LEKSYON 32
An Ginhadian han Dios Nagmamando Na Yana!
An Ginhadian han Dios nagtikang pagmando ha langit han 1914. Ngan ito liwat an pagtikang han kataposan nga mga adlaw han pagmando han tawo. Paonan-o kita nahibaro? Usisaha kon ano an igintagna han Biblia ngan kon ano an nahitatabo ha kalibotan ngan kon ano an kinaiya han mga tawo tikang han 1914.
1. Ano an gintagna han Biblia?
Iginpapakita ha libro han Biblia nga Daniel nga an Ginhadian han Dios magtitikang pagmando ha kataposan han peryodo nga gintatawag nga “pito ka panahon.” (Daniel 4:16, 17) Paglabay hin damu ka siglo, gintawag ni Jesus ito gihapon nga peryodo sugad nga “itinanda nga mga panahon han mga nasud,” ngan gintutdo niya nga waray pa ito matapos. (Lucas 21:24) Sugad han aton mahibabaroan, an pito ka panahon matatapos ha 1914.
2. Ano an nahitatabo ha kalibotan ngan ano an kinaiya han mga tawo tikang han 1914?
An mga disipulo ni Jesus nagpakiana ha iya: “Ano an magigin tigaman han imo presensya ngan han ikatarapos han sistema han mga butang?” (Mateo 24:3) Sugad nga baton, gintagna ni Jesus an damu nga mga butang nga mahitatabo kon magtikang na hiya pagmando ha langit sugad nga Hadi ha Ginhadian han Dios. An pipira hini amo an girra, kakulang hin pagkaon, ngan mga linog. (Basaha an Mateo 24:7.) Gintagna liwat ha Biblia nga tungod han kinaiya han mga tawo ha “kataposan nga mga adlaw” an kinabuhi magigin “makuri pakiangayan.” (2 Timoteo 3:1-5) Ini nga mga kahimtang ngan kinaiya mas nakikita gud tikang han 1914.
3. Kay ano nga an kahimtang ha kalibotan nagin maraot gud tikang han nagmando an Ginhadian han Dios?
Waray pag-iha tikang han nagin Hadi hi Jesus ha Ginhadian han Dios nakiggirra hiya kan Satanas ngan ha mga demonyo didto ha langit. Napirde hi Satanas hito nga girra. An Biblia nasiring nga “iginlabog hiya ha tuna, ngan an iya mga anghel iginlabog upod niya.” (Pahayag 12:9, 10, 12) Duro gud an kasina ni Satanas tungod kay maaram hiya nga bubungkagon hiya. Salit nagpahinabo hiya hin kasakit ngan pag-antos ha bug-os nga kalibotan. Diri urusahon nga an kahimtang ha kalibotan maraot gud! Wawad-on han Ginhadian han Dios ini ngatanan nga problema.
DUGANG NGA USISAHA
Usisaha kon paonan-o kita nahibaro nga an Ginhadian nagtikang pagmando han 1914 ngan kon ano an angay magin epekto hito ha aton.
4. Iginpapakita han kronolohiya ha Biblia nga an Ginhadian han Dios nagtikang pagmando han 1914
Ginpahinabo han Dios nga hi Hadi Nabucodonosor han kadaan nga Babilonya magkaada inop nga nagpapakita han mahitatabo ha tiarabot. Ito nga inop ngan an interpretasyon ni Daniel nagtutudlok han pagmando ni Nabucodonosor ngan han pagmando han Ginhadian han Dios.—Basaha an Daniel 4:17. a
Basaha an Daniel 4:20-26, katapos gamita an tsart ha pagbaton han masunod nga mga pakiana:
-
(A) Ano an nakita ni Nabucodonosor ha iya inop?—Kitaa an bersikulo 20 ngan 21.
-
(B) Ano an mahitatabo ha kahoy?—Kitaa an bersikulo 23.
-
(C) Ano an mahitatabo ha kataposan han “pito ka panahon”?—Kitaa an bersikulo 26.
An Koneksyon han Kahoy ha Inop Ngan han Ginhadian han Dios
AN TAGNA (Daniel 4:20-36)
Pagmando
(A) Usa nga daku nga kahoy
Naundang an pagmando
(B) “Pudla an kahoy,” ngan tuguti nga “lumabay . . . an pito ka panahon”
Naibalik an pagmando
(C) “An imo ginhadian magigin imo utro”
Ha siyahan nga katumanan hini nga tagna . . .
-
(D) Hin-o an ginrirepresentaran han kahoy?—Kitaa an bersikulo 22.
-
(E) Paonan-o naundang an iya pagmando?—Basaha an Daniel 4:29-33.
-
(F) Ano an nahitabo kan Nabucodonosor ha kataposan han “pito ka panahon”?—Basaha an Daniel 4:34-36.
SIYAHAN NGA KATUMANAN
Pagmando
(D) Hi Nabucodonosor nga Hadi han Babilonya
Naundang an pagmando
(E) Paglabay han 606 B.C.E., hi Nabucodonosor nawara ha iya maopay nga pamurubuot ngan waray na makagmando ha sulod hin pito ka literal nga tuig
Naibalik an pagmando
(F) Bumalik an maopay nga pamurubuot ni Nabucodonosor ngan nagtikang utro hiya pagmando
Ha ikaduha nga katumanan hini nga tagna . . .
