Jehova.