An Nagkakaurosa nga mga Nasud nag-aaghat han konsepto nga “bug-os-kalibotan nga pagkatuminungnong.” An katuyoan hito nag-uupod ha pag-aghat hin internasyonal nga kooperasyon, pagrespeto ha mga katungod han tawo, ngan pagpanalipod han aton planeta. An hinungdan? Sugad la han siring ni Maher Nasser ha UN Chronicle, “an pagbag-o han klima, pag-uswag han krimen, nagtitikaduro nga diskriminasyon, kasamok, pwersado nga pagpabalhin han mga molupyo, bug-os-kalibotan nga terorismo, epidemya, ngan pariho nga mga peligro, nakakaapekto ha katawohan ha tanan nga nasud.”

Labaw pa hito an ginbubuhat han iba. Igin-aaghat nira nga magkaada uusa la nga gobyerno ha bug-os nga kalibotan. Upod na hini an parasiday, politiko, ngan maaramon nga Italyano nga hi Dante (1265-1321) ngan an syentista nga hi Albert Einstein (1879-1955). Natoo hi Dante nga diri magkakaada kamurayawan ha kalibotan nga nagkakabahin-bahin ha politika. An “ginhadian nga nababahin mapupukan,” siring niya nga ginkukotar an mga pulong ni Jesu-Kristo.—Lucas 11:17.

Waray pag-iha katapos han Girra ha Kalibotan II, diin may ginpabuto nga duha nga bomba atomika, hi Albert Einstein naghimo hin surat para ha General Assembly han Nagkakaurosa nga mga Nasud nga iginpublikar ha usa nga newspaper. Hiya nagsiring: “Kinahanglan gumios dayon an Nagkakaurosa nga mga Nasud basi magkaada seguridad ha bug-os nga kalibotan pinaagi ha paglatag hin mga pundasyon para hin usa nga tinuod nga gobyerno ha kalibotan.”

Pero an mga politiko ba nga magigin bahin hinin gamhanan nga gobyerno diri gud magigin korap, waray kapas, ngan madarahog? O magigin maraot ba liwat hira pariho han iba nga magmarando? Ini nga mga pakiana nagpapahinumdom han ginsiring han historyador han Britanya nga hi Lord Acton nga “an gahum nagtutugway ha karaotan ngan an gahum nga diri ginkukontrol bug-os nga nakakadaot.”

Basi an mga tawo magkaada tinuod nga kamurayawan, kinahanglan magkaurosa hira. Pero paonan-o ito makakab-ot? Posible gud ba ito? Oo, siring han Biblia. Pero paonan-o? Diri pinaagi hin gobyerno han kalibotan nga ginkukompwesto hin korap nga mga politiko. Lugod, pinaagi han gobyerno nga gin-establisar han Dios. Ipapakita hito nga gobyerno nga an Dios la an may katungod ha pagmando ha iya mga linarang. Ano ito nga gobyerno? Gintatawag ito han Biblia nga an “Ginhadian han Dios.”—Lucas 4:43.

An Ginhadian han Dios an ginhuhunahuna ni Jesu-Kristo han hiya nagsiring ha iya modelo nga pag-ampo: “Kumanhi unta an imo Ginhadian. Matuman unta an imo kaburut-on dinhi ha tuna.” (Mateo 6:9, 10) Oo, sisiguruhon han Ginhadian han Dios nga matutuman an kaburut-on han Dios dinhi ha tuna, diri an kaburut-on han hakog o makikalugaringon nga mga tawo.

An Ginhadian han Dios gintatawag liwat nga “an Ginhadian han langit.” (Mateo 5:3) Kay ano? Bisan kon magmamando ito ha bug-os nga tuna, diri ito magmamando tikang ha tuna kondi tikang ha langit. Hunahunaa an iginpapasabot hito. Ini nga gobyerno diri magkikinahanglan hin materyal o pinansyal nga ayuda. Daku gud ito nga katalwasan para ha katawohan!

Sugad la han iginpapasabot han pulong nga “ginhadian,” an Ginhadian han Dios usa nga hadianon nga gobyerno. May-ada ito Hadi—hi Jesu-Kristo—nga kinarawat han iya awtoridad tikang ha Dios. May kalabotan kan Jesus, an Biblia nasiring:

•   “An gobyerno ibubutang ha iya sugbong . . . An lukop han iya gobyerno ngan an kamurayawan magigin waray kataposan.”—Isaias 9:6, 7, footnote.

• “Gintagan hiya hin awtoridad ha pagmando, hin dungog, ngan hin ginhadian, basi an ngatanan nga mga katawohan, mga nasud, ngan mga grupo nga iba-iba an yinaknan mag-alagad ha iya. An iya pagmando . . . diri mawawara.”—Daniel 7:14.

• “An ginhadian han kalibotan nagin Ginhadian han aton Ginoo [Dios] ngan han iya Kristo.”—Pahayag 11:15.

Sugad nga katumanan han modelo nga pag-ampo ni Jesus, bug-os nga tutumanon han Ginhadian han Dios an kaburut-on han Dios ha tuna. Ilarom han pagmando hito, an ngatanan nga katawohan mahibabaro ha pag-ataman han planeta basi magin maopay utro ito ngan mapuno hin buhi nga mga linarang.

Labaw ha ngatanan, tututdoan han Ginhadian han Dios an mga sakop hito. An ngatanan tututdoan hin pariho nga mga suruklan. Mawawaray na kasamok o pagkabahin-bahin. “Diri hira mandadaot o manruruba . . . kay an tuna mapupuno gud han kahibaro mahitungod kan Jehova sugad la nga an dagat nalulukop hin katubigan,” siring han Isaias 11:9.

An mga umurukoy ha tuna magigin pariho han ginhihingyap han Nagkakaurosa nga mga Nasud—mahigugmaon ha kamurayawan nga mga tuminungnong ha bug-os nga kalibotan. “Magmamalipayon hira hinduro tungod han hura nga kamurayawan,” siring han Salmo 37:11. Hito nga panahon, mawawara na ha bokabularyo an mga pulong nga “krimen,” “polusyon,” “kapobrehan,” ngan “girra.” Kondi san-o ini mahitatabo? Oo, san-o magmamando an Ginhadian han Dios? Paonan-o ito magmamando? Ngan paonan-o ka magpapahimulos ha pagmando hito? Hisgotan naton.