-
(G) Hin-o an ginrirepresentaran han kahoy?—Basaha an 1 Cronicas 29:23.
-
(H) Paonan-o naundang an ira pagmando? Paonan-o kita nahibaro nga diri hira nagmamando han nakanhi pa hi Jesus ha tuna?—Basaha an Lucas 21:24.
-
(I) San-o ngan diin naibalik ini nga pagmando?
IKADUHA NGA KATUMANAN
Pagmando
(G) Israelita nga mga hadi nga nagrirepresentar han pagmando han Dios
Naundang an pagmando
(H) Ginbungkag an Jerusalem, naundang an pagmando han Israelita nga mga hadi ha sulod hin 2,520 ka tuig
Naibalik an pagmando
(I) Nagtikang pagmando hi Jesus ha langit sugad nga Hadi han Ginhadian han Dios
Ano kaiha an pito ka panahon?
An pipira nga bahin han Biblia nabulig ha aton nga masabtan an iba pa nga mga bahin hito. Pananglitan, an libro han Biblia nga Pahayag nasiring nga an tulo ngan tunga ka panahon katugbang han 1,260 ka adlaw. (Pahayag 12:6, 14) An pito ka panahon doble hito nga numero, o 2,520 ka adlaw. Ha Biblia, usahay an pulong nga adlaw nangangahulogan hin tuig. (Ezekiel 4:6) Sugad hito an pito ka panahon nga ginsisiring ha libro han Daniel—nagrirepresentar ito hin 2,520 ka tuig.
5. Nagbag-o an kalibotan tikang han 1914
Gintagna ni Jesus an magigin kahimtang han kalibotan kon magin Hadi na hiya. Basaha an Lucas 21:9-11, katapos, hisguti niyo ini nga pakiana:
-
Hain hini nga mga kahimtang an imo nakita o nabatian?
Ginsumat ni apostol Pablo kon ano an magigin kinaiya han mga tawo ha kataposan nga mga adlaw han pagmando han tawo. Basaha an 2 Timoteo 3:1-5, katapos, hisguti niyo ini nga pakiana:
-
Hain hini nga mga kinaiya an imo nakikita ha mga tawo yana?
6. Ipakita nga natoo ka nga nagmamando na yana an Ginhadian han Dios
Basaha an Mateo 24:3, 14, katapos, hisguti niyo ini nga mga pakiana:
-
Ano nga importante nga buruhaton an nagpapakita nga nagmamando na yana an Ginhadian han Dios?
-
Paonan-o ka makikigbahin hini nga buruhaton?
An Ginhadian han Dios nagmamando na yana, ngan hirani na umabot an adlaw nga ito na an magmamando ha bug-os nga kalibotan. Basaha an Hebreo 10:24, 25, katapos, hisguti niyo ini nga pakiana:
-
Ano an kinahanglan buhaton han kada tagsa ha aton “samtang nakikita [naton] nga nagtitikahirani na an adlaw”?
Kon may nahibabaroan ka nga makakabulig ngan makakatalwas ha iba, ano an imo bubuhaton?
BANGIN MAY MAGPAKIANA: “Kay ano nga an mga Saksi ni Jehova nasiring nga an 1914 importante gud nga tuig?”
-
Ano an imo ibabaton?
SUMARYO
An mga tagna ha Biblia, kronolohiya, ngan panhitabo ha kalibotan nagpapamatuod nga an Ginhadian han Dios nagmamando na yana. Iginpapakita naton nga natoo kita hini pinaagi ha pagsangyaw mahitungod hito ngan pag-atender ha mga katirok.
Repaso
-
Ano an nahitabo ha kataposan han pito ka panahon nga gintagna ha libro han Biblia nga Daniel?
-
Ano an nakakombinse ha imo nga nagtikang pagmando an Ginhadian han Dios han 1914?
-
Paonan-o mo maipapakita nga natoo ka nga an Ginhadian nagmamando na yana?
DUGANG NGA IMPORMASYON
Usisaha kon ano an siring han mga historyador ngan han iba pa mahitungod han pagbag-o han kalibotan tikang han 1914.
“Kon San-o Tigda nga Naghamubo an Moralidad” (Pagpamata!, Abril 2007)
Basaha kon paonan-o an tagna nga makikita ha Mateo 24:14 nakaapekto ha kinabuhi han usa nga lalaki.
“Hinigugma Ko an Baseball Labaw ha Bisan Ano!” (An Barantayan Num. 3 2017)
Paonan-o kita nahibaro nga an tagna ha Daniel kapitulo 4 nagtutudlok ha Ginhadian han Dios?
“San-o Nagtikang Pagmando an Ginhadian han Dios? (Bahin 1)” (An Barantayan, Oktubre 1, 2014)
Ano an nagpapakita nga an “pito ka panahon” nga mababasa ha Daniel kapitulo 4 natapos han 1914?
“San-o Nagtikang Pagmando an Ginhadian han Dios? (Bahin 2)” (An Barantayan, Nobyembre 1, 2014)
a Kitaa an kataposan nga duha nga artikulo ha Dugang nga Impormasyon nga seksyon hini nga leksyon.
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
